24Si Jesus miingon sa iyang mga tinun-an, "Sa mga adlaw human sa panahon sa kasakitan, mongitngit ang adlaw ug dili na modan-ag ang bulan. 25Mangahulog gikan sa langit ang mga bitoon ug motipas sa ilang naandang agianan ang mga planeta sa kawanangan. 26Unya diha sa mga panganod makita ang Anak sa Tawo nga moabot nga may gahom ug himaya. 27Ug sugoon niya ang iyang mga anghel ngadto sa tanang suok sa kalibutan aron tigumon ang piniling katawhan sa Dios gikan sa tanang dapit. 28"Kuhai ninyo og pagtulon-an ang kahoyng igera. Inigpanghumok na sa mga sanga niini ug mangudlot na kini, inyong masayran nga duol na ang ting-init. 29Sa samang pagkaagi, inigkakita ninyo nga kining mga butanga nagsugod na paghitabo, masayran ninyo nga duol na gayod ang pagbalik sa Anak sa Tawo. 30Timan-i kini: kining tanan mahitabo sa dili pa mangamatay ang tanang tawo nga karon buhi pa. 31Ang langit ug ang yuta matapos, apan ang akong gisulti dili gayod mapakyas." 32“Apan walay nasayod kanus-a moabot kadtong adlawa o taknaa, bisan ang mga anghel sa langit, bisan gani ang Anak; ang Amahan lamang gayod maoy nasayod. Ang Ebanghelyo sa Ginoo.

KAHULOGAN SA EBANGHELYO (Markos 13: 24-32)

24a "Sa mga adlaw human sa panahon sa kasakitan,

Aron masabtan ang panultihon “panahon sa kasakitan”, angay nga balikon sa pagbasa ang mga nangaging bersikulo diin gisugilon ni Jesus ang tulo ka mga timaan nga mahitabo sa dili pa maguba ang Templo:

1. Adunay daghang mga bakakong propeta ug magpaka-mesiyas nga molimbong sa daghang mga tawo (Mk 13:5-6).

2. Adunay mga gubat, linog, kagutom ug uban pang mga katalagman (Mk 13:7-8).

3. Adunay pagpanggukod batok sa mga tinun-an ni Kristo (Mk 13:9-13).

Unya mahitabo ang “Makalilisang nga Talan-awon” nga mao ang pagkatumpag sa Templo (Mk 13:14), nga gitagna ni Propeta Daniel (Dn 9:27). Ug kini nahitabo gayod sa tuig 70 A.D.

24b mongitngit ang adlaw ug dili na modan-ag ang bulan. 25Mangahulog gikan sa langit ang mga bitoon ug motipas sa ilang naandang agianan ang mga planeta sa kawanangan.

Si Jesus migamit sa mga naandang pulong sa “apocalypses” nga anaa sa Bibliya (Isaias 13:10; 34:4, Joel 2:10, 4:15, Ezequiel 32:7). Apan dili nato sabton kini sa literal nga pagsabot. Nagtug-an lamang kini sa dili-mahubit nga kamatuoran: ang pagbalik sa karaan (primitive) nga kagubot. Gikan niini mopuli ang kabag-ohan (genesis). “… ang daan miagi na, ug miabot na ang bag-o” (2 Cor 5:17). Nagtug-an kanato ang kamatuoran sa dili-kaduhaduhang gahum sa Dios nga bisan gani ang lihok sa kinaiyahan iya mang mabut-an. 26Unya diha sa mga panganod makita ang Anak sa Tawo nga moabot nga may gahom ug himaya. Wala pa sukad masukad mahitabo—gikan pa sa iyang pagkatawo sa Belen hangtod karon—nga si Jesus mosulti kabahin sa iyang kugalingon nga sama niini. Milarawan siya sa iyang gahom ug himaya sa iya unyang pag-abot isip usa ka Maghuhukom. Siya sa walay lipodlipod miangkon sa iyang pagka-Dios! Sa ato pa, ang mga pinulongan nga apokaliptiko gigamit lamang diay aron sa paghatag og dakong pagtagad sa singgit sa paglaum (shout of hope) nga maoy natingban sa pulong Maranatha! Kini usa ka pulong nga Aramaic, ang orihinal nga sinultihan ni Jesus, nga sa ato pa, “Dali, Ginoo” (Come, Lord)!

Gituohan nato nga si Jesus mobalik pag-usab!

27Ug sugoon niya ang iyang mga anghel ngadto sa tanang suok sa kalibutan aron tigumon ang piniling katawhan sa Dios gikan sa tanang dapit. Si Jesus nga wala tuohi sa iyang kaugalingong lungsod karon mosugo na sa mga angel sa langit; ug siya nga wala gani makalawig sa mga dapit nga gawas sa Palestina karon nangahas nga iyang tapukon ang tanang katawhan sa tibuok kalibutan. Alang kang Jesus, ang labing mahinungdanon dili diay ang mga “katalagman” kondili ang “panagtigum sa mga piniling katawhan sa Dios”. 28"Kuhai ninyo og pagtulon-an ang kahoyng igera. Inigpanghumok na sa mga sanga niini ug mangudlot na kini, inyong masayran nga duol na ang ting-init. 29Sa samang pagkaagi, inigkakita ninyo nga kining mga butanga nagsugod na paghitabo, masayran ninyo nga duol na gayod ang pagbalik sa Anak sa Tawo.

Sama da nga adunay mga timaan nga ikatug-an sa tanaman sama sa igera kabahin sa pagkabalhin sa panahon, ang presensya ni Jesus maoy magdala og timaan sa “kabalhinan”, gikan sa daan ngadto sa pagka-bag-o. Matud pa, mao kini ang labing hamubo ug katapusang sambingay ni Jesus una pa siya namatay. 30Timan-i kini: kining tanan mahitabo sa dili pa mangamatay ang tanang tawo nga karon buhi pa. 31Ang langit ug ang yuta matapos, apan ang akong gisulti dili gayod mapakyas." Walay utlanan ang nahimutangan kang Jesus! Samtang ang tanan molabay o matapos, apan siya magpabilin hangtod sa kahangturan! 32“Apan walay nasayod kanus-a moabot kadtong adlawa o taknaa, bisan ang mga anghel sa langit, bisan gani ang Anak; ang Amahan lamang gayod maoy nasayod. Anus-a kini mahitabo wala niya itaho. Kay ang saktong panahon sa maong panghitabo nasayran lamang sa iyang langitnong Amahan! Ngano nga wala man itug-an ang panahon nga kini mahitabo? Aduna gayoy hi-nungdan nga ang Dios lamang ang nasayod. Gihimo kining sekreto sa Dios nga Amahan aron aduna kitay lantawon sa unahan uban sa paglaum!