15Miingon siya kanila, “Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo. 16Ang motuo ug magpabunyag maluwas, apan ang dili motuo, silotan. 17Ug kini ang mga timaan sa gahom nga mabatonan nila nga motuo: sa akong ngalan maghingilin silag mga yawa ug manulti silag lainlaing mga sinultihan; 18kon makakupot silag mga halas o makainom silag hilo, dili sila ma­unsa: itapion nila ang ilang mga kamot sa mga masakiton ug mangaayo sila.” 19Human makigsulti kanila ang Ginoong Jesus, gidala siya ngadto sa langit ug milingkod sa tuo sa Dios. 20Ug nanglakaw ang mga tinun-an ug nagsangyaw sa Maayong Balita sa tanang dapit. Ang mitabang gayod kanila mao ang Ginoo, ug midason sa katinuod sa ilang giwali pinaagi sa paghatag kanila sa mga timaan sa gahom. Ang Ebanghelyo sa Ginoo.

oOo

KAHULOGAN SA EBANGHELYO (Markos 16:15-20)

15Miingon siya kanila, “Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo.

Ang gisundan nga bersekulo niini mao kining mosunod: … Gisaway niya sila tungod sa ilang pagkakulang sa pagtuo, ug tungod sa pagkagahi sa ilang ulo, kay wala man sila motuo niadtong nakakita kaniya nga nabanhaw (Mk 16:14). Ang teksto nag-hulagway gikan sa daw paglatigo ni Jesus sa mga Apostoles tungod sa ilang pagkakulang sa pagtuo ngadto dinaliang pagtugyan kanila sa usa ka misyon nga unibersal. Daw mao kini ang kasagarang ilarawan niadtong nagsugod pa sa mis-yon: ang pagkakulang sa pagtuo! Apan sa maong proseso, ang Dios nagpada-yag lamang sa usa ka mahinungdanong pagtulun-an: nga dili na kita magla-nganlangan. Bisan pa sa atong kakulang kinahanglan nga buhaton na gayod ang unsay gipabuhat.

Si Jesus daw nagtukmod sa iyang mga Apostoles sa pagsugod, sa walay pagpakabana sa ilang mga kakulangon. Misalig man si Jesus kanila bisan pa sa kondisyon sa ilang pagkakulang. Pagkamahinungdanon sa maong sugo: Panglakaw… Pagsangyaw! 16Ang motuo ug magpabunyag maluwas, apan ang dili motuo, silotan. Kon ang Maayong Balita iproklamar, nagkinahanglan kini og tubag. Una, nagdapit kini nga ang tawo gawasnon nga motubag niini pinaagi sa pagtuo o pagdumili sa pagtuo.

Dili ang Ginoo maoy nagkondenar niadtong nagdumili sa pagtuo, kondili sila mismo nga wala motuo, bisan pa sa kahigayonan sa pagtuo, mao ang naghukom batok sa ilang kaugalingon. Ang tuyo sa Ginoo nga ang tanan maluwas. Apan kanila nga modumili sa pagdawat sa maong kaluwasan, sila na mismo mao ang nagkondenar sa ilang kaugalingon.

Unsaon man nato pagsabot niini? Simple ra: Gawas kang Jesus wala gayoy kaluwasan. Gawas kang Jesus ang tawo mawala. Ang Dios lamang mao ang atong kaluwasan. Ang Dios dili mopugos kanato. Anaa girespitohan sa Dios ang atong pagka adunay kagawasan. 17Ug kini ang mga timaan sa gahom nga mabatonan nila nga motuo: sa akong ngalan maghingilin silag mga yawa ug manulti silag lainlaing mga sinultihan; 18kon makakupot silag mga halas o makainom silag hilo, dili sila maunsa: itapion nila ang ilang mga kamot sa mga masakiton ug mangaayo sila.”

Lisod kini sabtong kanatong mga mo-dernong tawo: yawa, halas, hilo, kasakitan. Gipahaum lamang kining maong mga “timaan” sumala sa mga masabtan sa mga tawo niadtong panahona nga kini gilitok. Hinunduman nato nga natawo ang Kristohanong pagtuo gikan sa patuotuong pagano diin anaay daghang mga madjikero nga naghimog katingalahang talan-awon. Kanatong mga modernong tawo, sabton kini nato ingon niini: nga kon anaa kita kang Jesus wala gayoy gahum nga makaulipon ug makabuntog kanato, walay gahum nga makapabulag kanato kaniya. Adunay gahum ang Ebanghelyo!

Sa atong panahon karon, dili nato malilong nga adunay pagsaksi sa susamang mga timaan, sama sa paggamit sa pag-ampo sa mga pulong nga dili nato masabot o gift of tongues. Aduna usay mga pag-ayo sa mga masakiton pinaagi sa kahimanan sa pag-ampo. 19Human makigsulti kanila ang Ginoong Jesus, gidala siya ngadto sa langit ug mi-lingkod sa tuo sa Dios.

Kining maong bersyon wala mohisgot sa mga detalye sa pagsaka sa langit ni Jesus. Kon buot natong masayran ang mga detalye niini tan-awa sa Lukas 1:9. Apan dili nato kini sabton sa literal nga paagi, kay ang Dios walay tuo o walay wala nga dapit. Gilarawan lamang kini ingon niini aron paggamit sa sinulti-an sa Bibliya nga anaa sa Salmo 110:1, “Lingkod diri sa akong tuo…” Kini nagapahayag sa usa ka kamatuoran nga ang nabanhaw nga Jesus mao gayod ang Ginoo sa Himaya, usa ka kamatuoran nga dili gayod masabtan pinaagi sa tawhanong pangisip o rason. Kini usa ka kamatuoran nga masabtan lamang pinaagi sa Pagtuo!

20aUg nanglakaw ang mga tinun-an ug nagsangyaw sa Maayong Balita sa tanang dapit… Wala sila maglangan. Dihadiha sila misugod sa ilang misyon sa pagwali. 20bAng mitabang gayod kanila mao ang Ginoo, ug midason sa katinuod sa ilang giwali pinaagi sa paghatag kanila sa mga timaan sa gahom. Kini ang pipila ka mga tilimad-on: Una, wala na si Jesus sa lubnganan. Ikaduha, tua si Jesus sa tuong dapit sa iyang Amahan. Ug ikatulo, apan si Jesus nag-uban pa kanila sa ilang mga buluhaton.