35Sa pagkagabii niadtong adlawa, giingnan ni Jesus ang iyang mga tinun-an, "Manabok kita sa lanaw." 36Busa gibiyaan nila ang panon sa katawhan ug ang mga tinun-an misakay sa sakayan nga gisakyan ni Jesus, ug siya gidala nila. May ubang mga sakayan usab didto. 37Unya mihuros ang kusog nga hangin ug hisab-wan ang sakayan sa balod ug hapit mapuno sa tubig ang sakayan. 38Apan natulog si Jesus nga nag-unlan didto dapit sa ulin. Gipukaw siya sa mga tinun-an nga nag-ingon, "Magtutudlo, wala ka ba mabalaka nga hapit na man kita malunod?" 39Mibangon si Jesus ug iyang gipahunong ang hangin, ug ang mga balod iyang giingnan, "Hunong!" Ug mihunong ang hangin ug mibanos ang kalinaw. 4°Unya miingon si Jesus kanila, "Nganong nalisang man kamo? Wala ba kamoy pagsalig?" 41Apan nalisang sila ug nagpangutan-anay, "Kinsa man kining tawhana nga bisan gani ang hangin ug ang mga balod motuman man kaniya?" Ang Ebanghelyo sa Ginoo.

oOo

KAHULOGAN SA EBANGHELYO (Markos 4:35-41)

35Sa pagkagabii niadtong adlawa, giingnan ni Jesus ang iyang mga tinun-an, "Manabok kita sa lanaw." 36Busa gibiyaan nila ang panon sa katawhan ug ang mga tinun-an misakay sa sakayan nga gisakyan ni Jesus, ug siya gidala nila. May ubang mga sakayan usab didto. Kon ipahisibo sa unsay nahitabo, maaninaw nato ang usa ka maayong gabii panahon sa tig-init o summer. Si Jesus mihulam sa sakayan ni Simon Pedro ug iyang kining hinayhinay nga gidahik agi sa kabaybayonan sa Caparnaum. Kining maong bahin sa saysay sa Ebanghelyo — ang matag linya niini — gihatagan og kahulogan sa katekesis nga gitagik sa unang siglo (first century) sa mga Amahan sa Simbahan (Fathers of the Church).

“Niadtong adlawa”. Dili lamang kini kay usa ka panghitabo sulod sa maong adlaw. Kondili usa ka adlaw nga sa kanunay mahinumduman ni Pedro hangtud sa tibuok niyang kinabuhi. Kahinumduman nga mabasa diha sa Daang Tugon ang gihisgotan nga “Adlaw ni Yahweh” nga mao ang “adlaw” diin ang Dios mihimog interbersyon, usa ka adlaw nga gipasiunhan og daghang mga nahitabong katagman. (tan-awa sa Joel Ulohan 1 ug 2). “Sa pagka-gabii niadtong adlawa”. Dili lamang kay kini mao ang pagbanos sa mabugnawng hangin human sa kainit o pagsalop sa adlaw, kondili mao ang “takna sa kangitngit”, ang panahon sa daghang mga pagsulay (Markos 14:17; Juan 9:4; 13:30).

“Manabok kita sa lanaw”. Dili lamang kay ang gipasabot mao ang laing tampi sa lanaw, kondili ang usa ka mahinungdanong pagtabok o paglawig ngadto sa laing matang sa kinabuhi. Susama sa mahitabo sa usa ka tawo nga anaa sa ubos sa landong sa iyang katapusang gutlo sa kinabuhi niining kalibutana — ang iyang paglawig gikan niining kanabuhia ngadto sa sunod. Alang niadtong nakapangandam na mao kini ang “Adlaw sa Dios” — nga ang tanang mga nangaging adlaw maoy usa ka dakong pagpangandam. 37Unya mihuros ang kusog nga hangin ug hisab-wan ang sakayan sa balod ug hapit mapuno sa tubig ang sakayan.

Usa ka makusog nga bagyo. Bisan gani hangtod karong panahona anaay daghang kalit nga bagyo sa maong lanaw kansang makusog nga hangin nagagikan sa Golan Heights. Si Pedro sa iyang pagkamananagat nasayod kaayo sa kapeligro ug kabangis ang mga balod kon adunay kusog nga unos nga motadlas sa maong dapit. Apan ang unos nga gikahadlokan dili laman ang mahitabo sa lanaw o sa dagat. Labaw pa niini, gikahadlokan sa tanan ang unos sa kinabuhi nga mao ang “mga pagsulay nga sa kalit moabot sa atong kinabuhi.” Sa Bibliya, ang bangis nga unos maoy simbolo sa gahum nga iya sa yawa (tan-awa sa Isaias 27:1; Salmo 74:13; Job 9:13; Daniel 7; Gipadayag ulohan 12 ug 13).

38aApan natulog si Jesus nga nag-unlan didto dapit sa ulin.

Makapaninumdum kini sa laing panghitabo sa bibliya diin si Jonas gipukaw sa iyang mga kauban gikan sa paghikatulog samtang naglawig ang ilang gisakyan sa kadagatan (Jonas 1:3, 16). May kadugtungan kini sa gipasabot ni Jesus kabahin sa “timaan ni Jonas” aron sa pagpatataw nga walay laing timaan nga iyang ihatag kondili mao lamang gayod ang iyang Kamatayon ug Pagkabanhaw (Mateo 12:39-40; Lukas 11:29-30; Markos 8:12-13). 38bGipukaw siya sa mga tinun-an nga nag-ingon, "Magtutudlo, wala ka ba mabalaka nga hapit na man kita malunod?"

Usa kini ka maanindot nga pangaliya nga maahimong atong himoon sa mga panahon nga anaa kita sa mga pagsulay. 39Mibangon si Jesus ug iyang gipahunong ang hangin, ug ang mga balod iyang giingnan, "Hunong!" Ug mihunong ang hangin ug mibanos ang kalinaw. Ang orihinal nga pulong sa “mibangon” mao ang Griego nga diegertheis nga kasagaran nagkahulogan og “pagkabanhaw” (Markos 5:41;16:6-14). Pamahunong ni Cristo ang kamatayon pinaagi sa iyang mahimayaong Pagkabanhaw. 40Unya miingon si Jesus kanila, "Nganong nalisang man kamo? Wala ba kamoy pagsalig?"

Dili lamang kini usa ka pangutana, kondili usa ka seryosong akusasyon: ang ilang pagkakulang sa pagtuo! Nahitabo pag-usab kini sa panahon sa pagpasakit ug kamatayon ni Jesus sa krus. Ang mga apostoles nangalisang, nagpalayo ug mibiya kang Jesus. Unsa may akong mga kalisang nga makapalayo sa akong kaugalingon sa Dios? 41Apan nalisang sila ug nagpangutan-anay, "Kinsa man kining tawhana nga bisan gani ang hangin ug ang mga balod motuman man kaniya?" Niining higayona, miabot sa kasabutan sa mga Apostoles ang mahinungdanong pagpangutana kon kinsa man kini si Jesus. Usa ba lamang siya ka “magtutudlo” sama sa uban o kaha labaw pa kay niana. Kinsa man si Jesus alang kanimo?