Sa diha nga molakat na unta si Jesus, may tawo nga midagan ngadto kaniya, miluhod sa iyang atubangan, ug nangutana, "Maayong Magtutudlo, unsa may kinahanglan kong buhaton aron madawat ko ang kinabuhing dayon?" 18Nangutana si Jesus kaniya, “Nganong miingon ka man nga ako maayo? Walay maayo gawas sa Dios. 19Nahibalo ka sa mga sugo: 'Ayaw pagpatay; ayaw panapaw; ayaw pangawat; ayaw pamakak; ayaw panlimbong; tahora ang imong amahan ug inahan.'” 20Mitubag ang tawo, "Magtutudlo, nagtuman ako niining tanang sugo sukad pa sa akong pagkabatan-on." 21Mahigugmaon si Jesus nga mitutok kaniya ug namulong, " Usa ra ka butang ang kinahanglan mong buhaton. Lakat ug ibaligya ang tanan mong katigayonan ug ihatag ang halin ngadto sa mga kabus, ug maangkon mo ang mga bahandi sa langit; unya balik nganhi ug sunod kanako." 22Sa pagkadungog sa tawo niini, naguol siya ug masulob-ong mibiya kang Jesus, tungod kay dato man siya kaayo. 23Milingi-lingi si Jesus sa iyang mga tinun-an ug miingon kanila, "Pagkalisod gayod sa mga dato ang pagsulod sa Gingharian sa Dios!" 24Nakugang ang mga tinun-an sa pagkabati nila niini, apan mipadayon si Jesus pagsulti, "Mga anak, pagkalisod gayod ang pagsulod sa Gingharian sa Dios! 25Mas lisod pa sa usa ka dato ang pagsulod sa Gingharian sa Dios, kay sa usa ka kamelyo paglusot sa lungag sa dagom." 26Nahibulong pag-ayo niini ang mga tinun-an ug nagpangutan-anay, "Kon mao kana, kinsa ra man diay ang maluwas?" 27Mitutok si Jesus kanila ug mitubag, "Dili kini mahimo sa tawo, apan mahimo sa Dios; kay ang tanan mahimo gayod sa Dios." Ang Ebanghelyo sa Ginoo.

KAHULOGAN SA EBANGHELYO (Markos 10:17 -27—Minubo)

17Sa diha nga molakat na unta si Jesus, may tawo nga midagan ngadto kaniya, miluhod sa iyang atubangan, ug nangutana, "Maayong Magtutudlo, unsa may kinahanglan kong buhaton aron madawat ko ang kinabuhing dayon?" Usa ka tawo nga puno sa mga tinguha: midagan, miluhod atubangan kang Jesus ug, sa kahangak, nangutana. Sumala sa gisaysay, masayran nato kon kinsa kini siya. Anaa kaniya ang tanan nga makalipay niining kalibutana: ang pagkadato, ang pagkabuotan (kay nagtuman man siya sa tanang sugo sukad pa sa iyang pagkabatan-on). Unsa may iya pang buot angkonon? 18Nangutana si Jesus kaniya, “Nganong miingon ka man nga ako maayo? Walay maayo gawas sa Dios.

Nakapakurat ang gipamulong ni Jesus sa batan-on. Tungod kay iyang nakaplagan nga si Jesus wala magkinahanglan og titulo. Ang mga tinun-an ni Jesus motawag kaniya og “Magtutudlo” lamang. Apan kining tawhana mipuno niini pinaagi sa pulong “maayo”. Si Jesus wala magkinahanglan nianang dugang pa nga titulo. “Walay maayo gawas sa Dios,” pulong pa ni Jesus. 19Nahibalo ka sa mga sugo: 'Ayaw pagpatay; ayaw panapaw; ayaw pangawat; ayaw pamakak; ayaw panlimbong; tahora ang imong amahan ug inahan.'” Ang mga sugo nga giasoy ni Jesus wala mag-apil sa mga kasugoan bahin sa paghigugma sa Dios. Kasagaran nato ang atong unahon kon maghisgot na gani og sugo sa Dios mao gayod ang may kalabutan sa atong paghigugma sa Dios. Apan si Jesus mitutok hinoon sa sugo nga may kalambigitan sa atong relasyon sa mga isigkatawo.

Ug ang ika-upat nga sugo, ang pagtahod sa mga ginikanan, naulahi kay sa ubang sugo nga may kalabutan sa paghigugma sa isigkatawo. Daw gituyo ni Jesus ang paglaray sa mga sugo nga dali rang matental ang mga dato: pagpatay, panapaw, pangawat, pamakak, panlimbong. Kay aduna may gayoy nadato sa mga paagi nga dili makia-ngayon. 20Mitubag ang tawo, "Magtutudlo, nagtuman ako niining tanang sugo sukad pa sa akong pagkabatan-on." Ang pagtuman sa sugo mao ang labing sentro sa relihiyon sa mga Hudio. Busa kon kining tawhana nagtuman sa tanang mga sugo sukad pa sa iyang pagkabatan-on siya, sa walay duda, angayan gayod nga “makadawat sa kinabuhing dayon”. Ug si Jesus nagtuo nga kini matuod gayod nga iyang gihimo. Apan pamalandungi ang mosunod nga panghitabo... 21aMahigugmaon si Jesus nga mitutok kaniya... Ang mga mata ni Jesus! Mitutok nga mahigugmaon! Sa ato pa, natandog si Jesus sa kahimtang niining batan-on. 21 ….ug namulong, " Usa ra ka butang ang kinahanglan mong buhaton. Lakat ug ibaligya ang tanan mong katigayonan ug ihatag ang halin ngadto sa mga kabus, ug maangkon mo ang mga bahandi sa langit; unya balik nganhi ug sunod kanako."

Sa unahan daw ang tanang sugo iya nang natuman. Apan aniay gidugang ni Jesus nga maoy makapadayag sa tinuod nga kahimtang sa maong tawo. Sa laing sugo—Lakat ug ibaligya ang tanan mong katigayonan ug ihatag ang halin ngadto sa mga kabus, ug maangkon mo ang mga bahandi sa langit; unya balik nganhi ug sunod kanako—dinhi masayran kon kining tawhana anaa ba sa kagawasan o sa kaulipnan. Taliwala sa iyang kadato nagpabilin ba siya nga gawasnon o kaha naulipon ba siya sa iyang mga katigayonan? Pagka-radikal sa gipangayo ni Jesus gikan niadtong buot makaangkon sa kinabuhing dayon. Basaha ang Markos 1:18-19; Markos 6:8; ug Markos 8:34 ug dinhi masayran nato nga kinahanglan itugyan ang tanan (give all) kon kita buot gayod nga makaangkon sa kinabuhing dayon. 22Sa pagkadungog sa tawo niini, naguol siya ug masulob-ong mibiya kang Jesus, tungod kay dato man siya kaayo. Dili nato ikondenar kining tawhana! Susama lamang siya kanato. Dili ba buot usab kita sa hingpit nga kinabuhi, ang kinabuhing walay katapusan, apan dili kita buot nga mobayad sa tinuod nga presyo alang niini? Ang kahimtang niining maong tawo atong kaugalingong kahimtang! Ang kasubo niining tawhana makahuloganon kaayo: dato siya kaayo, apan bisan pa sa iyang nakubtang katigayonang yutan-on dili pa gihapon siya malipayon. Sa atong kaugalingon unsa man kaha ang atong kanunayng gipangita niining kalibutana? Mga butang ba lamang nga lumalabay? Giapil ba nato usab ang pagpangita sa kinabuhing dayon?

23Milingi-lingi si Jesus sa iyang mga tinun-an ug miingon kanila, "Pagkalisod gayod sa mga dato ang pagsulod sa Gingharian sa Dios!" Milingilingi si Jesus, dili lamang ngadto sa iyang mga tinun-an, kondili sa matag usa kanato. Gipangita kita kaniya aron iyang ikatug-an kanato ang kamatuoran: nga dili sayon ang pagsulod sa kinabuhing dayon! 24… “Mga anak, pagkalisod gayod ang pagsulod sa Gingharian sa Dios! 25Mas lisod pa sa usa ka dato ang pagsulod sa Gingharian sa Dios, kay sa usa ka kamelyo paglusot sa lungag sa dagom." Adunay duha ka katigayonan: yutan-on ug langitnon. Hain man ang atong pillion? Pangayoon nato ang grasya nga makapili kita sa katigayonan nga molungtad hangtud sa kahangturan!