31Unya mibiya si Jesus sa yuta duol sa Tiro ug milakaw latas sa Sidon ngadto sa Lanaw sa Galilea, agi sa yuta sa Decapolis . 32 Ug may usa ka tawo nga bungol ug amang nga gidala sa pipila ka mga tawo ngadto kang Jesus, ug mihangyo sila kaniya nga ang iyang kamot itapion niya sa tawo. 33 Busa gipahilayo siya ni Jesus sa mga tawo, ug gikulikog niya ang iyang mga tudlo sa dalunggan sa tawo. Unya gituthoan niya ang iyang mga tudlo ug iyang gihikap ang dila sa tawo. 34 Ug mihangad si Jesus sa langit, nanghupaw siya, ug miingon sa tawo, “Efata!” nga sa ato pa, “Maabli ka!” 35 Dihadiha makadungog na ang tawo ug maayo na siyang mosulti. 36 Ug gipinahan silang tanan ni Jesus sa dili pagpanugilon niini kang bisan kinsa; apan hilabihan hinuon nilang panugilon niini. 37 Ug natingala pag-ayo ang tanan ug miingon sila, “Maayo gayod niyang pagkabuhat ang tanan! Bisan gani ang mga bungol iyang gihimo nga makadungog, ug ang mga amang makasulti.” Ang Ebanghelyo sa Ginoo.

KAHULOGAN SA EBANGHELYO (Markos 7:31 -37)

31Unya mibiya si Jesus sa yuta duol sa Tiro ug milakaw latas sa Sidon ngadto sa Lanaw sa Galilea, agi sa yuta sa Decapolis. Kining maong panaw mokabat og kapin sa usa ka gatos (100) ka mga kilometro ang gilay-on. Atong ipahimutang ang atong kaugalingon sa nahimutangan ni Jesus. Human siya biyai sa daghang mga tawo—tungod kay wala man madawat kanila ang iyang pagtulun-an mahitungod sa Pan sa Kinabuhi—nabati ni Jesus nga dili niya usikan ang panahon sa pakig-atubang sa daghang mga katawhan. Mao nga iyang gidala ang iyang pipila ka buok nga mga tinun-an aron ang maong dyutayng pundok (napulog duha ka mga lalaki ug pipila ka mga babaye) maoy iyang katudloan. Ug kini mahimong masayon kon adto himoa sa langyaw ug layong dapit. Ang pagpanudlo iyang gihimo samtang naglawig sila ngadto sa maong dapit.

32 Ug may usa ka tawo nga bungol ug amang nga gidala sa pipila ka mga tawo ngadto kang Jesus, ug mihangyo sila ka-niya nga ang iyang kamot itapion niya sa tawo. Ang pagkabantugan ni Jesus isip usa ka magbubuhat og katingalahan (wonder-worker) mikaylap na ngadto sa daghang mga dapit. Sa mga miaging mga adlaw, didto ang usa ka babaye nga miduol kang Jesus ug nangayog pakitabang nga unta ang iyang batan-ong anak nga babaye ayohon. Karon, gidala na usab ngadto kaniya ang tawo nga bungol ug amang. Kon itandi nato sa mga Judio, daw ang mga hentil mas bukas pa ang ilang pagtuo kang Jesus. Ang mga Judio nagmagahi sa ilang pagdawat kaniya. 33 Busa gipahilayo siya ni Jesus sa mga tawo, ug gikulikog niya ang iyang mga tudlo sa dalunggan sa tawo. Unya gituthoan niya ang iyang mga tudlo ug iyang gihikap ang dila sa tawo.

Ang mga gihimo ni Jesus may dakong kahulogan: 1) Iyang gipalayo ang masakiton gikan sa panon sa mga tawo. Samtang ang mga magikero mohimo sa ilang mga buluhaton atubangan sa daghang mga tawo, si Jesus mihikling kaniya aron iyang mahimo ang kahibulongang buhat sa Dios! 2) Si Jesus mihimog aksyon—kulikog sa iyang tudlo ngadto sa dalunggan sa tawo. Kini maoy makapasabot kanato nga ang Sakramento diay nagkinahanglan gayod og lawasnon nga timaan. Pinaagi sa sakramento ang Dios “misulod kanato” sa paagi nga linawas makit-an o madunggan, kay siya usab nagpakatawo man aron kita maluwas (sa ato pa, misagop sa unsay anaa sa kinaiyang tawhanon). Mao diay nga kita gitugotan sa Simbahan nga modawat sa Lawas Ni Cristo ginamit ang atong mga kamot, panahon sa pagkalawat, kay lagi diha sa Sakramento ang Dios madawat man kanatong mga tawo pinaagi sa atong mga tawhanong lihok o bayhon ug sa pulong. 34a Ug mihangad si Jesus sa langit, nang-hupaw siya,

Kining maong aksyon nagaagak kanato sa pagpahipunting sa atong mga pagtagad ngadto sa balaang Gahum! Ang pagpanghupaw ni Jesus timaan, dili lamang sa lawom nga kalooy ngadto sa masakiton, kondili usa ka lihok sa kinatibuk-ang pagkatawo ni Jesus nga mitawag sa Dios—uban sa hingpit nga pagpakabana nga ang maong tahas dili sayon, busa nagkinahanglan og dakong paningkamot. Ang maong buluhaton mao man gud ang pagpabalik sa unsay orihinal sa Dios ngadto sa kahimtang sa tawo nga naguba gumikan sa sala. 34abug miingon sa tawo, “Efata!” nga sa ato pa, “Maabli ka!”

Ang Ebanghelyo sumala ni San Markos gisulat sa Griego, apan gikutlo ang orihinal nga pinulongan ni Jesus nga Aramaic niining bahin sa Ebanghelyo. Dili nato sabton nga si Jesus misugo “maabli ka” ngadto sa dalunggan ug dila sa tawo, kondili ang iyang gisugo nga “maabli” mao mismo ang tawo! Ang pagbukas sa kaugalingon mao man gayod ang sukaranan sa tinuod nga Pagtuo! 35 Dihadiha makadungog na ang tawo ug maayo na siyang mosulti. Ang tawo, kon magpabilin sa iyang pagkatawhanon, anaa ra gayod sa pagkabuta, pagkabungol, pagka-amang. Mao kini ang kondisyon sa matag tawo sa panahon nga wala pa ang Dios diha kaniya! Si Jesus mopalihok sa mga tawo aron makakita, makadungog ug makasulti ang tawo sa Pulong sa Dios! Si Jesus lamang ang makapaabli kanato!

36 Ug gipinahan silang tanan ni Jesus sa dili pagpanugilon niini kang bisan kinsa; apan hilabihan hinuon nilang panugilon niini. 37 Ug natingala pag-ayo ang tanan ug mi­ingon sila, “Maayo gayod niyang pagkabuhat ang tanan! Bisan gani ang mga bungol iyang gihimo nga makadungog, ug ang mga amang makasulti.” Nakapahinumdom kini kanato sa mga pulong nga nagsaysay sa unang pagbuhat sa Dios sa kalibutan o creation: “Nakita sa Dios nga maayo ang tanan nga iyang nabuhat ug nalipay gayod siya” (Gen 1:31 ).