27Unya si Jesus ug ang iyang mga tinun-an miadto sa mga balangay sa Cesarea Filipo. Ug samtang naglakaw sila, iyang gipangutana ang iyang mga tinun-an, “Kinsa man kuno ako, sumala sa mga tawo?” 28 Mitubag sila, “Ang uban miingon nga ikaw mao si Juan nga Magbubunyag, ang uban usab miingon nga ikaw mao si Elias; ug miingon pa gayod ang uban nga ikaw usa sa mga propeta.” 29 “Apan kamo, unsa may inyong ikasulti? Kinsa man ako? Nangutana si Jesus kanila. Ug mitubag si Pedro, “Ikaw mao ang Mesiyas.” 30 Unya gidid-an sila ni Jesus sa pagpanugilon kang bisan kinsa bahin kaniya.

31 Unya gisuginlan ni Jesus and iyang mga tinun-an nga mag-antos pag-ayo ang Anak sa Tawo ug isalikway sa mga puno-an sa mga Judio ingon man sa kadagkoan sa mga pari, ug sa mga magtutudlo sa Balaod. Patyon siya, apan sa ikatulo ka adlaw, mabanhaw. 32Gisulti niya kini sa iyang mga tinun-an sa walay lipodlipod. Tungod niini gipahilayo siya ni Pedro sa uban ug gibadlong. 33 Apan miliso si Jesus ug mitan-aw sa iyang mga tinun-an; unya gibadlong niya si Pedro sa pag-ingon, "Pahawa, Satanas! Ang imong hunahuna, hunahuna sa tawo, dili sa Dios!"

34 Unya gitawag ni Jesus ang katawhan ug ang iyang mga tinun-an, ug miingon siya kanila, "Kon buot ang usa ka tawo mahimo nga akong tinun-an kinahanglan nga kalimtan niya ang iyang kaugalingon, pas-anon niya ang iyang krus, ug mosunod siya kanako. 35 Kay ang buot moluwas sa iyang kaugalingong kinabuhi mawad-an hinuon niini; apan kadtong maghalad sa iyang kinabuhi alang kanako ug sa Maayong Balita, dili mawad-an niini. Ang Ebanghelyo sa Ginoo.

KAHULOGAN SA EBANGHELYO (Markos 8:27 -35)

27a Unya si Jesus ug ang iyang mga tinun-an miadto sa mga balangay sa Cesarea Filipo... Cesarea Filipo. Ang panghitabo gisaysay nga didto mahitabo sa maong dapit. Halayo sa ubang mga tawo, nakig-uban siya sa iyang mga tinun-an. Ug Iya silang gipangutana. 27b “Kinsa man kuno ako, sumala sa mga tawo?” Sa atong panahon karon, adunay daghang mga pakisusi o survey. Mao usab kini ang gihimo ni Jesus. 28 Mitubag sila, “Ang uban miingon nga ikaw mao si Juan nga Magbubunyag, ang uban usab miingon nga ikaw mao si Elias; ug miingon pa gayod ang uban nga ikaw usa sa mga propeta.”

Ang tanang tubag sumala sa mga tawo nagatug-an nga si Jesus usa gayod ka bantugang tawo. Sila miisip kang Jesus nga usa ka tigsulti sa Dios. Bisan gani sa atong panahon karon, walay tawo nga nakatuon sa kasaysayan nga dili moisip kang Jesus nga adunay dakong gikabilin sa kasaysayan sa kalibutan. 29a “Apan kamo, unsa may inyong ikasulti? Kinsa man ako? Nangutana si Jesus kanila. Ang maong pangutana giusab ni Jesus alang kanato. Unsa may gikasulti sa uban bahin ni Jesus? Apan sa atong kaugalingon kita gihagit sa atong pagtuo. Kinsa man siya alang kanimo? 29b Ug mitubag si Pedro, “Ikaw mao ang Mesiyas.” Sa pagtug-an ngadto sa uban kon kinsa siya sumala sa uban dili pa gayod pa-igo. Ginkinhanglan nga sa ato mismong kaugalingon adunay personal nga pagtubag sa “propesyon sa atong pagtuo”!

Si Padro nga maoy pangulo sa mga apostoles mitubag ibabaw pa kay sa unsay giingon sa uban. Ang tiutlo nga “Cristo”, ang Manunubos, adunay bug-at nga kahulogan sa mga Israelitas. Siya mao ang dugay nang gipaabot nga katumanan sa saad sa Dios. Ang tanang mga propeta mitag-an sa iyang pag-abot. Ang kahulogan sa kinabuhi sa tawo anaa kaniya! 30 Unya gidid-an sila ni Jesus sa pagpanugilon kang bisan kinsa bahin kaniya. “Gidid-an”. Mao kini ang gitawag og “Messianic Secret” o sekreto ni Jesus kon kinsa siya (tan-awa sa Markos 1:34 , 1:44 -45, 3:11 , 5:45 , 7:33 -37, 8:26 , 8:30 ).

Wala kini magpasabot nga dili buot ni Jesus nga mahibaloan kon kinsa siya. Hinoon gihatagan og kahigayonan ang uban pang umaabot nga panghitabo nga maoy makatug-an sa insakto kon kinsa siya. Ang mga tawo sa maong panahon dili pa andam sa pagdawat sa kamatuoran kon kinsa si Jesus. Dili usab buot si Jesus nga adunay moabot nga dakong kaguliyang sa mga katawhan. Ang tawo ra ba dali rang mahikurat! Apan lahi ang Dios. Magpahikling lamang siya. Anaa siya sa kahilom. Mitago Siya likod sa iyang mga hinimo! Si San Pablo miingon nga Siya mao “ang misteryo nga tinabunan” (Roma 16:25 ). 31 Unya gisuginlan ni Jesus and iyang mga tinun-an nga mag-antos pag-ayo ang Anak sa Tawo ug isalikway sa mga puno-an sa mga Judio ingon man sa kadagkoan sa mga pari, ug sa mga magtutudlo sa Balaod. Patyon siya, apan sa ikatulo ka adlaw, mabanhaw.

Usa kini ka dakong kabag-ohan sa Ebanghelyo. Sa pagbiya niya sa Galilea, si Jesus mosulod na sa Jerusalem . Nasayod siya nga didto siya pagapatyon. Ang anino sa Krus anaa duol na. Sa tulo ka mga lainlaing saysay si Markos mitaho sa labi pang detalye sa iyang mga pagpasakit (tan-awa sa Markos 8:31 , 9:31 , 10:33 ). 32aGisulti niya kini sa iyang mga tinun-an sa walay lipodlipod. Kini nagpasabot nga sa dakong konbiksyon si Jesus mitug-an kanila sa tanan. Mao kini ang bahin sa “credo” nga gikabungat mismo sa mga ngabil ni Jesus: Ang iyang kasakit, kamatayon ug pagkabanhaw! 32b Tungod niini gipahilayo siya ni Pedro sa uban ug gibadlong. 33 Apan miliso si Jesus ug mitan-aw sa iyang mga tinun-an; unya gibadlong niya si Pedro sa pag-ingon, "Pahawa, Satanas! Ang imong hunahuna, hunahuna sa tawo, dili sa Dios!"

Oo, ang pasidaan ni Jesus kabahin sa “Messianic Secret” makita nato nga aduna gayoy dakong kapuslanan. Mismo si Pedro nga nakatubag kon kinsa si Jesus wala pa gayod diay makasabot sa iya mismong tubag. Si Pedro, sama sa uban, nagpaabot pa diay sa Mesiyas nga madaugon, usa ka politico, ug sumala sa sukdanan sa tawo. Ug sa atong kaugalingon. Dili pa igo nga makalitok kita sa atong gituohan sama sa “credo”. Gikinahanglan gayod nga atong masabtan kini: Nga ang Manunubos nga atong gituohan buot gayod nga madala kita ngadto sa kinabuhing dayon didto sa langit!

34 Unya gitawag ni Jesus ang kataw-han ug ang iyang mga tinun-an, ug miingon siya kanila, "Kon buot ang usa ka tawo mahimo nga akong tinun-an kinahanglan nga kalimtan niya ang iyang kaugalingon, pas-anon niya ang iyang krus, ug mosunod siya kanako. 35 Kay ang buot moluwas sa iyang kaugalingong kinabuhi mawad-an hinuon niini; apan kadtong maghalad sa iyang kinabuhi alang kanako ug sa Maayong Balita, dili mawad-an niini. Uban sa dakong pasalig, si Jesus mitug-an sa Krus alang sa iyang kaugalingon. Usa usab kini ka krus alang sa matag-usa kanato nga iyang mga tinun-an! Nangutana siya, “Alang kanimo, kinsa man ako?”