30Si Jesus ug ang iyang mga tinun-an mibiya gikan sa bukid ug mipadayon paglakaw latas sa Galilea. Dili buot si Jesus nga may mahibalo kon hain siya, 31kay gipahimangnoan man niya ang iyang mga tinun-an nga ang Anak sa Tawo itugyan ngadto sa mga tawo ug patyon nila siya, ug mabanhaw tapus sa tulo ka adlaw. 32Wala sila makasabot kon unsay kahulugan sa iyang giingon kanila, apan nahadlok silang mangutana kaniya. 33Nahiabot sila sa Capernaum ug sa nakasulod na sila sa balay, gipangutana ni Jesus ang iyang mga tinun-an, “Unsa may inyong gilalisan didto sa dalan?” 34Apan wala sila motubag kay naglalis man sila kon kinsay labing dako kanila. 35Unya milingkod si Jesus ug iyang gipaduol sila ug giingnan, “Bisan kinsa ang buot nga mahimo nga labing dako kinahanglan nga magpaubos siya ug mag-alagad sa tanan.” 36Unya gikuha niya ang usa ka bata ug iyang gipatindog sa ilang atubangan. Ug iyang gikugos ang bata ug miingon siya kanila, 37“Ang modawat sa usa ka bata nga ingon niini sa akong ngalan, modawat usab kanako; ug ang modawat kanako, wala modawat kanako lamang, kondili kaniya usab nga nagsugo kanako.” Ang Ebanghelyo sa Ginoo.

KAHULOGAN SA EBANGHELYO (Markos 9:30 —37)

30Si Jesus ug ang iyang mga tinun-an mibiya gikan sa bukid ug mipadayon paglakaw latas sa Galilea. Dili buot si Jesus nga may mahibalo kon hain siya, Si Jesus, human nga siya wala masabti sa mga katawhan, migahin og dakong panahon alang sa pag-hatag og pormasyon sa iyang napulog duha ka mga Apostoles. Dinhi iyang gipaambit ngadto kanila ang “mga balaod” nga maoy mag-agak sa ilang kinabuhi isip sakop sa simbahanong katilingban. 31akay gipahimangnoan man niya ang iyang mga tinun-an nga ang Anak sa Tawo itugyan ngadto sa mga tawo…

Si Jesus migamit sa mga pulong Anak sa Tawo, dili tungod kay buot niyang ipasabot ngadto kanila nga siya usa lamang ka tawo, kondili aron ang mga Apostoles makasabot nga ang ilang gituohan nga Manunubos o Messiah wala magagikan sa Dios nga hulog gikan sa kapanganoran. Dinhi iyang gipasabot ngadto kanila nga dili unta nila saypon ang pagsabot kon unsa ang Manunubos. Hinoon ang Manunubos nahimong Tawo. Si Jesus mitudlo kanila kabahin sa Manunubos nga maoy gisulat sa Basahon ni Daniel ( 7:13 -14). Ang pulong “itugyan” nagpasabot nga ang Dios dili diktador bisan pa sa iyang pagkamakagagahum. Hinoon mitugot siya nga ang iyang kaugalingon mahisama sa usa ka gasa nga “itugyan”. Kini natuman pinaagi sa Krus ni Jesus aron kita maluwas.

Basaha kining mosunod: “Gitugyan siya aron patyon tungod sa atong mga sala, ug gibanhaw siya aron himoon kita niyang matarong” (Roma 4:25); “Wala magdumili ang Dios pagtugyan sa iyang Anak ngadto sa kamatayon tungod kanatong tanan” (Roma 8:32); “Ug kining kinabuhi ko karon akong gikinabuhi diha sa pagtuo ko sa Anak sa Dios nga nahigugma kanako ug nagpakamatay alang kanako” (Galacia 2:20); “Gihigugma kita ni Cristo ug gitugyan ang iyang kinabuhi alang kanato” (Efeso 5:2). Labaw sa tanan dili nato hikalimtan ang Pulong sa Konsagrasyon: “Kini mao ang akong Lawas nga gitugyan alang kaninyo…”

31bug patyon nila siya, ug mabanhaw tapus sa tulo ka adlaw. Mao kini ang ikaduhang higayon sa pagtaho ni Jesus mahitungod sa iyang kasakitan ug kamatayon. Ang una mao kadtong iyang gitaho human si Pedro mihimo sa propesyon sa pagtuo didto sa Cesaria Felipe. Ang tibuok Ebanghelyo sumala ni San Markos naghatod kanato sa duha ka panghitabo sa kinabuhi ni Cristo: Kamatayon ug Pagkabanhaw. Mao usab kini ang sentro sa atong Propesyon sa Pagtuo: duha ka mga panghitabo nga nasinati ni Jesus. Hugot ba ako sa akong pagtuo nga si Jesus buhi hangtod karon? 32Wala sila makasabot kon unsay kahulugan sa iyang giingon kanila, apan nahadlok silang mangutana kaniya.

Ang Ebanghelyo sumala ni San Markos naglarawan sa mga Apostoles nga mga tawo nga sama sa daghanan kanato—mga huyang. Anaa kanila ang kamubo o kamabaw sa ilang panghunahuna. Nagpabilin sila sa ilang pagkamagahion sulod sa dugayng panahon. Apan tungod kay nagpabilin man sila uban kang Jesus, sa kadugayan nahitabo ang kausaban. Nakit-an nila ang kabag-ohan sa ilang kusog ug gahum! 33 … gipangutana ni Jesus ang iyang mga tinun-an, “Unsa may inyong gilalisan didto sa dalan?” 34Apan wala sila motubag kay naglalis man sila kon kinsay labing dako kanila.

Mapamatud-an dinhi ang kakulang sa pagsabot sa mga Apostoles. Gituohan nila nga kon si Jesus mamatay man, kinahanglan nga ilang ipaniguro ang ila unyang mahimutangan. Tungod kay lagi ang ilang gituohan mao man nga ang Manunubos motugyan kanila og usa ka yutan-on nga gingharian. 35Unya milingkod si Jesus ug iyang gipaduol sila ug giingnan, “Bisan kinsa ang buot nga mahimo nga labing dako kinahanglan nga magpaubos siya ug mag-alagad sa tanan.”

Ang naandang himoon sa tawo mao gayod ang pagpangita og kusog, maayong ngalan, dungog, gahum, kadato o kahayahay. Si Jesus miusab nii-ning maong panglantaw: Ang mapasubsanon mao ang labing labaw! 36Unya gikuha niya ang usa ka bata ug iyang gipatindog sa ilang atubangan. Ug iyang gikugos ang bata ug miingon siya kanila, 37“Ang modawat sa usa ka bata nga ingon niini sa akong ngalan, modawat usab kanako; ug ang modawat kanako, wala modawat kanako lamang, kondili kaniya usab nga nagsugo kanako.” Ang pagka-biyolente (violence) nag-anam og kalawom sulod sa kasingkasing sa daghang mga tawo. Taliwala niining kamangtas sa tawo, si Jesus mipatin-aw og laing pangtulun-an nga gilarawan pinaagi sa usa ka gamayng bata. Ang mga mithi nga anaa sa usa ka bata, labi na ang iyang pagka-walay gahum sa pagpanalipod sa kaugalingon maoy nakapabantog kaniya!