1Sa ikanapulog-lima ka tuig kadto sa pagmando ni Emperador Tiberio; Si Poncio Pilato maoy gobernador sa Judea , si Herodes maoy nagmando sa Galilea, ug si Felipe nga iyang igsuon maoy pangulo sa kayutaan sa Iturea ug sa Trakonite; Si Lisanias maoy namunuan sa Abilena, 2ug si Anas ug si Caifas maoy mga pangulong pari. Niini gayong panahona ang pulong sa Dios miabot kang Juan nga anak ni Zacarias didto sa dapit nga awaaw. 3Busa gilukop pagtaak ni Juan ang tibuok kayutaan nga kasikbit sa Suba sa Jordan ug nagwali siya. Siya miingon, "Hinulsoli ug biyai ang inyong mga sala ug pabunyag kamo, ug pasayluon kamo sa Dios." 4Sumala sa nasulat ni propeta Isaias sa iyang basahon: “May nagsinggit didto sa kamingawan: ‘Andama ninyo ang dalan alang sa Ginoo. Hawani ninyo ang iyang agian! 5Abunohi ninyo ang tanang libaong, Pataga ang tanang bungtod ug bukid; Tul-ira ang mga nagliko-likong dalan, Hapsaya ang mga gansalgansalong dalan; 6Ug makita sa tanang tawo ang kaluwasan gikan sa Dios!'" Ang Ebanghelyo sa Ginoo.

KAHULOGAN SA EBANGHELYO (Lukas 3:1-6)

1aSa ikanapulog-lima ka tuig kadto sa pagmando ni Emperador Tiberio…

Si San Lukas mihimog pahibalo kabahin sa ministeryo ni Juan nga Magbubunyag nga, sa iyang kaugalingon maoy usa ka pasiuna sa ministeryo ni Cristo nga gisaysay sa Ebanghelyo. Sa pagpahimutang sa nahitabo sa “ikanapulog-lima ka tuig…” dinhi gipasabot sa maong paghulagway nga adunay gihimong interbensyon o pagpatiwalá sa Dios sa kasaysayan sa kalibutan. Ang buluhaton sa Ginoo dili gawas sa kalibutan, kondili ang maong mga panggibuhaton anaa mahitabo sulod sa kasaysayan sa kalibutan. Ang Balaang Kasaysayan o “Sacred History” mopatim-aw taliwala sa mga kalihokan o panghitabo sa kalibutan. Ato bang gidawat ang kamatuoran nga ang Dios mamulong ug molihok taliwala sa atong mga kahimtang ug situwasyon, sama sa ekonomiya, politikal, sosyal ug cultural?

1bSi Poncio Pilato maoy gobernador sa Judea …

Si Poncio Pilato maoy usa ka tawo, ug ang lain mao ang Birhen Maria, nga nahiapil diha sa atong Credo sa Pagtuo (Creed): “… si Jesukristo… gianak ni Maria, nga Birhen… gisakit sa sugo ni Poncio Pilato…”

Ang mga magsusulat naglarawan kang Poncio Pilato nga usa ka tinugyanan gikan sa langyawng pangagamhanan sa Roma nga nagmando isip procurator sa Judea . Gimandoan niya ang mga katawhan sa minangtas nga paagi. Usahay sa atong nahimutangan karon, daghan kitag mga reklamo sa “kalisod sa panahon”. Mao diay usab kini ang nahimutangan ni Cristo. 1c… si Herodes maoy nagmando sa Galilea, ug si Felipe nga iyang igsuon maoy pangulo sa kayutaan sa Iturea ug sa Trakonite; Si Lisanias maoy namunuan sa Abilena… Gihulagaway ni San Lukas ang mga dapit nga maoy sukaranan sa pagministro ni Cristo. Ug kini nagpasabot nga ang mensahe ni Cristo dili lamang alang sa pipila ka mga tawo kondili alang sa tanan.

Mangutanana kita sa atong kaugalingon: gilimitahan ba nato ang pagpaambit sa mensahe ni Kristo sa mga tawo nga bukas pagdawat na niiini. Ato ba usab nga gipaambitan sa mensahe ni Cristo kadtong nagmakuli o nagdumili sa pagdawat niini?

2aug si Anas ug si Caifas maoy mga pangulong pari.

Human sa mga nagmando sa pangagamhanang politikal, si San Lukas misunod sa pagtaho kabahin sa mga lider sa sektor sa mga relihiyoso niadtong panahona. Sa umaabot nga panahon, kini sila ug si Cristo makasinati og konprontasyon.

2bNiini gayong panahona ang pulong sa Dios miabot kang Juan…

Kadtong mga tawo nga ginganlan sa unahan dili diay mao ang nagdala sa mahinungdanong papel sa kasaysayan niadtong panahona. Aniay mas dako pag papel kay siya mao ang “tigpamábá”, usa ka “propeta”, nga mao si Juan nga Magbunbunyag. Siya mao ang katapusan sa laray sa mga propeta ug unang saksi kang Jesukristo.

2c … didto sa dapit nga awaaw.

Awaaw! Layo sa kusog nga mga kasikas nga kalibutanon, kini mao ang dapit nga atong mapaminaw pag-ayo ang Pulong sa Ginoo. Ang Adbiyento, sama sa awaaw, maoy usa ka kahigayonan sa pagpaminaw sa Pulong sa Ginoo. Apan usahay nalumsan naman hinoon ta sa daghang libang sa pagpangandam sa Pasko. Nawad-an na kita sa kahigayonan sa pagsinati sa “awaaw”. Unsa kahay angay natong buhaton? Pananglitan , ang paghimo og usa ka “spiritual advent recollection”.

3aBusa gilukop pagtaak ni Juan ang tibuok kayutaan nga kasikbit sa Suba sa Jordan ug nagwali siya. Ang Pulong sa Ginoo makapalihok! Human paminawa ang mensahe sa Ginoo didto kamingawan, mitaak si Juan sa mga dapit nga gipuy-an sa mga katawhan aron sa pagwali. Ang pagpaminaw sa Pulong mahinungdanon una pa ang pagwali. Ang pagwali magasukad gayod sa kasinatian sa pagpaminaw diha sa kahilom. Aduna ba akoy kasibot alang sa pagpaminaw ug sa pagpaambit sa Pulong sa Ginoo? 3bSiya miingon, "Hinulsoli ug biyai ang inyong mga sala ug pabunyag kamo, ug pasayluon kamo sa Dios." Pasaylo! Usa ka gasa gikan sa Dios alang sa tanan. Ang pagdawat sa sakramento sa pagkompisal angay gayod nga himoon labi na niining panahon sa Adbiyento. Pamalandongi kining sunod nga mga pulong sa Ebanghelyo:

4… ‘Andama ninyo ang dalan alang sa Ginoo. Hawani ninyo ang iyang agian! 5Abunohi ninyo ang tanang libaong, Pataga ang tanang bungtod ug bukid; Tul-ira ang mga nagliko-likong dalan, Hapsaya ang mga gansalgansalong dalan; 6Ug makita sa tanang tawo ang kaluwasan gikan sa Dios!'" Usa ka panglantaw alang sa kaluwasan sa tanan! Ang tahas sa Ginoo dili ang pagsilot kondili ang pagluwas. Ang Balaang Kasaysayan dili matapos, kondili mosangko sa kaluwasan.