38Si Juan miingon kang Jesus, “Magtutudlo, nakakita kamig tawo nga naghingilin og mga yawa sa imong ngalan, ug sanglit dili man siya kauban nato, gibadlong namo siya.” 39Si Jesus mitubag, “Ayaw ninyo siya pagdid-i, kay walay tawo nga maghimog milagro sa akong ngalan nga makasultig dautan bahin kanako. 40Kay ang dili batok kanato dapig kanato. 41Timan-i ninyo kini; ang mopainom kaninyog tubig kay kamo iya nako, makadawat gayod og ganti. 42Ug mahitungod niining mga bata nga nagtuo kanako—maayo pa sa usa ka tawo nga higtan og usa ka dakong galingang bato ang iyang liog ug itambog siya sa dagat, kay sa makaangin siya sa usa kanila nga mahimulag kanako. 43Busa kon ang usa mo ka kamut makapahimulag kanimo gikan kanako, putla kini! 44Mas maayo pa kanimo nga mosulod ka sa kinabuhi nga usa ray kamot, kay sa sangkap kag kamot apan mahiadto ka sa impiyerno—ngadto sa kalayo nga walay pagkapalong. 45Kon ang usa mo ka tiil maoy makapahimulag kanimo gikan kanako, putla usab kini! 46Mas maayo pa kanimo nga mosulod ka sa kinabuhi nga usa ray tiil, kay sa sangkap kag tiil apan itambog ka sa impiyerno. 47Ug kon ang usa mo ka mata maoy makapahimulag kanimo gikan kanako, lugita kini! Mas maayo pa kanimo nga mosulod ka sa Gingharian sa Dios nga usa ray mata, kay sa sangkap kag mata apan itambog sa impiyerno; 48didto dili mamatay ang ilang mga ulod ug dili mapalong ang kalayo.” Ang Ebanghelyo sa Ginoo.

KAHULOGAN SA EBANGHELYO (Markos 9:38 -43, 45, 47-48)

38aSi Juan miingon kang Jesus, “Magtutudlo, nakakita kamig tawo nga naghingilin og mga yawa sa imong ngalan... Si Juan nga naghulagway sa iyang kaugalingon isip “tinun-an nga gihigugma ni Jesus” (Juan 21:20 ). Sa napulog duha ka mga Apostoles, siya mao ang labing nakasabot ni Jesus, ug labing suod kaniya. Si Juan nakahibalag og usa tawo nga naghingilin og mga yawa nga dili sakop sa ilang pundok. Tungod niini adunay kabalaka si Juan kay kon kahinumduman dihay mga higayon nga napakyas ang mga Apostoles sa paghingilin sa mga yawa (Markos 9:18 ).

Ang mga “yawa” sa atong panahon karon hilabihan sa kadaghan: sama pananglitan sa kakulang sa pagsunod sa moralidad, ang walay pagtahod sa kabililhon sa kinabuhi, ang makauulaw nga pagpahimulos sa mga kahuyangan labi na niadtong mga tawo nga dili makapanalipod sa ilang kaugalingon, ang pagtamay sa uban tungod sa ilang ubos nga kahimtang, ang dili makatarunganon nga pag-apod-apod sa mga katigayonan, ang walay pag-ila sa Dios, ug ang pagpakadios sa kalibutanong dungog, bahandi, ug gahum. Makit-an nato nga adunay mga tawo nga buot mobuntog nii-ning “mga yawa” nga tingali wala mahiuban sa atong naandang pundok. Usahay makapangutana kita bahin kanila! 38bug sanglit dili man siya kauban nato, gibadlong namo siya.”

Bisan diay sa relihiyon adunay daghang pagbahinbahin. Tungod kay ang ilang tinuohan lahi kay sa ato, busa anaay atong pagduda. Dili na nato sila paminawon. Usa ka mahinungdanong pangutana labi sa atong panahon karon mao: Ang makaluwas nga gahum ni Cristo anaa ra ba diay sa atong pundok? Anaa ra ba kini sa unsay makita diha sulod sa atong simbahan? Unsa kahay tubag ni Cristo? 39Si Jesus mitubag, “Ayaw ninyo siya pagdid-i, kay walay tawo nga maghimog milagro sa akong ngalan nga makasultig dautan bahin kanako. 40Kay ang dili batok kanato dapig kanato. Dili. Ang Espiritu sa Dios dili kapugngan sa iyang balaang buhat! Ang Espiritu sa Dios mohuyop sa iyang kaugalingon sama sa hangin nga dili nato mahibaloan. “Ang hangin mohuros bisan asa kini buot mopadulong; madungog mo ang paghuros niini, apan wala ka mahibalo diin kini gikan o asa kini padulong. Ingon usab niini ang tanan nga matawo pinaagi sa Espiritu” (Juan 3:8).

Angay natong hinumduman ang unang gipamulong ni Santo Papa Juan Pablo II: “Ayaw kahadlok! Buksi ang imong mga kahigayonan!” Anaa pa ba ang atong mga pagkondinar sa mga tawo nga wala mosagop sa atong gituohan? Sa mga tawo nga laing hunahuna kay sa atoa? Makadawat ba kita nga bisan diay kadtong mga kaaway nato naghupot usab og kamatuoran, aduna usay nindot nga nahimo, ug nakasinati usab og kadaugan? 41Timan-i ninyo kini; ang mopainom kaninyog tubig kay kamo iya nako, makadawat gayod og ganti.”

Ang usa ka baso nga tubig daw hilabihan sa ka dyutay, daw walay dakong bili. Usa kini ka pagtimaan nga ang kinagamyang kaayo dako diay atubangan sa tinubdan sa kaayo nga mao ang Dios. Mao kini ang dignidad sa usa ka matuod nga Kristohanon—nga bisan unsa ka gamay ang iyang kahimtang, siya gipanag-iya kang Cristo. “Sultihan ko kamo nga sa matag higayon nga maghimo kamo niini alang sa usa sa labing ubos niining akong mga igsoon, gihimo ninyo kini alang kanako” (Mateo 25:40). 42“Ug mahitungod niining mga bata nga nagtuo kanako—maayo pa sa usa ka tawo nga higtan og usa ka dakong galingang bato ang iyang liog ug itambog siya sa dagat, kay sa makaangin siya sa usa kanila nga mahimulag kanako. Nagpahinumdum usab kini kanato nga dili unta gayod kita maoy hinungdan sa pagpahimulag sa uban. Ang paghatag og maayong panag-ingnan, matud pa, maoy dakong gikinahanglan sa mga katawhan sa atong panahon karon.

Dili unta kita maoy hinungdan nga mahimong “yawan-on” ang uban. Ug dili gayod unta nato agakon ang uban ngadto sa mga salawayon o kahiwian. 44Mas maayo pa kanimo nga mosulod ka sa kinabuhi nga usa ray kamot, kay sa sangkap kag kamot apan mahiadto ka sa impiyerno—ngadto sa kalayo nga walay pagkapalong... 46Mas maayo pa kanimo nga mosulod ka sa kinabuhi nga usa ray tiil, kay sa sangkap kag tiil apan itambog ka sa impiyerno... 47bMas maayo pa kanimo nga mosulod ka sa Gingharian sa Dios nga usa ray mata, kay sa sangkap kag mata apan itambog sa impiyerno... Pagkamakalilisang gayod diay ang sala. Ang pagpasulod sa kaugalingon ngadto sa kalipay sa langit dili sayon. Gani man nagkinahanglan og dakong sakripisyo! Anaa ba kitay kaisog sa pagsakripisyo aron lamang kita makaabot sa Gingharian sa Langit?