1Ako ang matuod nga punoan sa paras, ug ang akong Amahan maoy tig-atiman. 2Putlon niya ang tanang sanga nga dili mamunga ug pul-ongan niya ang tanang sanga nga mamunga aron kini mahinlo ug mamungag daghan. 3Nahinlo na kamo pinaagi sa mga pulong nga akong gisulti ka-ninyo. 4Pabilin kamo kanako ug ako magpabilin kaninyo. Gawas kon magpabilin kamo kanako dili kamo makabunga, ingon nga ang usa ka sanga dili makabunga gawas kon magpabilin kini sa punoan. 5Ako ang punoan sa paras, ug kamo ang mga sanga. Ang magpabilin kanako ug ako diha kaniya mamungag daghan; kay kon wala ako wala kamoy mahimo. 6Ang dili magpabilin kanako mahisama sa usa ka sanga nga ibalibag ug malaya; pamuniton kini ug daoban. 7Kon magpabilin kamo kanako ug ang akong mga pulong magpabilin kaninyo, makapangayo kamog bisan unsa ug madawat ninyo kini. 8Sa inyong pagpamungag daghan kapasidunggan ang akong Amahan, ug sa ingon niini kamo mahimong akong mga tinun-an.” Ang Ebanghelyo sa Ginoo.

oOo

KAHULOGAN SA EBANGHELYO (Juan 15:1-8)

1a“Ako... Susama sa miaging Domingo si Jesus mipadayag sa iyang kaugalingon kon kinsa siya. Kon ang iyang gipamulong nagsugod sa “Ako” kinahanglan nga maminaw gayod kita pag-ayo kay si Jesus nangahas sa paggamit sa balaanong Ngalan “Ako Mao Si Ako”, aron sa pagtug-an kanato kon kinsa siya o unsay iyang nahibaloan mahitungod sa iyang kaugalingon. 1b … ang matuod nga punoan sa paras…

Mao kini ang labing mapahangason nga gipadayag ni Jesus, sumala sa nakadungog niini sa unang higayon. Tungod, kay sa kanatibuk-an Kasulatan, ang larawan sa “punoan” naghulagway man sa “mga katawhan sa Israel”. Ug dinhi, kining Jesus, sumala sa iyang mismong gipamulong, sa walay kukahadlok mipahimutang sa iyang kaugalingon nga mao ang dapit sa “tanang katawhan sa Israel”. Sa iyang maisugon nga pag-angkon nga siya mao ang “tinuod nga punoan”, daw iyang gipamatuod nga kadtong uban nga nag-una kaniya mga nag-andam lamang: ang daang Israel mao ang nangandam sa “Bag-ong Israel”. Ang bag-ong katawhan sa Dios nga mao ang Simbahan mao usab ang kaugalingong “Persona” ni Jesus.

Dili kini mao ang unang higayon nga si Jesus namulong og susama niini. Mii-ngon siya nga siya mao ang tinuod nga kalan-on sa kinabuhi nga dili sama niadtong pan nga nangahulog gikan sa langit (Juan 6). Si Jesus nagkanayon usab nga siya mao ang matuod nga magbalantay (Juan 10), nga lahi kon itandi sa mga mini nga mga magbalantay 1cug ang akong Amahan maoy tig-atiman.

Kinsa man diay ang Iyang Amahan? Ug sa iyang pagtawag sa Ginoo isip Amahan si Jesus migamit sa pulong nga “Abba”, nga sa Arabiko nagkahulogan sa atong binisayang “Tatay”. Sa kadaghan sa mga teksto sa mga karaang basahon sa mga Judio, wala gayod gamita ang pulong “Abba” bisan pa sa ilang mga pag-ampo. Sa ato pa, nakapakurat o nakapaeskandalo kini niadtong mga tawo nga naminaw kang Jesus. Sa laing bahin, sa tibuok Bibliya, ang “tig-atiman sa Israel” mao gayod ang Ginoo. Mao kini ang tradisyonal nga imahen sa pagpadayag sa Gugma sa Dios ngadto sa Iyang mga katawhan (Isaias 5:1; Jeremias 2:21; Ezekiel 15:2; Hosea 10:1; Salmo 81:9).

2Putlon niya ang tanang sanga nga dili mamunga ug pul-ongan niya ang tanang sanga nga mamunga aron kini mahinlo ug mamungag daghan. Kini ang himoon sa punoan sa paras: ang mga sanga nga dili mamunga putlon ug dauban, samtang kadtong mamunga pul-ongan. Kadtong mga sanga nga dili pul-ongan manahon lamang apan walay bunga. Kon ang sanga pul-ongan, adunay ubay-ubay nga duga sa kahoy nga modagayday sa maong sanga hangtod nga mauga ang pinutlang bahin niini. Mao usab nga ang atong kasingkasing “modagayday sa mga luha” panahon sa mga pagsulay, kon atubangon nato ang mga kalisdanan.

Sa pagpul-ong daghan ang mga sanga nga “mausik”, apan pinaagi sa pag-usik niini makaplagan hinoon ang “dugang pa”. Taliwala diay sa daghang mga pag-antos, hulaton lamang nato hangtod nga moabot ang panahon sa pagpangani. Ug dinhi masabtan ra nato ang tanan. Si Jesus, nga gihigugma pag-ayo sa Amahan, mao ang unang gipul-ongan. Ang kahoy sa Krus mao ang hinungdan sa pagpamunga sa daghang mga bunga!

3Nahinlo na kamo pinaagi sa mga pulong nga akong gisulti kaninyo. Kinsa kadtong naminaw sa Pulong sa Dios makasabot sa kahulogan sa iyang kasinatian sa pagpul-ong.

4aPabilin kamo kanako ug ako magpabilin kaninyo.

Mao kini ang mga pulong nga nagha-tag sa mga nakasinati og pagsulay sa kahulogan sa maong malisod nga nahimutangan. Makaplagan nga ang mga pagsulay diay usa ka “paghinlo o paglinis” ug kini may kalabutan sa atong pagkaanaa diha kang Jesus. Ang pulong “pabilin” nagkahulogan nga kita mga tanum-sinumbak (grafted) diha kang Kristo.

4bGawas kon magpabilin kamo kanako dili kamo makabunga, ingon nga ang usa ka sanga dili makabunga gawas kon magpabilin kini sa punoan. Mipatataw si Jesus nga dili gayod mahimo nga kita mahimulag kaniya. Kay kadtong mga nahimulag kaniya mga “patay”. Wala si Jesus magpasabot nga patay kadtong nahimulag sa sunod pa nga kinabuhi, kondili patay sila bisan pa niining kinabuhia. 5aAko ang punoan sa paras, ug kamo ang mga sanga. Ang magpabilin kanako ug ako diha kaniya mamungag daghan…

Mamungang daghan! Mao kini ang sugyot ni Jesus alang sa matag-usa kanato. Apan ang pagpamunga og daghan nagasukad sa atong pagpabilin diha kaniya. 5b… kay kon wala ako wala kamoy mahimo. 6Ang dili magpabilin kanako mahisama sa usa ka sanga nga ibalibag ug malaya; pamuniton kini ug daoban. Paminaw pag-ayo niini ug sabta ang kahulogan niini! 7Kon magpabilin kamo kanako… makapangayo kamog bisan unsa ug madawat ninyo kini. Ang atong pag-ampo mahimo lamang magmabungahon kon anaa kita nagpabilin uban kang Jesus. 8Sa inyong pagpamungag daghan kapasidunggan ang akong Amahan, ug sa ingon niini kamo mahimong akong mga tinun-an.” Pagkakahibulongan gayod sa Gugma tali sa Dios ug kanato, alang niadtong mituo niini!