7Ug gitigom niya ang napulog-duha ka tinun-an ug gipadala sa tinagurha. Unya iyang gihatagan sila sa gahom sa paghingilin sa mga yawa, 8ug giingnan sila, “Ayaw kamo pagdalag pagkaon, ni puntil, ni kuwarta, o bisan unsa, gawas lamang sa sungkod. 9Pagsandalyas kamo, apan ayaw pagdalag laing bisti gawas sa inyong gisul-ob.” 10Miingon usab siya kanila, “Sa inyong pag-abot sa lungsod, adto saka sa balay sa nagdapit kaninyo, ug ayawg balhin sa laing balay hangtod mobiya kamo nianang lungsora. 11Kon mahiadto kamo sa usa ka dapit diin ang mga tawo dili modawat kaninyo o dili mamati kaninyo, biyai kanang dapita ug taktaka ang abog sa inyong tiil. Pasidaan kini alang kanila!” 12Busa nanglakaw sila ug nagwali nga ang mga tawo kinahanglan maghinulsol sa ilang mga sala. 13Ilang gihinginlan ang daghang mga yawa ug gihaplasan nilag lana ug giayo ang daghang mga masakiton. Ang Ebanghelyo sa Ginoo.

KAHULOGAN SA EBANGHELYO (Markos 6:7-13)

7aUg gitigom niya ang napulog-duha ka tinun-an ug gipadala sa tinagurha.

Usa sa mga gihimo ni Jesus sa iyang pagsugod sa iyang kinabuhing publiko mao ang pagpili og mga tinun-an (Mk 1:16 ). Ug niining bahina sa Ebanghelyo, iyang gipili ang napulog-duha — usa ka numero nga may simbolo (12 ka mga patriarka, 12 ka mga tribo), nga nagpakita usab sa tuyo ni Jesus sa pagmugna og bag-ong katawhan sa Israel . Sa unang bahin sa ebanghelyo, ang mga Apostoles nakig-uban kang Jesus (Mk 3:14 ). Ug karon si Jesus mitugyan na ngadto kanila ang kaakohan sa pagmis-yon. Sa unang higayon, ang mga Apostoles magwali nga dili-ika-uban si Jesus. Ang Simbahan gitugyanan ni Jesus sa pagsagop sa iyang misyon.

Mao usab kini ang proseso sa kinabuhing Kristohanon: Una, ang atong personal nga pakigsuod kang Jesus; ug ikaduha, ang paglakaw ug ang pagsang-yaw ni Cristo ngadto sa uban. Mapadayag kini sa matag semana sa atong pagpuyo: Una, ang pagtapok sa mga sakop sa Kristohanong Katilingban o Simbahan diha sa pagsimba sa adlawng Domingo; ug ikaduha, sa pagpuyo o pagsaksi kang Kristo sa matag adlaw nianang semanaha.

Kini usab ang dakong hinungdan ngano nga gipadala sila nga nagtinagurha. Kini nagpasabot lamang nga anaa gayod kanang pagka-katilingbanon sa atong Kristohanong pagtuo. Usa ka buhat sa pagtambayayong o teamwork ang panimbahan. Ang timaan sa panag-higugmaay maoy lig-ong ilhanan sa atong pagka-Simbahan. 7bUnya iyang gihatagan sila sa gahom sa paghingilin sa mga yawa, 8ug giingnan sila, “Ayaw kamo pagdalag pagkaon, ni puntil, ni kuwarta, o bisan unsa, gawas lamang sa sungkod. 9Pagsandalyas kamo, apan ayaw pagdalag laing bisti gawas sa inyong gisul-ob.”

Si Jesus wala maghatag og pagtulun-ang doktrinal ngadto sa iyang mga Apostoles. Hinoon gipahinumdom ni Jesus ngadto kanila kon unsang matanga sa kinabuhi nga ilang pagapuy-an. Ang pagsaksi pinaagi sa aktuwal nga pagpuyo maoy mas mahinungdanon pa kay sa pagsaksi nga gilitok lamang sa mga pulong. Ang mga nangalagad sa Simbahan kinahanglan nga anaa sa “kagaan” aron nga mahimong dali o paspas ang paglihoklihok. Mao nga alang kang Kristo kinahanglan nga ang mga alagad sa Simbahan mosagop sa kinabuhi nga anaa ang pagkakabos. Ang kakabos man god “makapagaan” tungod kay wala may bug-at nga palas-anong katigayonan. Ang mahinungdanong gikinahanglan lamang mao gayod ang angay nga huptan.

Ang pag-angkon og mga katigayonan nga labaw sa kasagaran maoy hinungdan sa pagkabahinbahin, sa panaglalisay ug sa pagbaton og taas nga garbo. 10Miingon usab siya kanila, “Sa inyong pag-abot sa lungsod, adto saka sa balay sa nagdapit kaninyo, ug ayawg balhin sa laing balay hangtod mobiya kamo nianang lungsora. 11Kon mahiadto kamo sa usa ka dapit diin ang mga tawo dili modawat kaninyo o dili mamati kaninyo, biyai kanang dapita ug taktaka ang abog sa inyong tiil. Pasidaan kini alang kanila!” Daan nang mipasidaan si Jesus nga dili sa tanang higayon nga dawaton ang iyang mga pinadala. Adunay mga tawo nga mosalikway kanila. 12aBusa nanglakaw sila…

Sa ilang paglakaw kini mao ang ilang misyon: Una, ang pagwali; Ikaduha, ang pagpakigbisog sa dautan; ug Ikatulo, ug ang paghimo og maayo labi na ngadto sa mga adunay sakit. 12bug nagwali nga ang mga tawo kinahanglan maghinulsol sa ilang mga sala. Mao kini ang labing una nga hinungdan sa pagwali — ang paghinulsol sa mga sala. Sa ato pa, ang kausaban o kabag-ohan. Nasayod kita nga kitang mga tawo magahion gayod sa pag-usab sa atong kaugalingon. Dili kita buot nga “badlongon” o “pantonon”. Lisod ang pagbiya sa naandan o karaang paagi sa pagkinabuhi. Sa Griego mao kini ang gitawag og metanoia nga nagkahulogan og total o kinatibuk-an nga kausaban o kabag-ohan — ang hingpit nga pagbiya sa unsay dautan ug hingpit nga pagsagop sa maayo!

13aIlang gihinginlan ang daghang mga yawa...

Ang misyon mao ang pakiggubat o pakig-asdang batok sa yawa. Ang mga tinuod nga alagad wala magbaligya og sayon nga mapalit nga produkto, kondili ang pakigharong sa gamhanang kaaway nga mao ang sala. 13bug gihaplasan nilag lana ug giayo ang daghang mga masakiton. Ang pagsangyaw dili diay lamang mao ang “pagtudlo” kondili mao usab ang “pag-ayo” o paghatag og kagawasan gikan sa kaulipnan sa sala. Dumtan ta ang sala, apan ayohon ta ang nakasala.