EBANGHELYO (Lukas 4:21 -30)

21Unya miingon si Jesus kanila, "Kining bahina sa Kasulatan natuman karong adlawa, ingon sa inyong nadungog nga gibasa." 22Nakadayeg kaniya silang tanan, ug nahibulong sa mga matahom pulong nga iyang gisulti. Miingon sila, 'Dili ba kini siya ang anak ni Jose?” 23Miingon siya kanila, "Sa walay duhaduha inyong isulti kanako ang giingon sa sanglitanan, ‘Doktor, tambali ang imong kaugalingon.' Kamo usab moingon kanako, 'Himoa dinhi sa imong kaugalingong lungsod ang mga butang nga imong gihimo didto sa Capernaum, sumala sa gitaho kanamo.' 24Apan sultihan ko kamo niini, ang usa ka propeta dili gayod dawaton sa iyang kaugalingong lungsod. 25Pamati kamo kanako: tinuod nga daghang mga biyuda didto sa Israel sa panahon ni Elias, sa dihang walay ulan sulod sa tulo ka tuig ug tunga ug may dakong gutom sa tibuok yuta. 26Apan wala ipadala si Elias ngadto sa bisan usa kanila, kondili ngadto hinoon sa biyuda sa Sarepta sa kayutaan sa Sidon . 27Ug may daghan usab nga sanlahon dinhi sa Israel sa panahon ni propeta Eliseo, apan walay bisan usa kanila nga naayo gawas kang Naaman, ang taga-Siria.” 28Sa ilang pagkadungog niini, nangasuko pag-ayo ang tanan nga didto sa sinagoga. 29Nanindog sila ug ilang gitaral si Jesus ngadto sa gawas sa lungsod ug gidala ngadto sa tumoy sa bungtod diin natukod ang ilang lungsod, aron ihulog siya sa pangpang. 30Apan miagi siya sa taliwala sa katawhan ug mipahilayo. Ang Ebanghelyo sa Ginoo.

KAHULOGAN SA EBANGHELYO (Lukas 4:21 -30)

21Unya miingon si Jesus kanila, "Kining bahina sa Kasulatan natuman karong adlawa…

Mao kini ang katapusang bahin sa unang pagwali ni Jesus sulod sa sinagoga sa iyang kaugalingong balangay sa Nasaret. Gibasi kini sa basahon ni propeta Isaias (Isaias 61:1-2). Si Jesus milatid sa programa nga iyang himoon: “pagsangyaw sa Maayong Balita ngadto sa mga kabus, pagsangyaw sa kagawasan sa mga binihag, pagpahiuli sa panan-aw sa mga buta, pagpagawas sa mga dinaugdaug, ug pagpahibalo sa tuig nga ang Ginoo moluwas sa iyang katawhan” (Lukas 4:18-19).

22aNakadayeg kaniya silang tanan, ug nahibulong sa mga matahom pulong nga iyang gisulti. Si Jesus mianhi aron sa paghatag sa “mensahe sa grasya” o usa ka “walay bayad nga gasa”. Una pa ikasaysay ni Pablo ang teolohiya kabahin sa “grasya” sa iyang sulat ngadto sa mga taga-Roma (Roma 5:20 ), si Lukas mihisgot na bahin niini sa iyang sinulat nga ebanghelyo. 22bMiingon sila, 'Dili ba kini siya ang anak ni Jose?” Bisan pa kon ang mga tawo nakadayeg ug nahibulong sa matahom pulong nga gisulti ni Jesus ngadto kanila, apan dili sila makadawat kaniya. Ania dinhi ang gitawag og “ang eskandalo sa iyang labihang pagkayano nga pagkatawo” (the scandal of his too ordinary humanity). Dili ba anak lamang siya ni Jose!

Ang Simbahan makanunayong nakasinati niining maong eskandalo. Daghang mga tawo nga andam nga motuo sa mensahe sa giwali sa Simbahan, apan dili sila makadawat sa iyang mga kahuyangan ug kakulangan. Adunay dili makadawat sa iyang pamaagi sa pagtigum ug paggasto sa iyang pundo, sa pamaagi sa pagdumala, sa mga kaluya tungod sa karaang sistema, sa mga gisagop nga kabag-ohan, sa mga kasaypanan ug sa kakulang sa mga panabot sa mga nagdumala niini, sa dakong gintang tali sa unsay giwali ug unsay gibuhat, ug daghan pa. Dili kahudtan ang listahan sa mga tawhanong aspeto sa Simbahan isip institusyon. Daghan ang miisip niini nga dakong babag sa pagdawat sa mensahe. 23Miingon siya kanila, "Sa walay duhaduha inyong isulti kanako… ‘Doktor, tambali ang imong kaugalingon.' Kamo usab moingon kanako, 'Himoa dinhi sa imong kaugalingong lungsod ang… imong gihimo didto sa Capernaum ...

Tungod sa kakulang sa ilang pagtuo, ang mga katawhan sa Nasaret mitintal kang Jesus sa pagbuhat og mga katingalahang timaan. Buot nila nga palabwan pa ni Jesus ang mga katingalahang gipakita niya didto sa mga silinganang dapit. Usa ka dakong tentasyon. Si Satanas nangayo niini (Lukas 4:1-14). Ang panon sa mga katawhan nangayog mga timaan gikan sa langit (Lukas 11:16 ). Aduna bay mga higayon nga ang atong pagtuo anaa ra nagsalig sa mga timaan o milagro nga atong gipangayo sa Dios? Kon walay milagro dili usab mutuo!

24… ang usa ka propeta dili gayod dawaton sa iyang kaugalingong lungsod.

Dili masayon ang pagkapropeta. Daghang higayon nga ang mensahe sa Ginoo lisod pagadawaton. Gumikan niini daghang mga propeta ang gipatay: “ Jerusalem , Jerusalem , gipatay mo ang mga propeta” (Mateo 23:37 ). Ang pulong nga propeta nagagikan sa Griego nga “prophemi” nga nagkahulogan og “Misulti ako sa ngalan ni…….” (I speak in behalf of; I speak for).

25… tinuod nga daghang mga biyuda didto sa Israel sa panahon ni Elias… 26Apan wala ipadala si Elias ngadto sa bisan usa kanila, kondili ngadto hinoon sa biyuda sa Sarepta sa kayutaan sa Sidon. Si Lukas lamang (tingali tungod sa iyang pagka-tinun-an ni Pablo, ang Apostoles sa mga Kanasuran) ang mihatag og dakong pagtagad kabahin sa kamatuoran nga ang Dios nagpanalangin usab ngadto sa mga tawo nga dili Judio. Ang nahitabo sa Nasaret nagtug-an nga ang kaluwasan dili lamang sa pipila ka mga piniling tawo, kondili alang gayod sa tanan. Ang Dios buot moluwas sa tanan. Ang Dios nahigugma dili lamang kanato rang mga Kristiyanos, kondili bisan kadto usab nga dili mga kristiyanos.

Ang anak ni Jose dili malimitahan kutob lamang sa iyang gamayng puloy-anan sa Nasaret, si Jesus adunay gahom nga makahikap sa tanan uban sa iyang dili ikag-asoy nga grasya. 27Ug may daghan usab nga sanlahon dinhi sa Israel sa panahon ni propeta Eliseo, apan walay bisan usa kanila nga naayo gawas kang Naaman, ang taga-Siria.” Kon itandi ang mga Judio ug mga Hentil, ang mga Hentil gihatagan ni Jesus og pribilehiyo (Lukas 7:9; 23:47 ; 10:33 ; 17:16 ). 28Sa ilang pagkadungog niini, nangasuko pag-ayo ang tanan nga didto sa sinagoga. 29… ilang gitaral si Jesus ngadto sa gawas sa lungsod… aron ihulog siya sa pangpang. Nahisulat na dinhi ang unsa unyay umaabot nga dangatan ni Jesus. 30Apan miagi siya sa taliwala sa katawhan ug mipahilayo. Walay tawo nga makapugong sa Dios sa pagpadayon sa Iyang kabubut-on!