Sa pagkagabii na niadtong Domingoha, nagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio. Unya mitung­ha si Jesus sa taliwala nila ug miingon, “Mainyo unta ang kalinaw.” 20Human siya makasulti mini, iyang gipakita kanila ang iyang mga kamot ug ang iyang kilid. Nalipay pag-ayo ang mga tinun-an sa ilang pagkakita sa Ginoo. 21Unya si Jesus miingon kanila pag-usab, “Mainyo unta ang kalinaw. Ingon nga gipadala ako sa Amahan, ako usab nagpadala kaninyo.” 22Gisulti niya kini ug unya gihuypan niya sila ug giingnan, “Dawata ninyo ang Espiritu Santo . 23Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon.” Ang Ebanghelyo sa Ginoo.

oOo

KAHULOGAN SA EBANGHELYO (Juan 20:19 -23)

19aSa pagkagabii na niadtong Domingoha… Sa Saysay sa Ebanghelyo sumala ni San Juan, sa gabii sa adlaw sa Pagkabanhaw, ang Espiritu Santo gihatag ngadto sa mga Apostoles, ug ang Simbahan nahimugso pinaagi sa huyop sa gininhawa ni Jesus! Lahi kini sa gisaysay ni San Lukas sa Buhat sa mga Apostoles. Kini nagtukmod kanato sa malawom nga pagtuki sa pagtulun-ang teolohikal nga gitug-an pinaagi sa simbolo nga mahibalag diha sa bibliya. Ang unang adlaw sa semana, Domingo, ang nabag-ong kalibutan nagsugod. Usa kini ka bag-ong Genesis. Ang Dios sa makausa pa misapupo sa mga katawhan sa iyang kaugalingon kamot. Ang Dios miumol pag-usab sa tawo! Gikan niadtong Domingoha, kitang mga Kristyanos wala na mohunong sa panagtagbo sa matag Domingo. Ang Simbahan nagpadayon sa iyang mga kasaulogan pinaagi niining regular nga panagtapok sa adlawng Domingo, hangtud sa atong panahon karon. Matag Domingo ang Dios naghuyop kanato og kinabuhi!

19bnagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio... Kahadlok! Gigapos ang atong kalibutan sa maong kahadlok! Kahadlok nga anaa naglibot ug anaa sa sulod sa matag usa kanato. Ug ang Espiritu sa Ginoo motungha agi niining maong mga kahadlok aron makagawas kita gikan sa gapos sa kahadlok. 19cUnya mitungha si Jesus sa taliwala nila ug miingon… Gituyo ni San Juan nga adunay tataw nga kadugtungan tali sa Pagkabanhaw ni Jesus ug ang gasa sa Espiritu Santo . Sa Propesyon sa Pagtuo, kita moingon: “Ang Espiritu Santo, ang maghahatag sa kinabuhi”. Kining gasa sa Kinabuhi, una nga gidawat ni Jesus. Ang paghiuli ni Cristo gikan sa kamatayon ngadto sa pagkabanhaw maoy usa ka batid nga buhat (master stroke) sa Espiritu Santo .

Si Jesus miguba sa tanang babag. Ang iyang kalit nga pagtungha sa taliwala sa mga apostoles maoy usa ka lihok sa Espiritu Santo . Ang iyang nabanhaw nga lawas hingpit nga gigamhan sa Kinabuhi sa Espiritu Santo . Si Jesus hingpit nga naghupot sa Espiritu Santo nga mao “ang Ginoo ug maghahatag sa kinabuhi”. Ang pagkabanhaw maoy usa ka buhat sa Espiritu Santo ! 19d“Mainyo unta ang kalinaw.” Gikan sa kahadlok ngadto sa kalipay! 20aHuman siya makasulti mini, iyang gipakita kanila ang iyang mga kamot ug ang iyang kilid… Ang Pasko sa Pagkabanhaw ato diay usab nga masinati kon atong susihon ang atong mga samad ug uwat nga atong nasinati sa atong personal nga pagkinabuhi, ug diha sa mga kasakitan ug kapakyasan sa kalibutan, sa katilingban, sa Simbahan. 21Unya si Jesus miingon kanila pag-usab, “Mainyo unta ang kalinaw. Ingon nga gipadala ako sa Amahan, ako usab nagpadala kaninyo.”

Kanhiay sila mga tinakpan (shut-in), karon ania sila mga pinadala (sent out). Angay natong mahibaloan nga ang ilang pagpadala ngadto sa misyon wala ubani og han-ay nga plano . Alang kang Jesus ang labing mahinungdanon mao ra gayod kini: nga sa sinugdan sa maong misyon anaa ang hugot nga panagsuod tali kanila nga pinadala ug kang Jesus nga maoy nagpadala. Ug kining hugot nga kadugtungan anaa magasukad sa kahiusahan sa Amahan, Anak ug Espiritu Santo . Ug usab adunay usa lamang ka misyon” Ang misyon sa Amahan, nga mao usab ang misyon ni Jesus, ug misyon sa Simbahan minandoan sa Espiritu Santo. 22aGisulti niya kini ug unya gihuypan niya sila ug giingnan… Huyop sa kinabuhi mao ang makanunayong presensya sa Dios gikan pa sinugdan ug mohangtud kini sa kahangturan. Nabuhi ang tanan dinhi sa kalibutan, lakip kitang mga tawo, gumikan niini.

22b“Dawata ninyo ang Espiritu Santo. Nabuhi kita gumikan sa daghan nga atong gidawat, kinabuhi gikan sa ginikanan, hangin, adlaw, pagkaon, mainum ug uban pa. Labaw sa tanan anaa ang tanyag sa kinabuhi nga walay pagkatapos! 23Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon.” Usa ka mahinungdanong misyon sa Simbahan, ang pagproklamar sa kapasayloan sa sala ug kaluwasan. Ato ba kining mahinangpong gidawat?