EBANGHELYO (Lukas 13:1-9)

1Niadtong higayona may mga tawo didto nga misugilon kang Jesus mahitungod sa mga taga-Galilea nga gipamatay ni Pilato samtang naghalad sila ngadto sa Dios. 2Apan miingon si Jesus kanila, “Tungod kay gipamatay kining mga tawhana sa maong paagi, gisabot ba ninyo nga labaw pa sila ka makasasala kay sa ubang Galilyanhon? 3Dili! Sultihan ko kamo nga kondili kamo maghinulsol ug mobiya sa inyong mga sala, mangamatay usab kamong tanan sama kanila. 4Mahitungod niadtong napulog-walo nga nangamatay didto sa Siloam kay natumpagan sa tore, gipakaingon ba ninyo nga kadto sila mas dautan pa kay sa tanang molupyo sa Jerusalem? 5Dili! Sultihan ko kamo nga kondili kamo maghinulsol ug mobiya sa inyong mga sala, mangamatay usab kamong tanan sama kanila."

6Unya misulti si Jesus kanila niining sambingaya: "May usa ka tawo nga may kahoyng igera diha sa iyang parasan. Miadto siya aron sa pagpangita og bunga niini, apan wala siyay nakaplagan. 7Busa miingon siya sa iyang hardinero, ‘Tan-awa ra, tulo na karon ka tuig nga nag-anhian ako dinhi aron pagpangitag bunga niining kahoya, apan wala gayod akoy nakaplagan bisag usa . Busa putla kini kay nag-usik lamang sa katambok sa yuta.' 8Apan ang hardinero mitubag, 'Pasagdi una, sir, bisan niining tuiga na lamang; kay akong libotan og kubkob ang punoan ug unya akong abunohan. 9Kon mobunga kini sa sunod tuig, maayo; apan kondili, ipaputol kini.' ” Ang Ebanghelyo sa Ginoo.

KAHULOGAN SA EBANGHELYO (Lukas 13:1-9)

1Niadtong higayona may mga tawo didto nga misugilon kang Jesus mahitungod sa mga taga-Galilea nga gipamatay ni Pilato samtang naghalad sila ngadto sa Dios.

Si Jesus nagpuyo sa iyang panahon diin nahitabo ang mga pag-asdang o rebolusyon nga politikal. Gisaysay kining maong hitabo ngadto kang Jesus sa usa ka tuyo nga ilang mahibaloan kon hain moanib si Jesus: Iya bang kondenahon si Pilato ug ang mga sundalo niini nga mipatay sa mga taga-Galilea nga naghalad sulod sa templo? O kondenahaon ba niya kadtong lider sa rebolusyon nga mitukmod sa mga taga-Galilea sa pakigbisog? Matingala kita nga si Jesus wala gayod mohimog paghukom sa maong panghitabo. Ang gihisgotan ni Jesus dili ang isyu sa revolusyon kondili ang isyu kabahin sa sala, sa kausaban sa kinabuhi, ug ang hinungdan sa kaayohan ug kadautan sa kalibutan.

2Apan miingon si Jesus kanila, “Tungod kay gipamatay kining mga tawhana sa maong paagi, gisabot ba ninyo nga labaw pa sila ka makasasala kay sa ubang Galilyanhon? 3aDili! Si Jesus milikay sa naandang panghunahuna nga nagtuo nga ang matang sa silot maoy sukaranan sa gibug-aton sa sala. Sa gitudlo ni Jesus, siya nagpasabot nga walay koneksyon o kalabutan ang dautan nga moabot sa tawo ug sa iyang nahimong sala. Wala magpasabot nga kon ang tawo nabuta, sa ato pa, mas makasasala siya kay sa mga wala o dili buta (Juan 9:2).

3bSultihan ko kamo nga kondili kamo maghinulsol ug mobiya sa inyong mga sala, mangamatay usab kamong tanan sama kanila. Ang mitaho sa balita buot unta nga mosulay kang Pilato, apan sa gipamulong ni Jesus sila na man hinoon ang gisulay. Sama da nga si Jesus mihagit kanila, “Nagtuo ba kamo nga kadtong mga taga-Galilea mas makasasala pa kay kaninyo?”. Sa hunahuna ni Jesus dili na kinahanglan nga ipahid pa sa ubang tawo, kondili atubangon hinoon ang tagsatagsa ka kaugalingong tanlag, “Kamo mismo nagkinahanglan og kabag-ohan.” Gipasangil ba nimo sa uban ang imong nahimutangan? O andam ba usab ikaw nga moangkon nga ikaw kabahin sa maong sala? 4Mahitungod niadtong napulog-walo nga nangamatay didto sa Siloam kay natumpagan sa tore, gipakaingon ba ninyo nga kadto sila mas dautan pa kay sa tanang molupyo sa Jerusalem ? 5aDili!

Karon, si Jesus na mismo ang mipahinumdum kanila bahin sa hitabo didto sa Siloam. Daghan ang nagtuo nga ang dautang panghitabo gikan sa Ginoo. Nga ang mga dautang panghitabo maoy silot sa sala. Sa iyang walay kinutubang kaayo ang Dios dili mohatag og dautan (evil). Ang dautan maoy resulta sa dili kalikayan nga kakulangon sa kinaiyahan. Inay nga ipasumangil sa Dios ang nahitabong mga dautan, sama sa disgrasya, ato unang susihon ang atong kaugalingon kay ang sabog nga mahitabo mao nga ang dautan o disgras-ya nahitabo tungod sa walay igong pagpakabana sa tawo. Si Jesus nakigharong batok sa dautan.

5bSultihan ko kamo nga kondili kamo maghinulsol ug mobiya sa inyong mga sala, mangamatay usab kamong tanan sama kanila." Ang kamatayon nga gihisgotan ni Jesus dili ang kamatayon sa lawas, kondili sa kamatayon sa kalag gumikan sa pagpatuyang sa pagpakasala. Usa kini ka balaang pagpadayag sa kamatuoran sa Pagtuo o revelation of Faith. Si Jesus mipabalik kanato sa atong kaugalingong tanlag o konsiyensya. Ato kining hilngon. Adunay pasidaan sa umaabot nga paghukom. Kon magmagahi kita sa pagbiya sa sala adunay nag-hulat nga silot sa kamatayon—kamatayong dayon! Ang hagit ni Jesus makapabukas kanato sa kaluoy sa Dios!

6… "May usa ka tawo nga may kahoyng igera diha sa iyang parasan. Miadto siya aron sa pagpangita og bunga niini, apan wala siyay nakaplagan. 7Busa miingon siya sa iyang hardinero, ‘Tan-awa ra, tulo na karon ka tuig nga nag-anhian ako dinhi aron pagpangitag bunga niining kahoya, apan wala gayod akoy nakaplagan bisag usa . Busa putla kini kay nag-usik lamang sa katambok sa yuta.'

Sa modernong panahon karon daw gipatuo kanato nga wala nay sala, busa dili na angay kitang mahadlok sa Dios! Ang sambingay maoy nagtug-an kanato nga anaa gayod ang kamatuoran sa sala—ang walay pagpamunga. Busa kay naay sala, angayan nga putlon. Aduna bay pagpamunga sa akong kinabuhi? O nagpasagad ba lamang ako bisan kon nasayod ako nga ako walay pagpamunga? 8Apan ang hardinero mitubag, 'Pasagdi una, sir, bisan niining tuiga na lamang; kay akong libotan og kubkob ang punoan ug unya akong abunohan. 9Kon mobunga kini sa sunod tuig, maayo; apan kondili, ipaputol kini.' ” Adunay hardinero nga natingban sa Gugma alang sa iyang halaman. Kini mao si Jesus nga wala moanhi alang sa mga matarong kondili alang sa mga makasasala (Lk 15). Ang hagit ni Jesus alang lamang gayod nga kita mahigmata sa kamatuoran nga kita makasasala.