41Samtang naglingkod si Jesus duol sa panudlanan sa Templo, naniid siya sa mga tawo nga nanghulog didto sa ilang mga halad. Daghang dato nga nanghulog ug daghang kuwarta. 42Unya miduol sa hulganan sa halad ang usa ka biyudang kabos ug mihulog og duha ka dako. 43Gitawag ni Jesus ang iyang mga tinun-an ug giingnan, "Labaw pa sa gipanghulog sa uban ang gihulog niining kabos nga biyuda. 44Kay ang uban mihulog sa sobra sa ilang bahandi; apan siya, bisan sa iyang kakabos, mihatag sa tanan nga iya—gihatag niya ang tanan nga iyang gisaligan aron mabuhi." Ang Ebanghelyo sa Ginoo.

KAHULOGAN SA EBANGHELYO (Markos 12:41 -44)

41aSamtang naglingkod si Jesus duol sa panudlanan sa Templo, naniid siya sa mga tawo nga nanghulog didto sa ilang mga halad. Si San Markos matawag kanatog “ usa ka batid nga taggama og talan-awon sa puting tabel” o “expert movie maker”. Angayan nga atong daygon siya sa pagka-detalye sa iyang taho. Gihulagway nga si Jesus anaa nahimutang sa usa ka dapit nga bantaw pag-ayo kay nag-atubang man sa sudlanan sa limos o treasury. Iyang natino sa iyang kaugalingong mga mata ang mga katawhan nga moagi atubangan kaniya. Atong mapanid-an kon unsa gayod ka maaninawon si Jesus. Adunay siyay talagsaong pagsusi sa mga nahitabo sa iyang palibot. Kini ba usab ang nahitabo kanato? Aduna ba kitay igong pagpakabana sa unsay anaa sa atong palibot? Nangilabot ba kita sa atong katilingban?

41bDaghang dato nga nanghulog ug daghang kuwarta.

Sa panahon ni Cristo susama usab sa atong panahon karon, adunay nagkadaiyang matag sa kinabuhing sosyal o social classes nga adunay dakong kalainan sa ilang mga kinitaan. Ang mga nanag-iyag mga dagkong luna sa yuta, mga magpatigayon, mga batid sa Balaod ug mga punuang mga pari mao ang mga adunahan. Nagpuyo sila sa Jerusalem sulod sa ilang mga palasyo uban sa daghang nindot nga mga butang ug tumang kasayon. Aduna silay gipanag-iyang mga swimming pool; mga harden o lapad nga tanaman, ug mga colonnades. Ang ilang mga puloy-anan anaa nahimutang sa nindot nga bahin sa dakbayan. Apan sa laing bahin, ang mga kabos anaa ra intawon sa ubos nga dapit sa dakbayan, nagpiot ang ilang gagmayng mga balay, ug naningkamot adlaw-adlaw aron mabuhi. Kon atong gihatagan og dako nga pagtagad ang Ebanghelyo sumala ni San Markos, ang mga adunahan naghatag usab og dinagko o daghan ngadto sa sudlanan sa templo. Ilang gituman ang ilang katungdanan sa templo diha sa ilang pagkamanggihatagon. Wala si Jesus magsaway kanila. Apan dili usab siya makapugong sa pagtandi kanila sa usa ka kabos nga mihalad usab sa templo.

42aUnya miduol sa hulganan sa halad ang usa ka biyudang kabos

Daw sama nga ang kamera mihimog “close-up shoot” niining biyudang kabos. Makaluluoy ang iyang panagway taliwala sa ubang mga tawo. Dili siya inila ug walay ikapasigarbo. Usa ka babaye taliwala sa daghang mga lalaki. Usa ka biyuda nga wala gani baroganan atubangan sa Balaod. Usa ka kabos nga walay igong pangitaan. Si Jesus naniid pag-ayo kaniya. 42bug mihulog og duha ka dako. Pagkadakong kalainan ang iyang gihatag nga duha ka dako kon itandi sa dakong kantidad gikan sa mga adunahan. 43Gitawag ni Jesus ang iyang mga tinun-an ug giingnan, "Labaw pa sa gipanghulog sa uban ang gihulog niining kabos nga biyuda… Pagkakatingalahang paagi sa pag-ihap! "Labaw pa sa gipanghulog sa uban ang gihulog niining kabos nga biyuda,” miingon si Jesus. Sa iyang komentaryo, ang tibuok katilingban daw nagkaguliyang: Kay alang kaniya dili mahinungdanon kon kinsay anaa sa taas, dungganan, nagsul-ob sa mahalong sapot, inila sa uban, nakabaton og piniling dapit panahon sa mga publikong kasaulogan. Kining tanan dili mahinungdanon ni Cristo!

Unsa may atong gipakadak-an sa atong panan-aw sa kinabuhi? Ato bang gitagad ang mga adunahan lamang ug gililong ang mga kabos? 44a … Kay ang uban mihulog sa sobra sa ilang bahandi; Ang Dios dili madani sa unsa kadako o kadaghan ang atong halad nga makita sa gawas! Ang mahidungdanon mao ang unsay pinitik sa atong mga kasingkasing! Ang biyudang kabos naghatag og labaw kay iyang gihatag ang tanan. Aron atong mahibaloan ang tinuod nga bili sa atong gihatag, dili nato tan-awon kon unsay atong gihatag, kondili unsay nahabilin pa sa atong panudlanan! Mao kini ang tinan-awan sa Dios: Gitan-aw niya ang nahibilin nga anaa pa sa atong panudlanan o gitipigan sulod sa banko.

Sa usa ka dapit nga anaa ang kadato sama sa New York , ang sobra sa pipila lamang ka mga adunahang tawo tingali makapabuhi sa daghang mga tawong kabos nga ania manimuyo sa Pilipinas kon kini ilang ipaambit. 44bapan siya, bisan sa iyang kakabos, mihatag sa tanan nga iya—gihatag niya ang tanan nga iyang gisaligan aron mabuhi." Lahi ang tin-awan ni Cristo! Siya mismo nagpuyo isip usa ka kabos! Si Jesus nakadayeg sa biyudang kabos sa iyang duha ka dako kay ang iyang paghatag kinasingkasing gayod. Sa akong bahin, unsa man usab ang akong paghatag? Kinasingkasing ba? O giubanan ba sa pagbagulbol?

Sa atong panahon karon daw daghang mga tawo nga naglisod sa paghatag o pagpaambit. Adunay kahadlok nga kon kita mohatag, ang atong gihatag mawala gikan kanato. Si San Vicente de Paul miingon: “Maayo alang sa kabos nga adunay daghan pang kabos, tungod kay ang mga kabos mahibalong mohatag bisan pa sa ilang adunay pagkakinahanglanon.” Si Cristo nakasud-ong sa iyang kaugalingon sa biyudang kabos. Sa Iya unyang umaabot nga kasakitan ug kamatayon sa Kruz, Iyang ikahatag ang kinatibuk-an sa iyang kaugalingon ngadto sa uban.