advertisement
EDITORIAL

A matter of decision

CARTOON
Opinion
Archived Issues
O P I N I O N

email: joesum@mozcom.com

Ika-Upat nga Domingo sa Adbiyento (C) Disyembre 24, 2006

EBANGHELYO (Lukas 1:39 -45)

39Wala madugay, nangandam si Maria ug midali pag-adto sa kabungtoran, ngadto sa usa ka lungsod sa Judea . 40Miadto siya sa balay ni Zacarias ug nangumosta kang Isabel. 41Sa pagkabati ni Isabel sa pangumosta ni Maria, milihok ang bata sulod sa iyang tiyan. Unya napuno sa Espiritu Santo si Isabel 42ug misulti sa makusog, “Bulahan ka sa tanang mga babaye! Bulahan ang bata nga imong ianak! 43Ngano kaha nga miduaw man kanako ang inahan sa akong Ginoo! 44Kay pagkadungog ko gayod sa imong pangumosta, miulpot sa kalipay ang bata nga akong gisabak. 45Bulahan ka nga mituo nga matuman gayod ang mensahe sa Ginoo kanimo!” Ang Ebanghelyo sa Ginoo.

KAHULOGAN SA EBANGHELYO (Lukas 1:39 -45)

39Wala madugay, nangandam si Maria ug midali pag-adto sa kabungtoran, ngadto sa usa ka lungsod sa Judea. Ang iyang ngalan sa Hebreo Myriam, nga nagkahulogan og “prinsesa” o “birhen”. Ang iyang pagdali pag-adto maoy timaan sa iyang Pagtuo. Iyang gilakaw ang gilay-on nga mokabat og 150 ka mga kilometro. Kining panaw ni Maria maoy timaan sa “panaw” nga himoon sa Pulong sa Dios dinhi sa atong kalibutan. 40Miadto siya sa balay ni Zacarias ug na-ngumosta kang Isabel. Ang dalan nga pagalaktan sa Pulong sa Dios nagsugod sa banay, gikan sa balay ni Maria ngadto sa balay sa iyang ig-agaw nga si Isabel. Mao kini ang kasagarang mahitabo sa proseso sa pagpaambit sa Pagtuo!

Si Zacarias nawad-an sa kahimanan sa paglitok og pulong tungod kay wala man siya motuo. Samtang ang mga babaye mao ang may gahum sa paglitok. Diha kanila una, ang gasa sa pagtuo! Ang pagtimbaya ni Maria kang Isabel ug Zacarias mao ang “shalom”, nga sa ato pa “kalinaw”! Unom ka bulan una pa kini mahitabo, ang managtiayong Zacarias ug Isabel nagmasulob-on: Wala silay anak (Lukas 1:17 ). Nasayod si Maria niini. Miabot siya sa ilang panimalay aron sa pagpahalipay ug pag-ambit sa panalangin sa Dios nga ilang naangkon.

41aSa pagkabati ni Isabel sa pangumosta ni Maria, milihok ang bata sulod sa iyang tiyan.

Milihok sa kalipay! Sa Griego “milukso sa kalipay”. Si San Pablo mipaila kang Lukas nga usa ka mananambal (Colosa 4:4), mao nga interasado siya sa detalye. Dili gayod makalimtan sa matag inahan ang una niyang pagkabati sa “paglihok sa anak sulod sa iyang sabakan”. Sa kang Juan, dili lamang kay kini usa ka naandang panghitabo sa usa ka gisabak nga bata, kondili usa ka dako ug balaang timaan nga ang Presensya sa Dios nga makapatandog sa uban. 41bUnya napuno sa Espiritu Santo si Isabel Alang kang Lukas, ang maong panghitabo usa ka pasiuna sa Adlaw sa Pentekostes. Si Lukas mitan-aw sa “pagkatawo ni Jesus” sumala sa panghitabo sa “pagkatawo sa Simbahan”.

42aug misulti sa makusog…

Ang pulong nga gigamit ni Lukas mao ang usa ka pulong sa Griego nga “anephonesen” nga sa tibuok Bibliya gigamit lamang sa mga basahon sa Cronicas (Chronicles), nga mao ang usa ka liturhikanhong aklamasyon (liturgical acclamation) alang sa pagpasidungog sa Arka sa Kasabutan (Ark of the Covenant). (Anaa kini sa 1 Cronicas 15:38, 16:4, 5, 42; ug 2 Cronicas 5:13). Masabot nato nga ang mga pulong ni Isabel maoy pag-awit sa unsay iya lamang sa Arka sa Kasabutan! 42b“Bulahan ka sa tanang mga babaye! Bulahan ang bata nga imong ianak! Kasagaran sa mga nag-ampo sa Maghimaya ka Maria wala masayod nga ang ilang gilitok nagagikan diay niining bahina sa Ebanghelyo. Gigamit ba nato kining mga pulonga diha sa atong mga pag-ampo. Labi na sa atong pag-ampo sa Santos nga Rosaryo?

Gawas pa, kining mga pulonga kinutlo gikan sa Daang Testamento, gikan sa duha ka mga babaye nga sila si Yael ug Judith (mabasa sa Mga Maghuhukom 5:25; ug sa Judith 13:18). Dinhi si Lukas mipatataw nga ang sekreto nga Laraw sa Ginoo una nga gipadayag ngadto sa mga babaye! 43Ngano kaha nga miduaw man kanako ang inahan sa akong Ginoo! Lain na usab nga kinutlong bersekulo gikan sa Bibliya (2 Samuel 6:9). Naghisgot kini bahin kang David nga wala motuo nga ang Arka sa Kasabutan moabot sa iyang balay. Ang Arka mao ang giilang balaang puloy-anan sa Ginoo. Mipadayag si Jesus (Juan 2:19), nga ang Ginoo mihukom nga dili na mopuyo sa mga dapit nga butang nga gigamit diha sa pagsimba, kondili anha na sa “buhing lawas ni Cristo”.

Kon nangita ikaw og Manluluwas, pangitaa si Jesus una sa tanan sulod sa imong kasingkasing kay Siya buhi nga nakig-uban kanimo! 44Kay pagkadungog ko gayod sa imong pangumosta, miulpot sa kalipay ang bata nga akong gisabak. Ang pulong “miulpot sa kalipay” mao ang mga pulong nga gigamit sa paglarawan sa pagsayaw ni David atubangan sa Arka sa Kasabutan (2 Samuel 6:15-16). Ang pulong “kalipay” nga sa Griego “agalliasis” gigamit lamang sa Salmo (sulod sa 90 ka higayon) ug wala gayod kini gamita sa classical writings nga Griego. Mao kini ang kalipay nga masinati lamang atubangan sa Ginoo. 45Bulahan ka nga mituo nga matuman gayod ang mensahe sa Ginoo kanimo!” Bulahan o Beatitude! Ang una nga gipasidunggan niini mao ang Birhen Maria!

 

1
The Bohol Sunday Post, copyright 2006, All Rights Reserved
For comments & sugestions please email: webmaster@discoverbohol.com
--About Us
--Contact Information
--HOMEpage
Front page news
 
Newsplus
Bohol gets P174M worth of new projects
Loay composer writes 3-MYMP album songs
Around Bohol
LOAY
Loay launches repackaged Sandugo commemoration
INABANGA
Free clinic for the elderly conducted
TALIBON
Talibon holds training on women, kid issues
VOLUME XXI No. 24
Tagbilaran City, Bohol, Philippines
December 24, 2006 issue