1Si Jesus mibiya niadtong dapita ug mipauli sa Nazaret nga iyang lungsod, ug mikuyog kaniya ang iyang mga tinun-an. 2Sa Adlawng Igpapahulay miadto siya sa sinagoga ug nagtudlo sa mga tawo. Daghan ang mga tawo didto, ug sa ilang pagkadungog kaniya, nahibulong silang tanan. Busa nangutana sila, “Diin man niya hikat-oni kining tanan? Unsa mang matanga sa kaalam kining nabatonan niya? Ug giunsa man niya paghimog mga milagro? 3Dili ba siya mao man ang panday nga anak ni Maria, ug igsoon nila ni Santiago , ni Jose, ni Judas, ug ni Simon? Dili ba ang iyang mga igsoong babaye ania man dinhi magpuyo?” Tungod niini wala sila motuo kaniya. 4Ug miingon si Jesus kanila, “Ang propeta gitahod sa tanang dapit gawas sa iyang kaugalingong lungsod, sa iyang mga kadugo ug sa iyang banay.” 5Wala siya makahimog milagro didto gawas sa pagtapion sa iyang mga kamot niadtong pipila ka masakiton ug naayo sila. 6Natingala siya pag-ayo nga wala sila motuo. Ang Ebanghelyo sa Ginoo.

KAHULOGAN SA EBANGHELYO (Markos 6:1-6)

1Si Jesus mibiya niadtong dapita ug mipauli sa Nazaret nga iyang lungsod, ug mikuyog kaniya ang iyang mga tinun-an. Si Jesus mibalik sa Nazaret. Kini mao ang dapit nga iyang pinuy-anan. Usa lamang kini ka gamay nga lungsod, layo sa mga mahinungdanong dalan padulong sa ubang mga lungsod ug dakbayan sa Jerusalem . Adunay gibanabana nga usa ka gatos ug kalim-an (150) ka mga banay nga namuyo niadtong panahona. Ilabihan ka yano ang kinabuhi. Ang mga tawo nagpatubo sa mga kahoy nga olibo, ubas, ug diutayng trigo. Matag banay adunay gialimahang mga pipila ka buok kanding. Pan mao ang ilang inadlaw-adlawng kalan-on. Matag Sabado sila moadto sa sinagoga, usa ka gamay nga edipisyo alang sa pagtuon ug pag-ampo. Si Jesus nailhan sa mga silingan isip usa ka panday.

2aSa Adlawng Igpapahulay miadto siya sa sinagoga ug nagtudlo sa mga tawo. Si Jesus sama gayod sa kang bisan kinsa niadtong dapita. Si Jesus dili mao ang tig-saulog (presider) sa kasaulogan sulod sa sinagoga. Usa siya sa mga laygo nga anaa nakig-uban sa asembliya. Ang matag hamtong nga lalaki sa Israel —gikan sa napulog duha (12) ang panuigon—giila nga usa ka “pari”, usa ka sakop sa “parianong kabanay”. Ug tungod niini ang matag lalaki adunay katungod sa pagbasa ug pagtudlo sa Balaang Kasulatan. Mao kini ang gibuhat ni Jesus niadtong adlawa. Mitindog siya gikan sa pundok sa mga katawhan aron sa pagproklamar sa Pulong.

2bDaghan ang mga tawo didto, ug sa ilang pagkadungog kaniya, nahibulong silang tanan. Busa nangutana sila, “Diin man niya hikat-oni kining tanan? Unsa mang matanga sa kaalam kining nabatonan niya? Ug giunsa man niya paghimog mga milagro? Ang kabantog ni Jesus niabot sa iyang kaugalingong dapit pinuy-anan. Inay nga ang mga tawo mobatig pasigarbo niini, sila nahibulong ug wala matuo kaniya. Kon unsa man ang ilang mga nadungog daw dili mahisibo sa unsa may ilang nahibaloan mahitungod kaniya. Nasayran nila kon unsa ang pagkabata ni Jesus. Ug karon dili ang mga tawo makadawat sa kamatuoran nga siya lahi kay sa kanila.

3aDili ba siya mao man ang panday nga anak ni Maria, ug ig­soon nila ni Santiago , ni Jose, ni Judas, ug ni Simon? Dili ba ang iyang mga igsoong babaye ania man dinhi magpuyo?” Ang ebanghelyo sumala ni San Markos naghulagway sa hilabihang kayano ni Jesus. Dinhi atong masabtan ang reaksyon sa mga katawhan nga gikan sa gamayng lungsod nga nahimutang sa taliwala sa mga kabukiran. Ang ilang kinabuhi anaa lamang mahisentro sa ilang isigkasilingan. Ang ilang panan-aw mubo lamang, anaa ra kutob sa mga bukid nga naglibot kanila. Anaa ang listahan sa “igsuon” nga sa ilang panultihon nagpasabot og mga “kaig-agawan”. Ang mga lalaki lamang ang adunay gisulting ngalan kay ang mga babaye wala man mahatagi pa sa ilang katungod niadtong panahona.

3bTungod niini wala sila motuo kaniya. Sa laktod nga pagkasulti, ang mga katawhan naeskandalo sa gisulti ni Jesus sulod sa sinagoga! Si Jesus napakyas niadtong tungora. Siya gisalikway sa iyang mismong mga tagilungsod. 4Ug miingon si Jesus kanila, “Ang propeta gitahod sa tanang dapit gawas sa iyang kaugalingong lungsod, sa iyang mga kadugo ug sa iyang banay.”

Gisaysay ni Jesus ang usa ka kamatuoran: nga siya wala masabti sa iyang kaugalingong lungsod, kadugo ug banay. Kini nagpasabot lamang nga dili diay ang kasuod nga linawas (physical closeness) maoy kapanigurohan sa lig-ong relasyon tali sa usag-usa. Ang sukaranan sa lig-on ug malungtarong relasyon anaa lamang sa Pagtuo. Mabasa sa ebangehlyo: “Kay ang nagtuman sa bisan unsa nga gisugo sa Dios kaniya maoy akong mga igsoon ug akong inahan” (Mk 3:35 ). Si Jesus nagtukod og usa ka banay alang sa iyang kaugalingon: kadtong naminaw sa iyang Pulong ug nagtuman niini. 5Wala siya makahimog milagro didto gawas sa pagtapion sa iyang mga kamot niadtong pipila ka masakiton ug naayo sila.

May dakong pagtulun-an nga atong makat-onan niini. Nga diay ang pagkaayo sa masakiton pinaagi sa pagtapion sa kamot ni Jesus dili pa diay gayod usa ka milagro. Ang matuod nga milagro mahitabo lamang kon adunay nag-uban nga Pagtuo. Ang pagkaayo gikan sa sakit nga dili moabot sa punto sa pag-angkon sa usa ka personal nga pagtuo diha kang Jesus dili pa isipon nga usa ka matuod nga milagro. 6Natingala siya pag-ayo nga wala sila motuo. Nasinati usab ni Jesus nga wala siya tuohi. Si Jesus wala gani gahum taliwala sa pagtuo sa mga tawo. Kana tungod kay girespetohan ni Jesus ang atong pagka-gawasnon. Mao nga kon aduna na kitay Kritohanong Pagtuo, ampingan ug palawman ta kini!