2Ug dihay pipila ka mga Pariseo nga miduol ug misulay pagbitik kang Jesus. Nangutana sila, “Nagtugot ba ang atong Balaod kang bisan kinsa sa pagbulag sa iyang asawa?” 3Si Jesus misumbalik sa pagpangutana kanila, “Unsa may gisugo ni Moises kaninyo?” 4Mitubag sila, “Mitugot si Moises nga ang bana makahimo pagbulag sa iyang asawa human niya sulatig sulat sa pakigbulag ang iyang asawa.” 5Miingon si Jesus kanila, “Gihimo kining sugoa ni Moises kay kamo gahi mag ulo. 6Apan sa sinugdan, sa pagbuhat sa kalibutan, ‘gibuhat sa Dios ang lalaki ug babaye. 7Tungod niini, mobiya ang lalaki sa iyang amahan ug sa iyang inahan ug makighiusa sa iyang asawa, 8ug silang duha mahimo nang usa .' Busa ang bana ug ang asawa dili na duha, kondili usa na lamang. 9Tungod niini kinahanglan nga dili bulagon sa tawo ang giusa sa Dios." 10Sa didto na sila sa balay, nangutana ang mga tinun-an kang Jesus mahitungod ning butanga. 11Miingon siya kanila, “Ang bana nga mobulag sa iyang asawa ug makigminyog laing babaye, nakapanapaw batok sa una niyang asawa; 12ug ang babaye nga mobulag sa iyang bana ug makigminyo og laing lalaki, nanapaw usab.”13May pipila ka tawo nga nagdala og mga bata ngadto kang Jesus aron sila hikapon niya, apan gikasab-an sila sa mga tinun-an. 14Sa pagkaalinggat ni Jesus niini, nasuko siya ug miingon sa iyang mga tinun-an, “Paaria kanako ang mga bata. Ayaw silag did-i, kay ang Gingharian sa Dios ila sa sama niining mga bata. 15Timan-i ninyo kini: ang dili modawat sa paghari sa Dios sama sa usa ka bata, dili mahisakop niini.” 16Unya iyang gipangugos ang mga bata, gitapion ang iyang mga kamut kanila, ug gipanalanginan sila. Ang Ebanghelyo sa Ginoo.

KAHULOGAN SA EBANGHELYO (Markos 10:2-16)

2Ug dihay pipila ka mga Pariseo nga miduol ug misulay pagbitik kang Jesus. Nangutana sila, “Nagtugot ba ang atong Balaod kang bisan kinsa sa pagbulag sa iyang asawa?” Usa ka pangutana nga ang tuyo dili mao ang pagpangita og kamatuoran, kondili aron nga ang mga Pariseo makapaulaw kang Jesus: kay bisan unsa ang iyang itubag, si Jesus makapasilo man sa pundok sa mga katawhan.

Ang Balaod sa mga Israelita mabasa sa Balaang Kasulatan: “Kon ang usa ka lalaki mangasawa, ug unya dili na gusto ang lalaki sa babaye kay hipalgan man sa lalaki ang mga butang nga wala niya higustohi, makahimo siya pagsulat og sulat sa pakigbulag ug ihatag niya kini sa babaye ug papahawaon niya ang babaye sa iyang balay” (Deuteonomio 24:1). Sa ato pa, ang balaod nagtugot sa pagpakigbulag. 3Si Jesus misumbalik sa pagpangutana kanila, “Unsa may gisugo ni Moises ka-ninyo?” 4Mitubag sila, “Mitugot si Moises nga ang bana makahimo pagbulag sa iyang asawa human niya sulatig sulat sa pakigbulag ang iyang asawa.”

Niadtong panahona adunay duha ka interpretasyon kon unsay “kalaw-ayan” nga maoy hinungdan sa panagbulag. Sumala kang Rabbi Shammai kini mao lamang ang seryoso nga imoralidad sama sa pakighilawas sa dili nimo bana o asawa (adultery); alang kang Rabbi Hillel bisan gani ang pagsunog sa linuto mahimo nang hinungdan sa panagbulag (divorse). Kining maong panag-ingnan nagtug-an lamang kanato nga dili diay ang tanang “legal” mahimo usab nga “moral”. Ang hagit sa usa ka Kris-tyanos mao nga bisan kon ang usa ka isyu “legal”, apan susihon usab kon kini subay pa sa unsay maayo o dautan sumala sa kabubut-on sa Dios nga maoy atong gitawag og “moral”. 5Miingon si Jesus kanila, “Gihimo kining sugoa ni Moises kay kamo gahi mag ulo. “Sklerokardia” (sclerosis of the heart) o kagahig kasingkasing. Daghan kini sa atong panahon karon, labi na kon maghisgot kita kabahin sa pagtan-aw sa kaminyoon.

Una. Anaa ang pagtipon isip bana ug asawa bisan pa kon wala pa makasal. Ikaduha. Anaa ang magpakasal lamang sa sibil (civil marriage) ug dili modawat sa Sakramento sa kaminyoon. Ikatulo. Anaa ang “pagpangabit”. Ika-upat. Anaa ang “deborsyo” o panagbulag. Kini mga timaan nga daghan ang wala nay paghatag og mahinungdanong bili sa institusyon sa kaminyoon. 6Apan sa sinugdan, sa pagbuhat sa kalibutan, ‘gibuhat sa Dios ang lalaki ug babaye. Ang sukaranan nga balaod sa panag-higugmaay tali sa lalaki ug babaye o “couple love” sumala sa kabubut-on sa Dios mao ang pagka-lalaki ug sa pagkababaye. Sukad sa sinugdan mao kini ang katuyoan sa pagbuhat sa Dios sa tawo nga anaa ang lalaki ug babaye.

Unsa man ang atong baroganan kabahin sa kaminyoon? Kadto bang atong nakit-an nga maoy gihimo sa mga bituon sa sine o sa tv (celebrerities) o kadto bang unsay kabubut-on sa Dios? Ang kaminyoon usa ba lang ka sosyal o kultural nga kalihokan o kasinatian ba usab nga anaa ang Pagtuo? Paminawon nato si Jesus! 7Tungod niini, mobiya ang lalaki sa iyang amahan ug sa iyang inahan ug makighiusa sa iyang asawa, 8ug silang duha mahimo nang usa .' Busa ang bana ug ang asawa dili na duha, kondili usa na lamang. May kadugtungan kini sa unsay gisulat sa Basahon sa Genesis: “Unya miingon na usab ang Dios, ‘Buhaton nato ang tawo sama sa atong dagway. Siya maoy magbuot sa mga isda, sa mga langgam, sa mga kahayopan, ug sa tanang ihalas nga mananap. Busa gibuhat sa Dios ang tawo, lalaki ug babaye, sama sa iyang dagway… (Genesis 1:26-27). 9Tungod niini kinahanglan nga dili bulagon sa tawo ang giusa sa Dios."

Ang Ginoo lamang gayod ang makaaghat nato sa paghimo sa unsay daw imposible nga mahimo sa tawo. Ang Sakramento sa Kaminyoon walay lain kondili usa ka grasya nga makahatag kanatong mga tawo, nga kon pasagdan lamang sa atong kaugalingon dili gayod magmalampuson sa paghigugma, og usa ka baroganan sa tinuod nga panag-hiusa nga gugma o covenant love. Ang gitudlo mahitungod sa walay panagbulag sa mga minyo (indissolubility of marriage) wala maghatag kanato og katungod sa pagtamay niadtong mga nanagbulag. Dili kini mao ang gitudlo ni Kristo. Hinoon ipahimutang gayod sa mga paghunahuna sa mga minyo o kadtong nagplano nga magminyo nga ang Dios dili buot nga anaay panagbulag! Kini mao ang tunhay nga ilhanan sa matuod nga gugma! Sa mga mosunod nga bersikulo si Jesus mitudlo mahitungod sa panapaw. Ug iyang gitapos ang pagtudlo kabahin sa kabililhon sa mga gagmayng bata.