oo51Ako ang pan nga gikan sa langit nga naghatag sa kinabuhi. Ang mokaon niining pan dili gayod mamatay. Ug ang pan nga akong ihatag mao ang akong unod aron mabuhi ang kalibotan.” 52Nakahaling kini ug mainit nga paglalisay sa mga Judio. “Unsaon man niining tawhana paghatag kanato sa iyang lawas aron kan-on?” nangutana sila. 53Si Jesus miingon kanila, “Sultihan ko kamo: kon dili kamo mokaon sa unod sa Anak sa Tawo ug dili moinom sa iyang dugo, dili kamo makabaton og kinabuhi. 54Ang mokaon sa akong unod ug moinom sa akong dugo may kinabuhing walay kataposan ug banhawon ko siya sa kataposang adlaw. 55Kay ang akong unod mao ang matuod nga kalan-on, ug ang akong dugo mao ang matuod nga ilimnon. 56Ang mokaon sa akong unod ug moinom sa akong dugo magpuyo dinhi kanako ug ako diha kaniya. 57Ang buhing Amahan maoy nagpadala kanako ug tungod kaniya nabuhi usab ako. Sa samang pagkaagi, ang mokaon kanako mabuhi tungod kanako. 58Busa kini mao ang pan nga gikan sa langit; dili kini sama sa pan nga gikaon sa inyong mga katigulangan ug unya nangamatay gihapon. Ang mokaon niining maong pan mabuhi sa dayon.” Ang Ebanghelyo sa Ginoo.

KAHULOGAN SA EBANGHELYO (Juan 6: 51 – 58)

51Ako ang pan nga gikan sa langit nga naghatag sa kinabuhi. Ang mokaon niining pan dili gayod mamatay. Ug ang pan nga akong ihatag mao ang akong unod aron mabuhi ang kalibotan.” Sugod sa bersekulo 51, sa unang higayon matagbuan nato, ug kini pagabalikbalikon sa pito ka higayon, ang mga pulong “unod ug dugo”… “pagkaon ug pag-inum”. Kining mga pulonga, dili kay mga simbolo lamang, kondili nagkahulogan gayod sa unsay ilang tinuoray o literal nga gipasabot. 52Nakahaling kini ug mainit nga paglalisay sa mga Judio. “Unsaon man niining tawhana paghatag kanato sa iyang lawas aron kan-on?” nangutana sila. Gidawat sa mga katawhan ang kahulogan sa maong pulong sumala gayod sa literal nga pagsabot o sumala sa unsay kahulogan niini sa ilang ordinaryong panabot. Mao nga sila nahikurat. Kon ang level o giladmon sa ilang pagsabot anaa sa pagka-simbolo lamang niini, dili unta sila makugang o mahikurat. 53Si Jesus miingon kanila, “Sultihan ko kamo: kon dili kamo mokaon sa unod sa Anak sa Tawo ug dili moinom sa iyang dugo, dili kamo makabaton og kinabuhi. Inay nga si Jesus mobali-wala sa ilang kahikurat, siya hinoon mipadayon sa pag-agak kanila ngadto sa unsa gayoy angayan nilang masabtan—kay kana man gayod ang iyang buot ipasabot. Ang pulong unod, siya midugang pa sa pulong dugo. Iyang gidapit ang tanan, dili lamang sa “pagkaon sa Iyang unod”, kondili “pag-inum usab sa Iyang dugo”.

Kon anaa ang panagtipon sa “unod ug dugo” kana masabot sa pipila ka mga paagi: Sa panabot sa mga Hudiyo, kana nagkahulogan og “kinatibuk-an sa tawo”. Naglangkob sa unsay tibuok nahuptan sa tawo: iyang kasangkapan ug iyang kakulangon. Alang usab kanila ang “dugo” maoy usa ka butang nga “balaan”. Kini mao ang “kinabuhi”. Mahimo nga sabton kini niining paagiha: kon kamo dili moinom sa Iyang kinabuhi, dili kamo makabaton og tunhayng kinabuhi.

Ang mga elemento nga “lawas ug dugo” makapahinundum nato sa Iyang kamatayon sa Kruz aron sa pagluwas kanato. Nakit-an nang daan ni Jesus ang pagkamahinungdanon sa Iyang pagpalansang sa iyang “lawas” ug pagpaula sa Iyang “dugo” aron siya makaluwas sa tawo. 54Ang mokaon sa akong unod ug moinom sa akong dugo may kinabuhing walay kataposan ug banhawon ko siya sa kataposang adlaw.

Dili nato hikalimtan nga kining maong saysay sa Ebanghelyo gisulat ni San Juan sa mga tuig 90 ngadto sa 100, nga sa ato pa, gisaulog na ang Eyukaristiya sulod sa 60 na ka mga tuig. Mao nga ang mga nakabasa niini modugtong gayod sa mga pulong “lawas” ug “dugo” o “kaon” ug “inum” sa Eyukaristiya.

Ang gitudlo ni Jesus niining bahina sa Ebanghelyo ngadto sa iyang mga Apostoles maoy nakapatugkad nila sa hustong kahulogan sa panghitabo sa “Katapusang Panihapon”. Si Jesus diay nag-andam sa mga Apostoles pinaagi sa pagtudlo nila bahin sa iyang “lawas” isip “pagkaon” ug sa iyang “dugo” isip “imnunon” aron masabtan ra unya nila ang kahulohan sa Katapusang Panihapon.

55Kay ang akong unod mao ang matuod nga kalan-on, ug ang akong dugo mao ang matuod nga ilimnon. Si San Juan walay taho sa detalye nga panghitabo panahon sa Katapusang Panihapon. Apan ang mga pulong nga iyang gigamit susama gayod sa mga sinulat nga Ebanghelyo sumala nila ni Mateo, Markos ug Lukas.

Unya, si Jesus mitug-an sa tulo ka mga epekto sa Eyukaristiya niadtong mga tawo nga motuo ug modawat niini diha sa sakramento sa Pagkalawat: Ang kahiusahan tali kang Cristo ug mga Kristohanon: 56Ang mokaon sa akong unod ug moinom sa akong dugo magpuyo dinhi kanako ug ako diha kaniya. Ang kadugtungan sa atong kaugalingon ngadto sa Amahan: 57Ang buhing Amahan maoy nagpadala kanako ug tungod kaniya nabuhi usab ako. Sa samang pagkaagi, ang mokaon kanako mabuhi tungod kanako. Ang kinabuhing dayon: 58Busa kini mao ang pan nga gikan sa langit; dili kini sama sa pan nga gikaon sa inyong mga katigulangan ug unya nangamatay gihapon. Ang mokaon niining maong pan mabuhi sa dayon.”