oo

1Sa ikatulo ka adlaw may kasal didto sa lungsod sa Cana, sa Galilea, ug didto ang Inahan ni Jesus. 2Gidapit usab si Jesus ug ang iyang mga tinun-an. 3Sa nahutdan na silag bino, ang Inahan ni Jesus miingon kaniya, "Wala na silay bino." 4Si Jesus mitubag, "Babaye, ayaw akog tudloi kon unsay akong buhaton. Wala pa moabot ang akong panahon," 5Unya giingnan sa Inahan ni Jesus ang mga sulugoon, "Buhata ninyo bisan unsay iyang isugo kaninyo." 6Ang mga Judio may mga tulomanon sa ilang tinuohan labot sa pagpanglinis, ug tungod niini didtoy gibutang nga unom ka tadyawng bato nga sudlanan og tubig; ang matag usa kasudlan og kawhaan ngadto sa katloan ka galon nga tubig. 7Si Jesus miingon sa mga sulugoon, "Pun-a ninyog tubig kining mga tadyaw." Ug ila kining gipuno. 8Unya miingon siya kanila, "Kab-a ang tubig ug dad-a ngadto sa tinugyanan sa kombira." Ug gidala nila kini ngadto kaniya, 9ug iyang gitilawan ang tubig nga nahimo nang bino. Wala siya masayod kon diin gikan ang maong bino (apan nasayod ang mga sulugoon nga maoy nagkabo sa tubig); busa gitawag niya ang bana 10ug giingnan, "Nabatasan sa kadaghanan ang pagdalit pag-una sa labing maayong bino, ug kon makainom na pag-ayo ang mga bisita, anha pa idalit ang bino nga dili maayo kaayo; apan karon pa nimo idalit ang labing maayong bino!" 11Gihimo ni Jesus kining una niyang milagro didto sa Cana , sa Galilea. Didto gipadayag niya ang iyang himaya ug nanuo kaniya ang iyang mga tinun-an. Ang Ebanghelyo sa Ginoo.

KAHULOGAN SA EBANGHELYO (Juan 2:1-11)

1Sa ikatulo ka adlaw may kasal didto sa lungsod sa Cana , sa Galilea, ug didto ang Inahan ni Jesus. Niadtong panahona, sa pagsulat niining maong saysay ni San Juan , ang linyang “sa ikatulo ka adlaw” maoy nagpahinumdum kanila kabahin sa “adlaw nga mao ang Himaya ni Jesus”, ang Pagkabanhaw (tan-awa sa Mateo 16:21 ; 17:23 ; 20:19 ; Lukas 9:22 ; 18:33 ; 24:7; Buhat 10:40 .

2Gidapit usab si Jesus ug ang iyang mga tinun-an.

Sa Ebanghelyo ni San Juan , ang ngalan ni Maria gisulat sa duha lamang ka panahon. Una. Sa kasal sa Cana , nga mao ang saysay karon. Ikaduha. Sa saysay sa nahitabo sa tiilan sa Kruz. Sa ubang bahin sa iyang Ebanghelyo wala niya isulat ang ngalang Maria kondili iyang gisulat ang relasyon tali ni Jesus ug Maria isip “iyang inahan.” 3Sa nahutdan na silag bino, ang Inahan ni Jesus miingon kaniya, "Wala na silay bino." 4Si Jesus mitubag, "Babaye, ayaw akog tudloi kon unsay akong buhaton. Wala pa moabot ang akong panahon,"

“Ang Panahon ni Jesus” maoy laing linyang paskuwa kon paschal phrase (tan-awa sa Juan 7:30 ; 8:20 ; 13:1; 16:25 ; 16:32 ). Kining talagsaon nga panahon mao gayod ang takna sa Iyang Himaya: “Amahan, miabot na ang takna. Pasidunggi ang imong Anak aron ang Anak magpasidungog kanimo… pasidunggi ako diha sa imong pakig-uban kanako, sa dungog nga akong gihuptan uban kanimo sa wala pa buhata ang kalibutan” (Juan 17:1-5). Adunay tulo ka mga hugna kining panahon sa himaya:

Una. Sa krus, diin si Jesus gibayaw.

Ikaduha. Sa Pagkabanhaw, diin si Jesus Gibayaw ngadto sa tuong dapit sa Amahan.

Ikatulo. Sa pagkunsad sa Espiritu Santo sa mga magtutuo (Juan 3:14 ; 8:28 ; 12:32 ; 17:11 ; 17:13 ; 7:39 ).

Kining panday nga gikan sa Nasaret, gidapit sa kasal, magpakita kanato sa iyang lawom nga personalidad pinaagi sa iyang pulong ug buhat. Mingon siya nga ang “iyang panahon wala pa moabot”. Apan moabot ra kini! Sa dihang ilang gidapit si Jesus sa kasal, sila mibukas sa ilang kaugalingon sa Dios nga maoy Nagmugna o Creator sa gugma! Apan kining misteryoha nagtago pa gikan kanila. 5Unya giingnan sa Inahan ni Jesus ang mga sulugoon, "Buhata ninyo bisan unsay iyang isugo kaninyo." Ang pagkahurot sa bino maoy usa ka simbolo sa tanang dakong kakulangan nga atong masinati. Daghang mga butang nga wala kitay mahimo. Mao nga nianang higayona gikinahanglan ang pagsandig sa “ Usa nga mas gamhanan”. Siya lamang ang makatabang kanato. "Buhata ninyo bisan unsay iyang isugo kaninyo."

6Ang mga Judio may mga tulomanon sa ilang tinuohan labot sa pagpanglinis, ug tungod niini didtoy gibutang nga unom ka tadyawng bato nga sudlanan og tubig; ang matag usa kasudlan og kawhaan ngadto sa katloan ka galon nga tubig. 7Si Jesus miingon sa mga sulugoon, "Pun-a ninyog tubig kining mga tadyaw." Ug ila kining gipuno. 8Unya miingon siya kanila, "Kab-a ang tubig ug dad-a ngadto sa tinugyanan sa kombira." Ug gidala nila kini ngadto kaniya, 9ug iyang gitilawan ang tubig nga nahimo nang bino. Wala siya masayod kon diin gikan ang maong bino (apan nasayod ang mga sulugoon nga maoy nagkabo sa tubig);

Kining mga detalye mahinungdanon kaayo:

“Unom ka tadyaw”. Sa karaang panahon ang pito maoy giisip nga hingpit nga numero. Kulang og usa , busa ang unom maoy timaan sa tumang kakulang. “Rito sa pagpanglinis”. Ang tubig kabahin sa daan nga karon gibag-o ni Cristo diha sa paghimo niinig bino. Si Jesus mihingpit sa pagtuo. “Pun-a ninyo kinig tubig”. Nagsobra. Nag-awas-awas. Nagpasabot nga naghingapin nga kaayo gikan sa Manunubos nga giinagurahan karon ni Jesus. “Ang bino”. Usa ka klasikal nga simbolo sa Bibliya (tan-awa sa Maghuhukom 9:13: Salmo 104:15). Ang bino maoy usa ka bunga gikan sa yuta nga makapalipay ug makapadasig sa tawo. busa gitawag niya ang bana 10ug giingnan, "Nabatasan sa kadaghanan ang pagdalit pag-una sa labing maayong bino, ug kon makainom na pag-ayo ang mga bisita, anha pa idalit ang bino nga dili maayo kaayo; apan karon pa nimo idalit ang labing maayong bino!" Nasayop ang tinugyanan sa kombira. Wala siya masayod sa hinungdan ngano nga hangtod niadtong taknaa anaa pa ang labing lamiang bino. Hinoon sa dili madugay, giila ni San Juan nga ang tinuod nga bana mao si Jesus (Juan 3:29 ). Mao kini ang yabi sa matuod nga timaan sa Cana. 11Gihimo ni Jesus kining una niyang milagro didto sa Cana , sa Galilea. Didto gipadayag niya ang iyang himaya ug nanuo kaniya ang iyang mga tinun-an. Mao kini ang interpretasyon sa saysay sa Cana . Si Jesus mipadayag kon kinsa siya ug ang mga tinun-an nagsugod sa kasinatian sa Pagtuo.