EBANGHELYO (Lukas 4:1-13)

1Si Jesus nga puno sa Espiritu Santo mibiya sa Jordan. Unya gidala siya sa Espiritu Santo ngadto sa kamingawan, ug didto gitintal siya sa Yawa sulod sa kap-atan ka adlaw. 2Niining panahona wala mokaon si Jesus busa gigutom siya. 3Unya giingnan siya sa Yawa, "Kon Anak ka sa Dios, himoang pan kining bato.” 4Si Jesus mitubag, "Ang Kasulatan nag-ingon, ‘Dili mabuhi ang tawo sa pan lamang.'” 5Unya gidala siya sa Yawa ngadto sa itaas ug sa usa ka pagpamilok gipakitaan siya sa tanang gingharian sa kalibutan. 6Miingon ang Yawa kaniya, "Ihatag ko kanimo kining tanang gahom ug bahandi. Kining tanan gitugyan kanako ug ako makahatag niini kang bisan kinsa nga gusto kong hatagan. 7Maimo unya kining tanan kon moluhod ka sa akong atubangan." 8Si Jesus mitubag, "Ang Kasulatan nag-ingon, 'Simbaha ang Ginoo nga imong Dios ug siya lamang ang alagari!'” 9Unya gidala siya sa Yawa ngadto sa Jerusalem ug gipahiluna siya sa kinatas-ang bahin sa Templo, ug giingnan siya, "Kon ikaw Anak sa Dios, ambak ngadto sa ubos. 10Kay nag-ingon man ang Kasulatan, 'Ang Dios magsugo sa iyang mga anghel sa pagbantay pag-ayo kanimo.' 11Kini nag-ingon usab, 'Sapnayon ka nila sa ilang mga kamut aron dili madugmok sa bato bisan gani ang imong tiil.'” 12Si Jesus mitubag, "Ang Kasulatan nag-ingon, 'Ayaw tintala ang Ginoo nga imong Dios!'” 13Human si Jesus tintala sa Yawa sa tanang paagi, mibiya kaniya ang Yawa sa makadiyot. Ang Ebanghelyo sa Ginoo.

KAHULOGAN SA EBANGHELYO (Lukas 4:1-13)

1aSi Jesus nga puno sa Espiritu Santo mibiya sa Jordan. Unya gidala siya sa Espiritu Santo ngadto sa kamingawan…

Si Jesus milusad og usa ka laing yugto sa iyang kinabuhi. Sa milabay nga panahon nailhan siya nga panday gikan sa balangay sa Nasaret. Dungan sa iyang bunyag, gibistihan siya sa pagka-Propeta. Napuno siya sa Espiritu Santo ! Apan sa wala pa niya sugdi ang iyang misyon nabati niya nga mag-inusara siya didto sa kamingawan. Buot siya nga mag-ampo, mamalandong, ug mopili sa mga saktong kahimanan nga iyang gamiton sa iya unyang mga umaabot nga buluhaton. Ang panahon sa kwaresma maoy kahigayonan alang sa pag-ampo, pagpamalandong, pagbaton og balaang kahilom kay walay tinuod nga espirituhanong kinabuhi nga moabot ngadto sa kalampusan kon wala kini sila. Aduna ba akoy kasibot nga himoon ko kining panahon sa kwaresma alang niini? 1bug didto gitintal siya sa Yawa sulod sa kap-atan ka adlaw. Matud ni Lukas, ang “tentasyon” o pagsulay nga nasinati ni Jesus mikabat usab og kap-atan ka mga adlaw didto sa kamingawan. Tinuod gayod nga ang panahon sa “pag-ampo” panahon usab sa pagsulay o testing o trials. Ang pulong nga “pagsulay” nagdala og positibo nga kahulogan. Ang pagsulay (to test) sa kaugalingon mao ang pagsusi kon anaa bay igong kapasidad sa pagbuhat. Sama sa “pagsulay sa makina” kana nagkahulogan og pagsusi sa andar sa makina ug pagtino kon ang maong makina may kakayahan ba. Ang tuyo sa “pagsulay” mao ang kadaugan batok sa unsay giatubang nga hagit. Mao nga nag-ampo kita sa pag-ingon: “Dili mo kami itugyan sa panulay hinunoa luwasa kami sa dautan.”

2Niining panahona wala mokaon si Jesus busa gigutom siya.

Ang “pagpuasa” makapagutom! Ang pagpuasa gihimo sa tanang mga relihiyon. Ngano man? Kay kon anaa ang pagpalabi sa bisan unsay gihimo, kana mahimo mang dautan, sama sa pagkaon o pag-inum. Busa kinahanglan ang pagpanton sa kaugalingon. Ang pagpuasa mao ang pagpakita nga ang tawo adunay pagkontrol sa kaugalingon o self-mastery. Kon ang tawo kawad-an niining kontrol sa kaugalingon mahimo siyang huyang ug walay karakter. Ang tawo nga adunay baroganan dili gayod magpadala sa iyang mga tawhanong panginahanglan. Siya hinoon ang modisiplina niini.

3Unya giingnan siya sa Yawa, "Kon Anak ka sa Dios, himoang pan kining bato.”

Mao kini ang UNANG TENTASYON. Ang pagsulay pinaagi sa kagutom masinati sa tanang mga tawo. Iya sa tawo ang kagutom ug ang pag-alim niini. Apan kondili kita magbantay ang kagutom mao na hinoon ang magbuot kon unsay buhaton aron mawagtang kini. Sama sa nahitabo sa daghang mga tawo sa atong panahon karon nga naulipon sa gitawag og consumerist society o kinahanglan nga kini angkonon bisan kon sa tinuod wala kinahanglana. Mao nga anaa ang panghitabo nga daghan ang nagpalabig pabusog sa kaugalingon, apan wala maglantaw nga sa palibot anaay daghang mga gigutom!

4Si Jesus mitubag, "Ang Kasulatan nag-ingon, ‘Dili mabuhi ang tawo sa pan lamang.'”

Ang kinabuhi wala magsalig sa unsay atong gikaon lamang tungod kay kon atong kutikutihon sa pagsusi aduna pay daghang angay angkonon aron kahatagan og kinabuhi ang tawo. Anaa pa ang mga diwa nga espirituhanon nga angay batonan. 5Unya gidala siya sa Yawa ngadto sa itaas ug… gipakitaan siya sa tanang gingharian sa kalibutan. 6Miingon ang Yawa kaniya, "Ihatag ko kanimo kining tanang gahom ug bahandi… 7Maimo unya kining tanan kon moluhod ka sa akong atubangan." IKA-DUHANG TENTASYON. Ang pagsulay sa gahum nga lumalabay. Gidid-an ni Jesus sukad pa sa sinugdanan ang iyang kaugalingon sa pagpanag-iya sa gahum nga lumalabay—sama sa pagkahari nga kalibutanon. Mipili hinoon si Jesus sa pagka-huyang (1 Corinto 1:27 ) ug sa pagsapnay sa krus.

8Si Jesus mitubag, "Ang Kasulatan nag-ingon, 'Simbaha ang Ginoo nga imong Dios ug siya lamang ang alagari!'” Dili nato himoon nga ang mga butang sa kalibutan maoy atong himoong dios! Aduna lamay usa ka matuod nga Dios nga angay sa atong pagsimba. Ug kini mao ang Dios nga gipadayag ni Jesus kanato! 9Unya gidala siya sa Yawa… ug gipahiluna siya sa kinatas-ang bahin sa Templo, ug giingnan siya, "Kon ikaw Anak sa Dios, ambak ngadto sa ubos…” IKA-TULONG TENTASYON. Mao kini ang kanunay nga natagboan ni Jesus sa tibuok niyang pagwali. Ang mga tawo buot mangayo gikan kaniya og “milagro” o timailhan (Lk 11:29 ; 11:16 ; 21:7) 12Si Jesus mitubag, "Ang Kasulatan nag-ingon, 'Ayaw tintala ang Ginoo nga imong Dios!'” Usahay kita mismo mao ang misulay sa Ginoo. Kon walay “milagro” o timaan nga gikan sa Ginoo sa mga butang nga buot natong iyang ipatuman diha kanato, dili kita mutuo! Angay unta: Ang matuman mao gayod ang kabubut-on sa atong Dios!