35Si Santiago ug si Juan, mga anak ni Sebedeo, miduol kang Jesus ug miingon, “Magtutudlo, aduna kami ipabuhat kanimo.” 36“Unsa may ipabuhat ninyo kanako?” nangutana si Jesus kanila. 37Mitubag sila, "Kon molingkod ka na unya sa imong : trono didto sa imong gingharian nga mahimayaon, palingkura kami uban kanimo: ang usa sa imong tuo ug ang usa sa imong wala." 38Miingon si Jesus kanila, "Wala kamoy kalibutan sa inyong gipangayo. Makainom ba kamo sa kupa sa pag-antos nga akong imnan? Makapabunyag ba kamo sa paagi nga ako bunyagan?" 39"Oo,” Mitubag sila. Miingon si Jesus kanila, "Makainom gayod kamo sa kupa nga akong imnan ug makapabunyag kamo sa paagi nga ako bunyagan. 40Apan wala akoy katungod sa pagpili kon kinsa ang palingkuron sa akong tuo ug sa akong wala. Ang Dios mao ang mohatag niining mga dapita ngadto sa gitagan-an niini." 41Sa pagkabati niini sa napulo ka tinun-an, nangasuko sila kang Santiago ug kang Juan. 42Tungod niini, gipaduol silang tanan ni Jesus ug giingnan, "Nasayod kamo nga ang mga punoan sa mga tawo naghari kanila, ug ang mga pangulo nagmando kanila; 43apan kaninyo dili kini mao ang paagi. Kon usa kaninyo buot madakong tawo, kinahanglan nga mag-alagad siya sa tanan; 44ug ang buot nga mahimong labaw sa tanan, kinahanglan nga siya magpaulipon sa tanan. 45Kay bisan gani ang Anak sa Tawo wala moanhi aron alagaran, kondili sa pag-alagad ug paghatag sa iyang kinabuhi aron pagtubos sa daghang mga tawo."

Ang Ebanghelyo sa Ginoo.

KAHULOGAN SA EBANGHELYO (Markos 10:35 -45)

35Si Santiago ug si Juan, mga anak ni Sebedeo, miduol kang Jesus ug miingon, “Magtutudlo, aduna kami ipabuhat kanimo.” Duha ka mga batan-ong lalaki, mga anak ni Sebedeo, usa ka mananagat. Sila mga taga-Betsaida usa ka gamay nga pantalan sa kabaybayonan sa Lanaw sa Tiberias. May pangagpas nga ang ilang inahan mao si Salome, ang igsuon ni Maria nga inahan ni Jesus (Markos 15:40 ; 16:1). Migamit sila sa pribihiliyo nga naandan sa ilang panahon ug dapit diin sayon ang pagpangayo og tabang gikan sa mga kabanay. Si Jesus ilang kabanay. Maayo usab nga sa atong kabahin mangutana kita ngano man nga aduna may mga panahon nga wala nato madawat ang atong gipangayo sa pag-ampo. Atong paningkamutan sa pagkat-on niining maong Ebanghelyo.

36“Unsa may ipabuhat ninyo kanako?” nangutana si Jesus kanila. Gipatataw ni Jesus kon unsay ilang buot pangayoon gikan kaniya. Mao diay nga gikinahanglan kaayo nga kita mag-ampo kay kini mao man ang pagpatataw kon unsay atong gikinahanglan atubangan sa Dios. 37Mitubag sila, "Kon molingkod ka na unya sa imong: trono didto sa imong gingharian nga mahimayaon, palingkura kami uban kanimo: ang usa sa imong tuo ug ang usa sa imong wala." Bag-ohay pa lang si Jesus, sa ika-tulong higayon, nga mipadayag si Jesus ngadto sa mga Apostoles sa kamatuoran bahin sa iyang umaabot nga kasakit ug kamatayon didto sa Jerusalem (Mk 10:32 -34). Samtang si Jesus miangkon sa kalisod sa iya unyang pagadangatan, kining duha ka mga tinun-an naningkamot nga mopataas sa ilang kaugalingon, sa dapit nga mahimayaon. Nahitabo kini kay ila mang gituohan nga ang Mesias maoy magmadaugon ug gamhanan nga bayaning kalibutanon. Busa, ilang gipahinumduman si Jesus sa ilang pagka-kadugo aron kahatagan usab sila sa pinalabing dapit kon siya makahupot na sa harianong gahum.

Dili nato sila sawayon kay dili ba susama man lang usab sila kanato. Adunay mga higayon nga kita nagbinuotan aron lamang makadawat og pabor sa Ginoo. Dili ba? 38aMiingon si Jesus kanila, "Wala kamoy kalibutan sa inyong gipangayo… Kon nahibalo pa lamang unta sila nga una, ang trono nga sagupon ni Cristo mao ang balabag sa krus ug ikaduha, nga ang dapit nga ilang gipangahasan sa pagpangayo (tuo ug wala) gikan kang Jesus mao ang dapit nga giduphan sa duha ka mga kawatan! 38b … Makainom ba kamo sa kupa sa pag-antos nga akong imnan?Makapabunyag ba kamo sa paagi nga ako bunyagan?"

Aron makorektahan ang gipangandoy sa duha ka mga Apostoles, migamit si Jesus og duha ka mga naandang imahen nga anaa sa Bibliya: Una, ang kopa nga nagkahulogan og kapaitan o kalisdanan (tan-awa sa Salmo 75:8). Ikaduha, ang bunyag nga nagkahulogan og pagsalom sa katubigan o gilamoy sa mabangis nga mga balod (tan-awa sa Salmo 42:7). Gipasabot ni Jesus kanila ang iyang kaugalingong makauulaw nga kasakit ug kamatayon.

39a"Oo,” Mitubag sila.

Ang kadasig sa ilang pagkabatan-on maoy nakapatukmod nila sa pag-ingon og Oo! Diha sa atong pagkabinunyagan anaa ba kanato kining kaisog sa pakigharong sa mga pagsulay ug hagit sa atong kinabuhi sa pagtuo? 39bMiingon si Jesus kanila, "Makainom gayod kamo sa kupa nga akong imnan ug makapabunyag kamo sa paagi nga ako bunyagan. Ang kasaysayan nagmatuod nga si Santiago gipatay isip usa ka martir sa tuig 44 (Tan-awa sa Buhat 12:1-3).

40Apan wala akoy katungod sa pagpili kon kinsa ang palingkuron sa akong tuo ug sa akong wala... Mapamatud-an na usab dinhi ang pagkamapaubsanon ni Jesus. Iyang gipasilong ang iyang gahum ubos sa gahum sa iyang Amahan! Mao kini ang pag-ampo: dili ang atong kabubut-on mao ang matuman kondili ang kabubut-on sa Amahan! 41Sa pagkabati niini sa napulo ka tinun-an, nangasuko sila kang Santiago ug kang Juan. Nangasuko sila kay mao man usab kini ang ilang ambisyon!

42 ..."Nasayod kamo nga ang mga punoan sa mga tawo naghari kanila, ug ang mga pangulo nagmando kanila; 43apan kaninyo dili kini mao ang paagi. Kon usa kaninyo buot madakong tawo, kinahanglan nga mag-alagad siya sa tanan; 44ug ang buot nga mahimong labaw sa tanan, kinahanglan nga siya magpaulipon sa tanan. 45Kay bisan gani ang Anak sa Tawo wala moanhi aron alagaran, kondili sa pag-alagad ug paghatag sa iyang kinabuhi aron pagtubos sa daghang mga tawo." Dili diay mopatigbabaw ang gahum diha sa Kristohanong katilingban, kondili ang anaa unta mao ang mapaubsanon nga pagpangalagad. Gisaksihan mismo ni Cristo diha sa kaagi sa iyang kinabuhi!