EBANGHELYO (Lukas 9:28-36)

28Mga usa ka semana human siya magsulti niining mga butanga, gidala ni Jesus si Pedro, si Juan, ug si Santiago , ug nanungas sila sa usa ka bungtod aron mag-ampo. 29Samtang nag-ampo siya, nausab ang iyang panagway ug migilak ang iyang saput sa kaputi. 30Ug sa kalit mitungha ang duha ka tawo ug nakigsulti kaniya. Sila mao si Moises ug si Elias, 31nga mipakita uban sa langitnong himaya ug nakigsulti kang Jesus mahitungod sa iyang kamatayon didto sa Jerusalem. 32Nahikatulog pag-ayo si Pedro ug ang iyang mga kauban, apan nahigmata sila ug nakakita sa himaya ni Jesus ug sa duha ka tawo nga nagbarog tupad kaniya. 33Sa diha nga ang duha ka tawo mobiya na kang Jesus, miingon si Pedro kaniya, "Magtutudlo, maayo gayod nga ania kita dinhi. Magbuhat kami og tulo ka payag, usa alang kanimo, usa alang kang Moises, ug usa alang kang Elias." (Sa tinuoray wala siya makasabut sa iyang gipanulti.) 34Samtang nagsulti pa siya, mitungha ang usa ka panganod ug milandong kanila, ug nangahadlok ang mga tinun-an sa diha nga ang panganod mipatungod kanila. 35Unya may tingog gikan sa panganod nga miingon, “Kini mao ang akong Anak nga akong gipili; pamati-a ninyo siya." 36Sa pagkahanaw na sa tingog, si Jesus na lamang ang nahibilin. Wala magsaba ang mga tinun-an mahitungod niining tanan, ug niadtong higayona walay usa ka butang sa ilang nakita nga gisugilon nila kang bisan kinsa. Ang Ebanghelyo sa Ginoo.

KAHULOGAN SA EBANGHELYO (Lukas 9:28 -36)

28aMga usa ka semana human siya magsulti niining mga butanga...

Ang tulo ka mga ebanghelista (Mt 17:1; Mk 9:2; Lk 9:28 ) nagkahiusa sa ilang taho nga ang Transfiguration kon ang pagkausab sa panagway ni Jesus nahitabo usa ka semana tapos misulti si Jesus “niining mga butanga”. Usa kini ka talagsaong higayon nga ang duha ka mga panghitabo sa kinabuhi ni Kristo gidugtong (linked chronologically). Ang mga gisulti ni Jesus may kalabutan sa iyang umaabot nga pagpasakit ug kamatayon. 28bgidala ni Jesus si Pedro, si Juan, ug si Santiago , ug nanungas sila sa usa ka bungtod aron mag-ampo. Pagkabulahan gayod nila nga sila gipakuyog ni Jesus ngadto sa bukid. Didto ilang linawas nga nakit-an si Jesus nga nag-ampo. Apan atong mapamatud-an unya sa unahan ang ilang pagka-dili angayan sa maong pribiliheyo tungod kay samtang si Jesus nag-ampo, silang tulo nangatulog! Si Jesus usa gayod ka tawo nga maampoon, kanunay nga nakighinabi sa iyang Amahan, labi na sa mga mahinungdanong bahin sa iyang paghukom (Lk 3:21; 5:16; 6:12; 9:19; 9:28; 10:21; 11:1; 22:32; 22:41-21; 23:34; 23:46).

Ako bang gihatagan og igong panahon ang pag-ampo labi na sulod niining panahon sa kwaresma?

29Samtang nag-ampo siya, nausab ang iyang panagway ug migilak ang iyang saput sa kaputi.

Ang pagkausab sa panagway mahitabo lamang kon adunay tinuod nga pag-ampo. Kay diha sa tinuorayng pag-ampo anaa ang salamin sa himaya sa Dios (2 Corinto 3:18 )! Mao nga sa panahon sa mga pagsulay ug kasakitan, kon ang sala mobira kanato ngadto sa pagka-walay nahot, ang pag-ampo lamang gayod ang makapausab kanato.

Ang puting sapot maoy timaan sa pagkalangitnon (Daniel 7:9; 10:5-6).

30Ug sa kalit mitungha ang duha ka tawo ug nakigsulti kaniya. Sila mao si Moises ug si Elias, 31nga mipakita uban sa langitnong himaya ug nakigsulti kang Jesus mahitungod sa iyang kamatayon didto sa Jerusalem .

Si Lukas lamang ang misaysay sa unod sa gipanagsultihan tali ni Jesus ug sa duha ka mga saksi sa Daang Testamento: nagsultihanay sila kabahin sa “pagbiya” ni Jesus o sa Griego ang “exodou” nga mao ang agian o dalan ni Jesus alang sa kaluwasan sa mga tawo gikan sa mga sala. Kining maong agianan o dalan mao ang kasakitan ug kamatayon diha krus. Kitang tanan moagi sa atong tagsatagsa ka dalan padulong sa kamatayon! Mao nga niadtong Miyerkoles sa Badlis gipahinumduman kita: “Timan-i, tawo, gikan ikaw sa abog, ug sa abog ikaw padulong!”

32Nahikatulog pag-ayo si Pedro ug ang iyang mga kauban, apan nahigmata sila ug nakakita sa himaya ni Jesus ug sa duha ka tawo nga nagbarog tupad kaniya. 33Sa diha nga ang duha ka tawo mobiya na kang Jesus, miingon si Pedro kaniya, "Magtutudlo, maayo gayod nga ania kita dinhi. Magbuhat kami og tulo ka payag, usa alang kanimo, usa alang kang Moises, ug usa alang kang Elias." (Sa tinuoray wala siya makasabut sa iyang gipanulti.)

Nag-atubang sa usa ka dili-matukib nga talan-awon, ang mga tinun-an wala na usab makasabot. Gikan sa paghikatulog, daw nakalitan sila sa ilang nasaksihan ug misulti na lang bisag unsa. Ang pakigharong sa Balaan dili gayod matukib sa pulong! Didto sa halaman sa Getsemani, kini silang tulo mangatulog pag-usab! 34Samtang nagsulti pa siya, mitungha ang usa ka panganod ug milandong kanila, ug nangahadlok ang mga tinun-an sa diha nga ang panganod mipatungod kanila.

Si Lukas lamang usab ang milarawan nga samtang si Pedro nagsulti pa dihay milandong nila nga panganod. Ang panganod maoy timaan sa Balaan. Tungod kay ang mga tinun-an napakyas man sa pagsabot sa kahulogan sa maong panghitabo, mao nga ang Dios maoy mihatag kanilag pagtataw pinaagi sa talan-awon sa “panganod”. Ang pagsabot sa presensya sa Dios nagkinahanglan og daghang mga yugto o hugna. Mao nga sa presensya sa Dios, maayo pa ang pagbaton og balaang kahilom!

35Unya may tingog gikan sa panganod nga miingon, “Kini mao ang akong Anak nga akong gipili; pamati-a ninyo siya." Si Mateo ug Markos migamit sa pulong nga Griego “agapetos” nga sa ato pa, hinigugma. Ang gigamit ni Lukas mao ang Griego nga “eklelegomenos” nga sa ato pa, pinili. Si Jesus usa ka pinili sama sa Suluguon sa Ginoo (Isaias 42:1, 43:20, 45:4).

Ang matag usa kanato pinili pinaagi sa atong pagkabinunyagan diha kang Cristo.

36… Wala magsaba ang mga tinun-an mahitungod niining tanan, ug niadtong higayona walay usa ka butang sa ilang nakita nga gisugilon nila kang bisan kinsa. Samtang wala pa sila makasabot nagpabilin sila ka kahilom. Unya ra kini nila itaho sa uban kon sila makasabot na.