30Namalik ang mga apostoles ug nakigkita sila kang Jesus, ug ilang gisugilon kaniya ang tanan nilang nahimo ug natudlo. 31Daghan kaayo ang mga tawo nga nagpulipuli pagpangabot ug pagpanlakaw; tungod niini si Jesus ug ang iyang mga tinun-an wala nay higayon bisan gani sa pagpangaon. Busa miingon si Jesus sa iyang mga tinun-an, “Mangadto kita sa dapit nga awaaw aron makapahulay kamog diyotay.” 32Busa nanakay sila sa usa ka sakayan ug nangadto sa usa ka dapit nga awaaw. 33Apan daghang mga tawo ang nakakita sa ilang pagbiya ug nailhan sila dayon; busa ang mga tawo sa tanang lungsod miadto nga nagdagan ug nahiuna pa gani pag-abot sa dapit nga giadtoan ni Jesus ug sa iyang mga tinun-an. 34Sa pagkawas ni Jesus sa sakayan, nakita niya kining dakong panon sa katawhan ug naluoy siya pag-ayo kanila, kay sama man sila sa mga karnero nga walay magbalantay. Ug gitudloan niya sila ug daghang mga butang. Ang Ebanghelyo sa Ginoo.

oOo

KAHULOGAN SA EBANGHELYO (Markos 6:30 -34)

30aNamalik ang mga apostoles ug na­kigkita sila kang Jesus… Niining bahina sa Ebanghelyo, si San Markos mitawag sa una ug katapusang higayon sa mga tinun-an ni Kristo og mga Apostoles (sa Griego apostoloi nga sa ato pa kadtong mga gipadala). Sa miaging Domingo, gisaysay nga kini sila nakadungog sa mga paghimangno ni Jesus ug sila gipadala nga nagtinagurha aron sa pagtuman sa ilang misyon. Sila wala ubani ni Jesus sa maong paglakaw ug pagwali.

Ug karon, ania na sila namauli gikan sa maong misyon. Ilang nasinati ang gahum sa Maayong Balita, apan tingali aduna pay mga pagdumili sa pagdawat sa mga katawhan sa unsay ilang mga gipangwali. Hinoon ato rang masayran kon mopadayon kita sa pagbasa niining maong saysay nga sila gibatig kakapoy ug busa nagkinahanglan og pahulay. Timan-an nato nga niadtong panahona ang mga nagkalainlaing dapit maabot lamang pinaagi sa paglakaw.

30bug ilang gisugilon kaniya ang tanan nilang nahimo ug natudlo. Mao na kini ang panahon nga ilang isugilon ngadto kang Jesus kon unsay mga panghitabo sa maong misyon. Human sa usa ka mahinungdanong buluhaton, maayo gayod ang himoon ang pagbalik-tan-aw kon review aron mahimong lawom ang atong pagsabot niining maong buluhaton sumala sa gihuptan tang pagtuo.

Atong nasayran nga nagkaanam og kadaghan ang mga tawo nga nakasabot ngano nga gikinahanglan ang regular nga panagtigum sa mga katawhan aron sa pagpaambit sa mga kasinatian sa kinabuhi nga pinasikad sa kahayag sa pagtuong Kristohanon. Mao nga adunay panagtapok atol sa kasaulogan sa Santos nga Misa. Gawas pa adunay panagtapok sa mga silingan nga gitawag og GSK Cluster Meeting. Mao kini ang kahigayonan nga kita mibalik ngadto kang Jesus aron atong ikataho o ikapaambit ngadto kaniya ang atong mga kasinatian sa pagtuo pinaagi ug uban sa atong mga isigkamatuohon. Dinhi atong gibalik ngadto kang Jesus, dili lamang ang mga kasinatian sa atong kinabuhi, kondili usab ang atong mga pangandoy o tinguha pinaagi sa atong mga pag-ampo.

31Daghan kaayo ang mga tawo nga nagpulipuli pagpangabot ug pagpanlakaw... Busa miingon si Jesus sa iyang mga tinun-an, “Mangadto kita sa dapit nga awaaw aron makapahulay kamog diyotay.” 32Busa nanakay sila sa usa ka sakayan ug nangadto sa usa ka dapit nga awaaw. Sa apostolado, ang mga lumilihok nagkinahanglan og panahon sa pagpahulay human sa ilang mga paglihok ug pagbuhat. Nasayran nato nga kon ang usa ka tawo overstress o anaa sa kabug-at sa kaugalingon, mahitabo usab nga anaa kaniya ang pagkawalay kagaan sa kabubut-on, pagbati, sinultihan o tinagdan sa uban.

Mao nga si Jesus misugyot nga sila moadto sa usa ka dapit nga awaaw aron sa pagpahulay. Kining maong pagpahulay mao ang paghikap sa kaugalingon (to be in touch with oneself) aron makaplagan ug masabtan ang tinuod nga pagkatawo. Mao kini ang gitawag og internalization nga sa ato pa ang pagpahimutang sa tanang panghitabo sulod sa atong kaugalingong galamhan aron nga kon unsay anaa sa kahiladman maoy mahimong sukaranan na usab sa unsay dugang pa nga anga—yang buhaton.

Ang pagsimba—pagpaminaw sa Pulong sa Dios, pagpaminaw sa wali—ang pag-inambitay sa kasinatian sa Pagtuo diha sa GSK cluster meeting, pag-apil sa mga seminars, retreats ug uban pa maoy mga paagi nga kining proseso sa internalization mapatuman. Ang adlaw nga Domingo gigamit ba gayod nako nga usa ka adlawng igpapahulay. 33Apan daghang mga tawo ang nakakita sa ilang pagbiya ug nailhan sila dayon; busa ang mga tawo sa tanang lungsod miadto nga nagdagan ug nahiuna pa gani pag-abot sa dapit nga giadtoan ni Jesus ug sa iyang mga tinun-an. 34aSa pagkawas ni Jesus sa sakayan, nakita niya kining dakong panon sa katawhan…

Buot gayod unta sila nga mopahulay, apan aduna pay daghang mga tawo nga nanginahanglan kanila ug sila dili kabalibaran. Tan-awa sa Markos 8:34-35. 34bug naluoy siya pag-ayo kanila... Ang tanan nga gihimo ni Jesus nagagikan gayod sa iyang kaayo ug kaluoy. 34ckay sama man sila sa mga karnero nga walay magbalantay. Sa makadaghan gilarawan sa Bibliya ang kalambigitan tali sa karnero ug sa ilang magbalantay. Mao kini ang gilarawan ni Jesus sa iyang kaugalingon: Maayong Magbalantay (Mk 14:27 ; Lk 19:10 ; 15:4-7; Jn 10:1-16) 34dUg gitudloan niya sila ug daghang mga butang. Alang sa mga katawhan nga walay magbalantay ang unang gihimo ni Kristo mao ang pagpabati kanila sa Pulong. Gitudloan niya sila. Kini ang gitawag og Ministry of the Word.