EBANGHELYO (Lukas 2:41 -52)

41Matag tuig moadto sa Jerusalem ang mga ginikanan ni Jesus aron pagsaulog sa Pangilin sa Pagsaylo. 42Sa ikanapulog-duha na ka tuig si Jesus, nangadto sila sa pangilin ingon sa naandan. 43Sa pagkatapos sa adlaw sa pangilin namauli sila, apan nagpabilin sa Jerusalem ang bata nga si Jesus. Wala mahibalo niini ang iyang mga ginikanan; 44nagtuo sila nga nahiuban si Jesus sa panon, ug sa nakalakat na silag usa ka adlaw, gipangita nila siya didto sa ilang mga paryenti ug mga higala. 45Apan wala siya nila hikaplagi, busa mibalik sila sa Jerusalem sa pagpangita kaniya. 46Sa ikatulo ka adlaw hikaplagan nila siya didto sa Templo, naglingkod uban sa mga magtutudlo, namati kanila ug nangutana.

47Ang tanan nga nakadungog kaniya nahibulong sa iyang maalamong mga tubag. 48Nahibulong ang iyang mga ginikanan sa pagkakita nila kaniya, ug miingon ang iyang inahan kaniya, Anak, nganong gibuhat mo man kini kanamo? Ako ug ang imong amahan nabalaka pag-ayo nga nangita kanimo. 49Mitubag siya, "Nganong nangita pa man kamo kanako? Wala ba kamo masayod nga kinahanglang anhi gayod ako sa balay sa akong Amahan?" 50Apan wala sila makasabut sa iyang gisulti kanila. 51Mipauli si Jesus sa Nazaret uban kanila, ug nagmasinugtanon siya kanila. Kining tanan gitipigan sa iyang inahan sulod sa iyang kasingkasing. 52Ug mitubo si Jesus sa lawas ug sa kinaadman, ug gikahimut-an siya sa Dios ug sa mga tawo Ang Ebanghelyo sa Ginoo.

KAHULOGAN SA EBANGHELYO (Lukas 2:41 -52)

41Matag tuig moadto sa Jerusalem ang mga ginikanan ni Jesus aron pagsaulog sa Pangilin sa Pagsaylo.

Pinaagi sa pagsaysay sa tinuig nga pilgrimahe nga gihimo sa banay nila ni Maria ug Jose, si San Lukas mihulagway sa pagka-matuohon kanila. “Sulod sa makatulo matag tuig nga ang matag banay gisugo nga moduaw sa templo aron paghalad og sakripisyo” (Basaha sa Exodo 23:14 -17). Nagkinahanglan kini og usa ka semana nga pagbiya sa panimalay, makatulo sa matag tuig, aron sa pagtuman niining maong kasugoan. 42Sa ikanapulog-duha na ka tuig si Jesus, nangadto sila sa pangilin ingon sa naandan. Sa Israel , ang bata mosugod sa pagka-hamtong sa panuigon nga napulog-duha (12) ka tuig. Human sa mga tuig sa pagtuon sa “catechesis”, kining bataa paga-isipon nga “Barmitzvah”, nga sa ato pa “anak sa balaod”. Usa ka adlaw niana, siya pagatawgon ngadto sa dapit basahanan o lectern sulod sa templo aron sa pagbasa sa makusog nga tingog sa Torah.

43Sa pagkatapos sa adlaw sa pangilin namauli sila, apan nagpabilin sa Jerusalem ang bata nga si Jesus. Wala mahibalo niini ang iyang mga ginikanan; 44nagtuo sila nga nahiuban si Jesus sa panon, ug sa nakalakat na silag usa ka adlaw, gipangita nila siya didto sa ilang mga paryenti ug mga higala. Panghitabo nga gikahadlokan sa “Balaang Banay”! Daw usa ka butang nga dili kalikayan sa matag banay. Usa ka krisis nga pagasination sa usa ka banay: ang pagkawala sa usa ka anak.

Hinoon walay dautang tuyo si Jesus sa iyang pagka-walá. Apan sa laing bahin, kini nagpakita lamang sa “kagawasan” nga gihatag ngadto kang Jesus sa iyang mga ginikanan: nga gihatagan siya og kahigayonan sa pakig-uban sa ubang mga tawo ug ang pakig-ugoy-ugoy sa mga pundok sa mga kabataan. Dili sa tanang higayon nga siya nagkinahanglan og pagbantay sa iyang mga ginikanan. 45Apan wala siya nila hikaplagi, busa mibalik sila sa Jerusalem sa pagpangita kaniya. “Pagpangita”! Kining pulonga sa makaupat ka mga higayon gibalikbalik ni San Lukas niining maong saysay. Dinhi ang maong “pagpangita” mao ang pagpangita nga “physical” o linawas. Sa tibuok Bibliya ang “pagpangita” mao ang sentro sa panggibuhaton sa matag magtutuo, nga mao ang pagpangita ug pagkakaplag sa Dios. Sa akong kabahin, sa kanunay ako bang gipangita ang Dios? Ako ba siyang nakaplagan?

46aSa ikatulo ka adlaw hikaplagan nila siya didto sa Templo…

Dinhi si San Lukas mihimog pagdugtong sa panghitabo sa pagkawala ni Jesus didto sa Jerusalem sa panghitabo sa Kasakitan, Kamatayon ug Pagkabanhaw (Paschal Event) ni Jesus. Ania kining maong mga kadugtungan: 1) ang pagsulod sa dakbayan sa Jerusalem, 2) ang panghitabo nga mikabat sa tulo ka mga adlaw, 3) ang paghisgot mahitungod sa kabubut-on sa Amahan, 4) ang pag-walay pagsabot nila ni Maria ug Jose ug sa mga Apostoles, 5) ang pagkakaplag sa batang Jesus ug ang pagkabanhaw ni Jesus, 6) Ang pangutana nga “Nganong nangita man kamo kanako?” ug “Nganong gipangita man ninyo ang buhi diha sa mga patay?” 46b… naglingkod uban sa mga magtutudlo, namati kanila ug nangutana. 47Ang tanan nga nakadungog kaniya nahibulong sa iyang maalamong mga tubag. Alang sa mga matuohon nga mga Israelita, ang Templo mao ang usa ka balaang dapit sa Presensya sa Ginoo. Si Jesus gilarawan nga adunay talagsaong kabatid sa Balaang Kasulatan bisan sa kalinghod sa iyang panuigon. Ang mga matang sa iyang mga pangutana ug tubag maoy sukdanan sa larino nga kaalam nga iyang gikapadayag ngadto sa mga magtutudlo.

48Nahibulong ang iyang mga ginikanan sa pagkakita nila kaniya, ug miingon ang iyang inahan kaniya, Anak, nganong gibuhat mo man kini kanamo? Ako ug ang imong amahan nabalaka pag-ayo nga nangita kanimo. Samtang adunay luna sa kagawasan nga gihatag ngadto sa batang Jesus, ang iyang mga ginikanan wala usab molikay sa pag-angkon sa ilang mga kaakohan ngadto kaniya. Uban sa dakong kabalaka, ilang gipangita si Jesus. Ug buot nilang masayran ang hinungdan ngano nga si Jesus nagpabilin sa dakbayan sa Jerusalem . 49Mitubag siya, "Nganong nangita pa man kamo kanako? Wala ba kamo masayod nga kinahanglang anhi gayod ako sa balay sa akong Amahan?" 50Apan wala sila makasabut sa iyang gisulti kanila.

Mao kini ang labing unang gipamulong ni Jesus. Sulod sa katloan ka tuig, mao ra kini ang mga pulong nga gilitok nga Jesus nga gisulat sa Ebanghelyo. 51Mipauli si Jesus sa Nazaret uban kanila, ug nagmasinugtanon siya kanila. Kining tanan gitipigan sa iyang inahan sulod sa iyang kasingkasing. 52Ug mitubo si Jesus sa lawas ug sa kinaadman, ug gikahimut-an siya sa Dios ug sa mga tawo. Napulog-walo pa ka tuig ang paabuton una pa nato mahibalag pagbalik sa Jesus. Apan sulod ka kahilom, dinhi si Jesus masinugtanon sa iyang mga ginikanan nga maoy hinungdan sa iyang pagtubo.