EBANGHELYO (Mateo 2:1-12)

1Si Jesus natawo sa lungsod sa Betlehem, sa yuta sa Judea , sa panahon ni Hari Herodes. Unya may pipila ka mga tawo nga maalamon bahin sa mga bitoon nangabot sa Jerusalem gikan sa sidlakan 2ug nangutana: “Hain man ang bata nga natawo nga maoy mahimong hari sa mga Judio? Nakita namo ang iyang bitoon sa pagsubang niini didto sa sidlakan, ug moanhi kami aron pagsimba kaniya.” 3Sa pagkabati ni Hari Herodes niini, wala siya mahimutang ingon man ang tibuok Jerusalem . 4Gitigom niya ang mga pangulong pari ug ang mga magtutudlo sa Balaod ug gipangutana niya sila. “Asa man matawo ang Mesiyas?”

5Sila mitubag, "Sa lungsod sa Betlehem sa Judea, mao kini ang gisulat sa propeta: 6'Ikaw, Betlehem, sa yuta sa Juda, Dili ka iwit sa mga dagkong lungsod sa Juda; Kay maggikan kanimo ang usa ka pangulo Nga maoy magmando sa akong katawhan, ang Israel.'” 7Busa gipatawag ni Herodes ang mga dumuduong nga gikan sa sidlakan alang sa usa ka tigom nga tinago ug iyang nasayran gikan kanila ang untop nga takna sa pagsubang sa bitoon. 8Unya iyang gipaadto sila sa Betlehem ug giingnan, "Lakaw kamo ug pangitaa ninyo pag-ayo ang bata, ug sa makaplagan na ninyo siya, pahibaloa ako aron moadto ako ug mosimba usab kaniya.” 9Unya nanglakaw sila. Samtang nagpanaw sila, nakita nila ang bitoon—ang mao gihapong bitoon nga nakita nila didto sa sidlakan—ug nag-una kini kanila hangtod nga miabot kini ug mihunong tungod gayod sa nahimutangan sa bata. 10Nalipay sila pag-ayo sa pagkakita nila sa bitoon! 11Unya misulod sila sa balay ug ilang nakita ang bata uban sa iyang inahan nga si Maria. Nangluhod sila ug misimba kaniya; unya giablihan nila ang gisudlan sa ilang mga gasa ug mihalad sila kaniyag bulawan, insenso, ug mira. 12Pinaagi sa damgo gipahimatngonan sila sa Dios sa dili pagbalik ngadto kang Herodes; busa namauli sila agi sa laing dalan. Ang Ebanghelyo sa Ginoo.

KAHULOGAN SA EBANGHELYO (Mateo 2:1-12)

1aSi Jesus natawo sa lungsod sa Betlehem, sa yuta sa Judea , sa panahon ni Hari Herodes… Kini lang mga pulonga ang gigamit ni San Mateo sa paglarawan kabahin sa Pasko sa Pagkatawo ni Jesus. Apan bisan pa sa ka mubo niini, si San Mateo naghatag sa unsay kahulogan niini pinaagi sa iyang saysay kabahin sa mga tawo nga maalamon nga daw maoy pasiuna sa iyang Ebanghelyo. 1bUnya may pipila ka mga tawo nga maalamon bahin sa mga bitoon nangabot sa Jerusalem gikan sa sidlakan 2aug nangutana: “Hain man ang bata nga natawo nga maoy mahimong hari sa mga Judio? Niining maong saysay si Mateo misugyot nang daan nga si Jesus usa na ka hari sukad pa sa iyang pagkatawo. Sa mga umaabot nga bersekulo sa iyang Ebanghelyo si San Mateo mosaysay kabahin sa Gingharian sa mga Langit (the Kingdom of Heavens ) isip usa sa iyang mga paboritong tema. Unsa may atong pagsabot sa matag karon ug unya nga atong gilitok diha sa pag-ampo: “Umabot kanamo ang Imong Gingharian…” ug sa “… nga nagpuyo ug naghari uban Kanimo ug sa Espiritu Santo hangtud sa kahangtoran”? 2bNakita namo ang iyang bitoon sa pagsubang niini didto sa sidlakan, Ang larawan sa “kahayag” mao ang gigamit sa pagpahibalo sa pag-abot sa Manluluwas (tan-awa sa Isaias 60:1-6 ug Isaias 9:1-5). Ang tema mahitungod sa “Bitoon” nagtug-an kanato kon unsa ang Pagtuo: “… kay kini sama man sa suga nga nagdan-ag diha sa kangitngit, hangtod nga mobanagbanag ang Adlaw sa Ginoo ug ang kahayag sa kabugason modan-ag sa inyong mga kasingkasing” (2 Pedro 1:19 ). Ang bituon naghulagway sa kahayag sa Ginoo o sa grasya sa Ginoo.

Diha sa akong kinabuhi anaa kanang grasya nga nag-agak kanako sa pagkakaplag kang Jesus. Anaa ba akoy kadasig sa pagsunod niini bisan asa ako niya dad-a? 2cug moanhi kami aron pagsimba kaniya.” Ang pagsimba, susama sa “paghapa”, maoy simbolo sa pagtahod. Usa kini ka lawom nga panglantaw sa kasingkasing (deep attitude of the heart). Unsa man ako? Tigsimba ba ako? Aduna ba akoy panglantaw sulod sa akong kasingkasing nga masimbahon? 3Sa pagkabati ni Hari Herodes niini, wala siya mahimutang ingon man ang tibuok Jerusalem . 4Gitigom niya ang mga pangulong pari ug ang mga magtutudlo sa Balaod ug gipangutana niya sila. “Asa man matawo ang Mesiyas?” Kinauyokan sa saysay sa Epipaniya, si San Mateo misugyot alang sa atong pamalandong og duha ka mga panglantaw (attitudes) nga atong ikahibalag sa Ebanghelyo matag karon ug unya:

Una, ang pagdumili sa pagdawat sa mga punuan sa mga Judio. Sila unta ang angayan nga unang moila sa Manunubos. Apan unsay ilang gibuhat? Sila nahadlok. Wala silay gihimo. Gikan sa sinugdan, sila hinoon naningkamot sa pagpatay sa Manunubos. Ikaduha, ang andam nga pagdawat sa mga dili Judio, sama sa gibuhat sa mga makinaadmanon. Ang mga makinaadmanon mao diay kadtong mga pagano sa unahan, apan sa dihang nakabati sa pag-abot sa Manunubos wala magdumili sa pagtuo ug sa pagdawat Kaniya! Ang Epipaniya mao ang kasaulogan niadtong wala makaila sa Dios, apan nakabig ngadto Kaniya tungod sa dili-makita nga grasya sa Dios nga naglihok sa matag usa kanato. 6'Ikaw, Betlehem, sa yuta sa Juda, Dili ka iwit sa mga dagkong lungsod sa Juda; Kay maggikan kanimo ang usa ka pangulo Nga maoy magmando sa akong katawhan, ang Israel .'” Tingali mangutana kita ngano nga ang bitoon wala man mogiya sa mga makinaadmanon diretcho ngadto sa Belen? Ngano nga gipahapit pa man ang mga makinaadmanon sa Jerusalem ? Aron kitaon ang mga pangulo sa Israel ?

Ang tubag: Tungod kay ang Dios nagmakanunayon sa iyang saad ngadto sa mga katawhan sa Israel . Bisan pa kon ang kaluwasan alang sa tanan, apan moagi kini sa mga Israelita! (Roma 11:11). 10Nalipay sila pag-ayo sa pagkakita nila sa bitoon! 11Unya misulod sila sa balay ug ilang nakita ang bata uban sa iyang inahan nga si Maria. Nangluhod sila ug misimba kaniya; unya giablihan nila ang gisudlan sa ilang mga gasa ug mihalad sila kaniyag bulawan, insenso, ug mira. Ang pagsimba maoy usa sa mga labing mahinungdanong hinungdan ngano nga anaa ang Simbahan! Ang tinuod nga pagsimba o true worship mao ang pagbalaan ngadto sa Ginoo sa tanang mga gibuhat sa tawo dinhi sa kalibutan. Mao kini ang panagtagbo kanato ug kang Cristo nga maoy nakapausab sa hulagway sa atong kinabuhi. Usa kini ka paagi nga kita bukas sa kamatuoran sa Maayong Balita!