advertisement
EDITORIAL

Making up for the lost time

CARTOON
Opinion
Archived Issues
O P I N I O N

email: joesum@mozcom.com

Pyesta sa Santo Nino (C) Enero 21, 2007

EBANGHELYO (Lukas 2:41 -52)

41Matag tuig moadto sa Jerusalem ang mga ginikanan ni Jesus aron pagsaulog sa Pangilin sa Pagsaylo. 42Sa ikanapulog-duha na ka tuig si Jesus, nangadto sila sa pangilin ingon sa naandan. 43Sa pagkatapos sa adlaw sa pangilin namauli sila, apan nagpabilin sa Jerusalem ang bata nga si Jesus. Wala mahibalo niini ang iyang mga ginikanan; 44nagtuo sila nga nahiuban si Jesus sa panon, ug sa nakalakat na silag usa ka adlaw, gipangita nila siya didto sa ilang mga paryenti ug mga higala. 45Apan wala siya nila hikaplagi, busa mibalik sila sa Jerusalem sa pagpangita kaniya. 46Sa ikatulo ka adlaw hikaplagan nila siya didto sa Templo, naglingkod uban sa mga magtutudlo, namati kanila ug nangutana. 47Ang tanan nga nakadungog kaniya nahibulong sa iyang maalamong mga tubag. 48Nahibulong ang iyang mga ginikanan sa pagkakita nila kaniya, ug miingon ang iyang inahan kaniya, “Anak, nganong gibuhat mo man kini kanamo? Ako ug ang imong amahan nabalaka pag-ayo nga nangita kanimo.” 49Mitubag siya, "Nganong nangita pa man kamo kanako? Wala ba kamo masayod nga kinahanglang anhi gayod ako sa balay sa akong Amahan?" 50Apan wala sila makasabut sa iyang gisulti kanila. 51Mipauli si Jesus sa Nazaret uban kanila, ug nagmasinugtanon siya kanila. Kining tanan gitipigan sa iyang inahan sulod sa iyang kasingkasing. 52Ug mitubo si Jesus sa lawas ug sa kinaadman, ug gikahimut-an siya sa Dios ug sa mga tawo. Ebanghelyo sa Ginoo.

KAHULOGAN SA EBANGHELYO (Lukas 2:41 -52)

41Matag tuig moadto sa Jerusalem ang mga ginikanan ni Jesus aron pagsaulog sa Pangilin sa Pagsaylo. Usa kini ka labing mahinungdanong saysay niining maong bahin sa Ebanghelyo. Gisugo sa balaod nga ang tanang hamtong nga lalaking Judio nga nagpuyo sulod sa dapit nga may gilay-ong napulog lima (15) ka milya gikan sa Jerusalem kinahanglan nga moapil sa kasaulogan sa Pangilin sa Pagsaylo. Bisan sa atong panahon karon, maoy tinguha sa matag Judio sa bisan asang dapit sa kalibutan nga makasalmot bisan og makausa sa maong kasaulogan didto ra gayod sa Jerusalem sulod sa tibuok niyang kinabuhi o lifetime. 42Sa ikanapulog-duha na ka tuig si Jesus, nangadto sila sa pangilin ingon sa naandan.

Ang batang lalaki nga Judio pagaisipon nga hamtong sa iyang pag-abot og napulog-duha (12) ka tuig ang pangidaron. Nianang higayona, ang bata mahimong anak sa balaod ug mao nga kinahanglan sugdan niya ang pag-apil sa maong kasaulogan. Mao nga si Jesus mikuyog sa iyang mga ginikanan aron sa pag-apil. Dinhi atong maaninaw kon unsa ang gibating kahinam ni Jesus sa iyang pagsulod sa balaang dakbayan. Nadani siya sa mga balaang rituwal nga gisaulog sulod sa Templo. 43Sa pagkatapos sa adlaw sa pangilin namauli sila, apan nagpabilin sa Jerusalem ang bata nga si Jesus. Wala mahibalo niini ang iyang mga ginikanan; 44nagtuo sila nga nahiuban si Jesus sa panon, ug sa nakalakat na silag usa ka adlaw, gipangita nila siya didto sa ilang mga paryenti ug mga higala. 45Apan wala siya nila hikaplagi, busa mibalik sila sa Jerusalem sa pagpangita kaniya.

Samtang mipauli na ang iyang mga ginikanan, si Jesus nagpabilin sa Jerusalem . Dili tinuyoan nga wala nila mapanid-i ang pagkawala ni Jesus sa ilang panon. Nabatasan nga may nilaing pundok sa mga babaye ug sa mga lalaki sa pagpanaw. Gumikan sa kaluya sa ilang paglakaw, kasagaran mag-una ang pundok sa babaye sa pagpanaw kay sa mga lalaki. Adto na sa dapit nga sila mopahulay sa kagabihihon nga ang duha ka mga pundok managkit-anay. Unang higayon nga si Jesus misalmot sa maong panaw, busa nagtuo si Jose nga atua si Jesus uban kang Maria. Si Maria nagtuo usab nga si Jesus mikuyog kang Jose.

Diha pa nga sila miabot na sa ilang pahulayanan panahon sa kagabihihon nga si Maria ug si Jose nakaalinggat sa pagkawala ni Jesus. Niining higayona mibalik sila sa Jerusalem aron pagpangita kaniya. 46Sa ikatulo ka adlaw hikaplagan nila siya didto sa Templo, naglingkod uban sa mga magtutudlo, namati kanila ug nangutana. Sulod sa panahon sa maong kapistahan, nahimong usa ka tradisyon nga ang mga magtutudlo sa balaod managtapok atubangan sa mga katawhan sa dakong hawanan sa templo aron paghimog diskusyon, atubangan sa tanan nga buot maminaw sa mga pangutana ug tubag kabahin sa ilang tinuohan. Taliwala sa maong panghitabo nga si Jose ug si Maria nakakaplag kang Jesus. Dili nato hunahunaon nga gipakita ni Jesus ang iyang labaw nga kahibalo kon itandi sa mga gulang nga mga magtutudlo panahon sa ilang panag-inambitay sa mga kasayoran sa ilang tinuohan. Ang pagpaminaw ug ang pagpangutana maoy usa ka naandan nga panghitabo sa mga Judio sa panahon nga adunay mga batan-on nga buot matudloan sa mga magtutudlo.

Hinoon si Jesus adunay gayoy gikapakita nga dili kasagarang kasayoran tungod kay nahibulong man ang mga nakadungog sa iyang maalamong mga pangutana ug tubag. 48… ug miingon ang iyang inahan kaniya, “Anak, nganong gibuhat mo man kini kanamo? Ako ug ang imong amahan nabalaka pag-ayo nga nangita kanimo.” 49Mitubag siya, "Nganong nangita pa man kamo kanako? Wala ba kamo masayod nga kinahanglang anhi gayod ako sa balay sa akong Amahan?" Ania ang usa sa mga mahinungdanong pagsaysay sa kinabuhi ni Jesus. Ang pulong nga amahan gibalhin ni Jesus isip tahod kang Jose ngadto na sa pagtahod sa Dios. Dinhi nakaplagan ni Jesus ang iyang espesyal nga kalambigitan tali kaniya ug sa Dios.

Ang mga batid sa pagtuon sa bibliya namahayag nga ang pagka-anak sa Dios ni Jesus hinayhinay nga nabatyagan ni Jesus sa iyang kaugalingon. Samtang naghigda pa siya sa pasungan ug samtang nagtutoy pa siya kang Maria, wala pa gayod sa hunahuna sa batang Jesus kon kinsa siya. Sa hinayhinay milutaw sa iyang hunahuna ug kasingkasing ang kaalam sa iyang pagkamatuod nga pagka-Dios ug pagka-Tawo. 50Apan wala sila makasabut sa iyang gisulti kanila. 51Mipauli si Jesus sa Nazaret uban kanila, ug nagmasinugtanon siya kanila. Kining tanan gitipigan sa iyang inahan sulod sa iyang kasingkasing. 52Ug mitubo si Jesus sa lawas ug sa kinaadman, ug gikahimut-an siya sa Dios ug sa mga tawo. Bisan sa pagkatugkad ni Jesus kon kinsa siya, nagpabilin siyang nakig-uban ug masinugtanon kang Maria ug Jose. Ang iyang pagka-masinugtanon mao ang nakapatubo kaniya!

1
The Bohol Sunday Post, copyright 2006, All Rights Reserved
For comments & sugestions please email: webmaster@discoverbohol.com
--About Us
--Contact Information
--HOMEpage
Front page news
Newsplus
BLCI issued 25-year franchise by NEC
Guv gives P100K to Panglao's Sinulog bid
Around Bohol
LOAY
Loay Blood Compact Execom mulls commemoration events
BILAR
Bilar town makes study of Jagna's ISWM program
TALIBON
Gallego submits equip'mt checklist
VOLUME XXI No. 28
Tagbilaran City, Bohol, Philippines
January 21, 2007 issue