EBANGHELYO (Lukas 6:27 -38)

27Si Jesus miingon sa iyang mga tinun-an: "Sultihan ko kamo nga namati kanako: Higugmaa ninyo ang inyong mga kaaway ug buhata ang maayo alang niadtong nagdumot kaninyo. 28Panalangini ang manghimaraot kaninyo ug pag-ampo kamo alang sa nagdaugdaog kaninyo. 29Kon may mosagpa sa inyong aping, ipasagpa usab ang pikas; ug kon adunay moagaw sa inyong kamisadentro, ihatag usab ang inyong kamisin. 30Hatagi ninyo ang tanan nga mangayo, ug kon may mokuha sa inyong butang, ayaw na kinig bawia. 31Buhata ngadto sa mga tawo ang gusto ninyo nga buhaton nila nganha kaninyo. 32"Kon mao ray higugmaon ninyo sila nga nahigugma kaninyo, nganong magpaabot pa kamog panalangin? Bisan gani ang mga makasasala nahigugma man niadtong nahigugma kanila! 33Ug kon mao ray buhatan ninyog maayo kadtong nagbuhat kaninyog maayo, nganong magpaabot man kamog panalangin? Bisan gani ang mga makasasala nagbuhat man niana! 34Ug kon mao ray inyong pahulamon kadtong inyong gituohan nga makabayad, nganong magpaabot man kamog panalangin? Bisan gani ang mga makasasala magpahulam man ngadto sa mga makasasala ug magpaabot sila nga bayran! 35Higugmaa hinoon ninyo ang inyong mga kaaway ug buhata ang maayo ngadto kanila; pahulama sila sa walay pagpa-abot nga bayran pa, kay sa ingon niini dako ang ganti nga inyong madawat ug kamo mahimong mga anak sa Labing Halangdong Dios. Kay siya maayo ngadto sa mga dili mapasalamaton ingon man sa mga daotan. 36Busa pagmaluluy-on kamo, ingon nga maluluy-on ang inyong Amahan.”37"Ayaw kamo paghukom sa inyong isigkatawo, ug ang Dios dili maghukom kaninyo; ayaw sila pakasad-a, ug kamo dili pakasad-on sa Dios; pasayloa sila, ug ang Dios mopasaylo usab kaninyo. 38Panghatag kamo sa uban, ug ang Dios mohatag usab kaninyo: madawat ninyo ang hustong takos, ug pakapinan pa gayod, ibubo sa inyong mga kamut kutob sa inyong mahakgom. Ang taksanan nga inyong gamiton alang sa uban mao usab ang taksanan nga gamiton sa Dios alang kaninyo." Ang Ebanghelyo sa Ginoo.

KAHULOGAN SA EBANGHELYO (Lukas 6:27 -38)

27Si Jesus miingon… "Sultihan ko kamo nga namati kanako: Higugmaa ninyo ang inyong mga kaaway ug buhata ang maayo alang niadtong nagdumot kaninyo. 28Panalangini ang manghimaraot kaninyo ug pag-ampo kamo alang sa nagdaugdaog kaninyo. Ang tanan nga “bag-o” diha sa Ebanghelyo gisuhid niining maong mga kasugoan nga gibatbat ni Jesus nagdto sa mga tawo nga mamati kaniya. Ang kinaiya sa Kristohanong kalagdaan kon ethics dili lamang mao ang “gugma” — tungod kay ang tanang tawhanong kalagdaan nagsugo man niini — kondili “ang paghigugma sa mga kaaway”. Ang Kristohanong gugma maoy gugma nga walay gipinig o universal love (Mateo 5:43 -48).

Ang pulong “Kaaway”, sumala sa gitudlo ni Jesus, nagalakip niadtong wala modapig kanato, kadtong nagsaway kanato, kadtong nanghimaraot kanato, kadtong nagbutangbutang kanato, kadtong wala nato angayi o atong gilikayan, ug uban pa nga susama niini. Busa dili diay matinud-anon ang pag-ingon “wala akoy kaaway”. Sa dili pa nato ipadayon, maayo tingali nga atong susihon kon kinsa man kining mga tawhana nga akong mga kaaway. Nahiapil ba sila sa akong paghigugma? Pag-ampo?

29Kon may mosagpa sa inyong aping, ipasagpa usab ang pikas; ug kon adunay moagaw sa inyong kamisadentro, ihatag usab ang inyong kamisin. 30Hatagi ninyo ang tanan nga mangayo, ug kon may mokuha sa inyong butang, ayaw na kinig bawia. Kining sugoa dili kay sugton lamang diha sa hunahuna ug kasingkasing. Kinahanglan nga tumanon kini pinaagi sa mga konreto nga mga aksyon. Apan ang gisulat nga matud pa maoy gisulti ni Jesus dili gayod pagasabton sa literal nga pagsabot. Ang gipasabot ni Jesus niini mao kini: nga ang angay ibalos ngadto sa mga dautan dili ang panimalos nga dinautan kondili sa paghimo og minaayo ngadto sa mga naghimog dautan.

Ug kini maoy gipakita ni Jesus sa dihang gitugyan siya ngadto sa hukmanan diin siya atubangan sa punuang-pari giigo ang iyang nawong sa usa ka laparo(Juan 18:23 ). 31Buhata ngadto sa mga tawo ang gusto ninyo nga buhaton nila nganha kaninyo. Mao kini ang naila na pag-ayo nga “the Golden Rule”. Usa kini ka labing uyokan sa tanang listahan sa maayong kalagdaan o codes of ethics. Matod pa ni Rabbi Hillel, “Unsay wala nimo angayi, ayaw himoa ngadto sa imong isigkatawo.” Ang mga Stoic nga manggialamon usab miingon, “Unsay dili nimo gusto nga himoon sa uban nganha kanimo, ayaw usab buhata ngadto kang bisan kinsa.” Apan si Jesus mihimo niining sugoa nga positibo diha sa iyang pag-ingon, “Buhata ngadto sa mga tawo ang gusto ninyo nga buhaton nila nganha kaninyo” (Lukas 6:31 ).

32"Kon mao ray higugmaon ninyo sila nga nahigugma kaninyo… 33Ug kon mao ray buhatan ninyog maayo kadtong nagbuhat kaninyog maayo… 34Ug kon mao ray inyong pahulamon kadtong inyong gituohan nga makabayad, nganong magpaabot man kamog panalangin? Bisan gani ang mga makasasala magpahulam man ngadto sa mga makasasala ug magpaabot sila nga bayran! 35aHigugmaa hinoon ninyo ang inyong mga kaaway ug buhata ang maayo ngadto kanila… Kitang mga Kristohanon dili gayod makaingon nga mas maayo pa kita kay sa uban. Apan dili usab nato malikayan ang kamatuoran nga si Jesus naghagit kanatong mga Kristyanos nga magpakita og kalainan kay sa uban! Unsa man kini: nga kita makamaong mohigugma bisan niadtong wala mahigugma kanato!

Ang gugmang Kristohanon molabaw pa kay sa gugma sa atong banay, kaysa gugma sa atong mga higala, kaysa gugma sa atong mga kauban. Kining gugmaha wala gayoy gipili ug dili mopili! Sa pinulongang Latin mao kini ang gitawag og Caritas (sa Iningles pa, Charity), nga mao ang gugma nga naglakip sa tanan! 35b...kay sa ingon niini dako ang ganti nga inyong madawat ug kamo mahimong mga anak sa Labing Halangdong Dios...

Kining mga pulonga nagtug-an kanato unsa kalayó ang tawo gikan sa unsay plano sa Dios. Ug mao nga ang tawo nagkinahanglan og kabag-ohan nga nagagikan sa Espiritu sa Dios nga magahikap kaniya gikan sa iyang kahiladman. Hangtud nga miabot si Jesus, ang nahibaloan sa tawo—nga gitudlo gani sa Bibliya—mao kini: nga ang kapintas bayran usab og kapintas. Gisugo gani ang pakig-asdang og mga baalang gubat o holy war batok sa mga kaaway (Deut 7:1-6; 20:10 -18; 25:19; Josue 6:17 ; Numero 21:2; 1 Samuel 15:18 ).

Pagkatulukibon gayod kining mga pulonga: “...dako ang ganti nga inyong madawat ug kamo mahimong mga anak sa Labing Halangdong Dios” alang niadtong nahigugma sa mga kaaway! 36Busa pagmaluluy-on kamo… 37"Ayaw kamo paghukom sa inyong isigkatawo… ayaw sila pakasad-a… pasayloa sila… 38Panghatag kamo sa uban… Ang taksanan nga inyong gamiton alang sa uban mao usab ang taksanan nga gamiton sa Dios alang kaninyo." Si Jesus mipadayag kanato sa kinaiya sa Dios, ang Iyang walay kinutubang kaayo ug kaluoy alang kanatong mga tawo!