EBANGHELYO: (Lukas 5:1-11):

1Usa ka adlaw niana, nagtindog si Jesus sa daplin sa Lanaw sa Genesaret samtang nag-ilogay ang mga tawo pagduol kaniya aron pagpamati sa pulong sa Dios. 2Didto sa lapyahan nakita niya ang duha ka sakayan nga gibiyaan sa mga mangingisda, kay nagwaswas man sila sa ilang mga pukot 3Miluwan si Jesus sa usa niining sakayan nga iya ni Simon ug gihangyo niya si Simon sa pagtulod niini og diyotay ngadto sa tubig. Unya milingkod si Jesus sa sakayan ug gitudloan niya ang mga tawo. 4Sa nakahuman na siyag sulti, giingnan niya si Simon, “Palawod kamo ug itaktak ang inyong mga pukot aron makakuha kamo.” 5Si Simon mitubag, "Magtutudlo, naghago kami sa tibuok gabii ug wala kami nakuha, apan kay nagsugo ka man, akong itaktak ang mga pukot" 6Ilang gitaktak ang mga pukot ug hilabihan kadaghang isda ang ilang nakuha nga tungod niini ang ilang mga pukot hapit na magisi. 7Busa gikamay nila ang ilang mga kauban didto sa laing sakayan aron moduol ug motabang kanila. Nanuol ang ilang mga kauban ug ilang gipuno pag-ayo sa isda ang duha ka sakayan, nga tungod niini hapit na sila malunod. 8Pagkakita ni Simon Pedro sa nahitabo, miluhod siya sa atubangan ni Jesus ug miingon, "Palayo kanako, Ginoo, kay makasasala ako!" 9Natingala siya ug ang iyang mga kauban sa kadaghan sa isda nga ilang nakuha. 10Natingala usab sila si Santiago ug si Juan, ang mga anak ni Sebedeo. Unya miingon si Jesus kang Simon, “Ayaw kahadlok; sukad karon managat ka na og mga tawo." 11Ug gidahik nila ang mga sakayan, ug gibiyaan ang tanan ug misunod sila kang Jesus. Ang Ebanghelyo sa Ginoo.

KAHULOGAN SA EBANGHELYO (Lukas 5:1-11)

1Usa ka adlaw niana, nagtindog si Jesus sa daplin sa Lanaw sa Genesaret samtang nag-ilogay ang mga tawo pagduol kaniya aron pagpamati sa pulong sa Dios. Si Jesus gilibutan sa panon sa mga katawhan. Namulong. Gipaminaw. Wala siyay laing gihisgotan kondili ang gamhanang pulong sa Ginoo. Si Lukas, nga usa ka batid sa teolohiya, mitug-an kanato sa labing unang kaakohan sa Simbahan nga mao ang pagwali! Ang gihimong pagwali sa Simbahan maoy usa ka sumpay sa gisugdan ni Jesus. Ug ang unod sa maong pagwali walay panaglahi.

Gipaminaw ba nako ang mga wali?

2Didto sa lapyahan nakita niya ang duha ka sakayan… 3Miluwan si Jesus sa usa niining sakayan nga iya ni Simon… Unya milingkod… ug gitudloan niya ang mga tawo. Usa ka talan-awon nga subay gayod sa tinuod nga panghitabo sa kinabuhi. Apan usab naglarawan og usa ka simbolo. Mipalayo siyag dyutay gikan sa panon aron sa pagsimbolo sa iyang “pagka-alagad” (servanhood). Nanudlo siya nga naglingkod sama sa rabbi o guru. Gitudloan niya ang mga tawo gikan sa “sakayan ni Pedro”.

Si Lukas, sa usa ka tinuyo nga paagi, mihatag og dakong pagtagad kang Pedro kansang ngalan gibalik sa unom ka higayon niining bahina sa iyang saysay. Dinhi nagsukad ang estruktura sa Simbahan nga gibut-an ni Jesus. Ang apostolikanhon nga estruktura nga atong makita sa atong panimbahan karon nagasukad pa sa panahon ni Jesus. Ang mga nangulo (leaders) niini dili mao ang anaa sa itaas nga pagkahimutang kondili mao ang pagpaubos isip alagad (servants) sa ngalan ni Jesus. Ang awtoridad sa Simbahan kinahanglan nga paminawon sama sa pagpaminaw kang Jesus nga naglingkod sa sakayan ni Pedro.

4… giingnan niya si Simon, “Palawod kamo ug itaktak ang inyong mga pukot aron makakuha kamo.” “Eis to bathos” sa Griego. “Duc in altum” sa Latin. “Put out into the deep” sa Iningles. Ang mga kaliwat sa mga katawhan nga gitawag og Semite — nga nahiapil ang mga Israelita — naghupot og pagtuo nga ang dagat maoy usa ka dapit sa kakuyaw (terror), nga iya sa mga monsters (Genesis 7:17, Salmo 24:2, 74:13-14, Job 38:16; Jonas 2:21; Gipadayag 9:1-3; 13:1, 20:3). Gipasabot dinhi nga ang misyon sa Simbahan adto gayod sa mga situwasyon nga anaa ang kakuyaw. Kinahanglan nga biyaan ang kahayahay o kasayon aron atubangon ang kalisod ug kakuyaw. 5Si Simon mitubag, "Magtutudlo, naghago kami… ug wala kami nakuha, apan kay nagsugo ka man, akong itaktak ang mga pukot."

Ang misyon sa Simbahan labaw pa kay sa unsay kaya sa kusog ug gahum sa tawo. Busa kinahanglan ang pagpaminaw sa gipamulong sa Ginoo ug pagtuman niini. Ang kusog ug gahum sa Simbahan wala magagikan sa tawo kondili gikan sa Dios! Ang daw imposible sa tawo mahimong posible sa Dios. 6Ilang gitaktak ang mga pukot ug hilabihan kadaghang isda ang ilang nakuha nga… ang… pukot hapit na magisi. 7… gikamay nila ang ilang mga kauban… aron motabang kanila. Nanuol ang ilang mga kauban ug ilang gipuno pag-ayo sa isda ang duha ka sakayan, nga tungod niini hapit na sila malunod.

Si Lukas mihatag og dugang gibug-aton niining talagsaong nahitabo: ang pagkakuha og daghang isda. Iyang gihulagway nga 1) ang pukot hapit na magisi, 2) nagkinahanglan silag dugang tabang, 3) duha ka sakayan puno pag-ayo sa isda, ug 4) hapit sila malunod. Ang kalampusan sa Simbahan nagagikan sa iyang pagtuo sa pulong ni Jesus. Gipamalandongan kini ni Pedro si tibuok niyang kinabuhi, nga bisan pa sa iyang pagka-experto isip mananagat apan walay siyay igong mahimo kon walay tabang gikan kang Jesus. Mao usab kini sa atong tawhanong paningkamot. Wala kitay mahimo kon walay tabang sa Dios! 8Pagkakita ni Simon Pedro sa nahitabo, miluhod siya… ug miingon, "Palayo kanako, Ginoo, kay makasasala ako!" 9Natingala siya… Ang tawo sa kanunay makasinati, diha sa presenya sa Dios, og balaang katingala (sacred awe)!

Samtang ang mga lumulopyo sa Nasaret nangayo og dugang nga katingalahan gikan kang Jesus, si Pedro hinoon, isip matuod nga sumusunod kang Jesus, nakatugkad sa iyang pagka-dili takos gumikan sa iyang pagkamakasasala. 10… “Ayaw kahadlok; sukad karon managat ka na og mga tawo." Gitataw ni Jesus ang misyon sa Simbahan! Usa ka misyon nga nagapadayon hangtod karon. 11… ug gibiyaan ang tanan ug misunod sila kang Jesus. Ang matuod nga milagro wala diha sa kadaghan sa mga isda, kondili sa ilang paghukom sa pagbiya sa tanan aron sa pagsunod kang Jesus!