2Tapos sa unom ka adlaw, gidala ni Jesus sila si Pedro, si Santiago , ug si Juan ngadto sa usa ka taas nga bukid diin didto walay laing tawo gawas kanila. Ug samtang nagtan-aw sila kang Jesus, nausab ang iyang panagway, 3ug ang iyang bisti migilak sa hilabihang kaputi; walay bisan kinsa sa tibuok kalibotan nga makapaputi sama niini.4 Unya nakita sa tulo ka tinun­an si Elias ug si Moises nga nakigsulti kang Jesus. 5Ug miingon si Pedro kang Jesus, “Magtutudlo, maayo nga ania kita dinhi. Maghimo kami og tulo ka payag, usa alang kanimo, usa alang kang Moises, ug usa alang kang Elias.” 6Nakaingon siya niini kay wala siya mahibalo kon unsay iyang isulti sanglit na-ngalisang man sila. 7Unya dihay panganod nga mitungha ug gilandongan sila niini. Ug may nadungog silang tingog gikan sa panganod nga nag-ingon, “Kini siya mao ang pinangga kong Anak — pamati kamo kaniya!” 8Milingilingi sila pagdali, apan wala silay nakitang tawo gawas lamang kang Jesus. 9Sa nanglugsong na sila sa bukid, gipinahan sila ni Jesus nga dili nila isugilon kang bisan kinsa ang ilang nakita hangtod nga ang Anak sa Tawo mabanhaw na. 10Gituman nila ang iyang gitugon, apan ilang gipanagsultihan kon unsa ang kahulogan sa giingon niyang “pagkabanhaw”. Ang Ebanghelyo sa Ginoo.

KAHULOGAN SA EBANGHELYO (Markos 9: 2-10)

2aTapos sa unom ka adlaw… Ang unom ka adlaw adunay kaugalingong kahulogan sa Bibliya. Mao kini ang gidugayon sa panahon nga gikinahanglan aron adunay paglinis sa dili pa moabot ang Ginoo: “Unya ang himaya sa Ginoo mikunsad sa bukid sa Sinai, ug sulod sa unom ka adlaw naputos sa panganod ang bukid. Unya sa ika-pito ka adlaw, gikan sa taliwala sa panganod, ang Ginoo mitawag kang Moises” (Exodo 24:16). Hatagig pagtagad ang upat ka mga pulong: “unom ka adlaw”, “Moises”, “panganod” ug “bukid”. 2bgidala ni Jesus sila si Pedro, si Santiago , ug si Juan… Dili ang tanang Apostoles, kondili ang tulo lamang! Kini silang tulo mao usab ang nakasaksi sa pagkabuhi pag-usab sa batang babaye (Markos 5:37 ), ug mao ang mosaksi sa kasakitan ni Jesus didto sa tanaman sa Getsemani (Markos 14:33 ). Wala sila pilia tungod kay aduna silay talagsaong kalainan sa ubang mga Apostoles. Gipili hinoon sila aron sila ang mohatag og pagsuporta sa Pagtuo sa kauban nilang mga Apostoles. Kinahanglan gayod ang matag usa kanato adunay pag-agakay sa usag-usa aron mapalig-on ug mapalawom ang Pagtuo. 2cngadto sa usa ka taas nga bukid diin didto walay laing tawo gawas kanila.

Mao kini ang tradisyonal nga paagi sa pagsinati sa Ginoo diha sa Bibliya. Ang larawan sa bukid mao ang atong makita nga dapit diin ang pakighinagbo sa Dios nahitabo (Exodo 24:1, 34:2, I Hari 18:20 ; 19:8-11). Anaa sa bukid ang balaang presensya sa Dios tungod kay anaa sa bukid ang kalinaw, kahilom, ug kami-ngaw — halayo sa disturbo. 2dUg samtang nagtan-aw sila kang Jesus, nausab ang iyang panagway, Ang kausaban sa panagway naila sa pulong Transfiguration. Kini nagpasabot nga ang kalibutan maayo o ang atong lawas maayo, apan ang ilang pagka-maayo usa lamang ka salamin sa kaayo sa Ginoo. Aron kini mahimo gayong maayo, kini sila—kalibutan o lawas—nagkinahanglan og kausaban o transfiguration.

Niining maong panghitabo, si Jesus wala makadawat og kahayag gikan sa gawas. Siya mismo sa iyang pagkasiya mao ang midan-ag. Busa bisan pa diay ang kalibutan o lawas makapadan-ag sa iyang kaugalingon kay kini nakaangkon man sa kahayag ni Cristo. Ang maong kahayag wala magagikan sa gawas, kondili anaa na sulod kanato. Hinuktokan ta kini: “Kay namatay na kamo, ug ang inyong kinabuhi natago uban ni Cristo diha sa Dios. Ang matuod ninyong kinabuhi mao si Cristo ug inigpakita niya, makita usab kamo uban kaniya ug moambit sa himaya niya” (Colosas 3:3-4). 3ug ang iyang bisti migilak sa hilabihang kaputi; walay bisan kinsa sa tibuok kalibotan nga makapaputi sama niini.

Ang hilabihang kaputi sa bisti naglarawan sa naandang kolor nga gihulagway sa langit ug walay bisan unsa nga ania ibabaw sa kalibutan nga susama niini. Ang puti mao usab ang kolor sa mga anghel nga nakita panahon sa Pagkabanhaw (Mateo 28:3) ug ingon man sa panahon sa Pagsaka sa Langit (Buhat 1:10 ). Ang puti mao usab ang kolor nga naghulagway og kadaugan o victory (Gipadayag 3:4, 20:11 , 2:17 , 6:11 , 7:13 -15). Sa atong mga kasaulogan: anaa ang puti nga sapot panahon sa bunyag, sa unang pagkalawat, sa kasal, ang puting bisti sa pari o alba. Kini sila mga simbolo sa giingon, “...busa nakaambit kamo sa kinaiya ni Kristo (Galacia 3:27 ). 4Unya nakita sa tulo ka tinun­an si Elias ug si Moises nga nakigsulti kang Jesus. Si Elias ug si Moises naglarawan sa gipaabot sa Israel nga mabasa sa “Balaod” ug sa “Mga Propeta”. Bisan pa kon sila nahimugso sa dugay nang panahon, gatosan na ka tuig ang milabay, nahimo gihapong kauban ni Jesus sa maong talan-awon.

Kini nagpatataw lamang sa kalambigitan ni Jesus sa kaaraang panahon. Busa si Jesus napamatud-an nga may kalabutan sa daan ug sa bag-ong panahon. 5Ug miingon si Pedro kang Jesus, “Magtutudlo, maayo nga ania kita dinhi. Maghimo kami og tulo ka payag, usa alang kanimo, usa alang kang Moises, ug usa alang kang Elias.” 6Nakaingon siya niini kay wala siya mahibalo kon unsay iyang isulti sanglit nangalisang man sila.

Si Pedro mao na usab ang tigpamulong. Bag-ohay pa lamang nga siya misulti kabahin sa iyang Pagtuo o profession of faith (Markos 8:27 -33). Misagop usab siya sa papel ni Satanas sa dihang midumili siya sa pagdawat sa kasakitan ug kamatayon nga gisulayan sa pagpasabot ni Jesus kanila (Markos 8:33 ). Niining tungora karon dinhi sa bukid wala na usab siya makatugkad sa kahulogan sa maong talan-awon. Dili ba usab sa makadaghan kita mismo dili man usab makasabot sa gipaabot nato sa Ginoo?

7Unya dihay panganod nga mitungha ug gilandongan sila niini. Ug may nadungog silang tingog gikan sa panganod nga nag-ingon, “Kini siya mao ang pinangga kong Anak — pamati kamo kaniya!” Ang “panganod” mao ang timaan sa presensya sa Dios. Ang “tingog” mao usab ang maong tingog nga nadunggan sa panahon sa pagbunyag ni Jesus (Markos 1:11 ).