9Nahigugma ako kaninyo ingon nga ang Amahan nahigugma kanako; pabilin kamo sa akong gugma. 10Kon tumanon ninyo ang akong mga sugo magpabilin kamo sa akong gugma ingon nga ako nagtuman sa mga sugo sa akong Amahan ug nagpabilin sa iyang gugma.11Gisultihan ko kamo niini aron mabatonan ninyo ang akong kalipay ug mahingpit ang inyong kalipay. 12Kini mao ang akong sugo: paghigugmaay kamo ingon nga ako nahigugma kaninyo. 13Ang labing dakong gugma nga ikahatag sa usa ka tawo ngadto sa iyang mga higala mao ang pagpakamatay alang kanila. 14Kamo akong mga higala kon buhaton ninyo ang gisugo ko kaninyo. 15Dili na kamo tawgon nga mga sulugoon, kay ang sulugoon dili mahibalo sa gibuhat sa iyang agalon. Hinunoa, tawgon ko kamo nga akong mga higala, kay gisultihan ko man kamo sa tanan nga nadungog ko sa akong Amahan. 16Dili kamo maoy nagpili kanako; ako ang nagpili ka-ninyo, ug gipili ko kamo aron manlakaw ug mamungag daghan— mga bunga nga molungtad. Busa ihatag kaninyo sa Amahan bisag unsay inyong pangayoon kaniya sa akong ngalan. 17Kini mao ang isugo ko kaninyo: paghigugmaay kamo. Ang Ebanghelyo sa Ginoo.

KAHULOGAN SA EBANGHELYO (Juan 15:9-17)

9a“Nahigugma ako kaninyo ingon nga ang Amahan nahigugma kanako…

Mao kini ang katapusang pasalig ni Jesus ngadto sa iyang mga tinun-an sa gabii sa wala pa mamatay. Alang kang Jesus, ang tanan nagasukad sa dili matugkad nga kalawom sa “tinubdan” sa tanan nga mao ang Gugma. Diha sa Ginoo, walay pag-inusara, kondili ang kahiusahan sa Gugma nga walay hunong gipanagsalohan sa tulo ka Personas. Ang Ginoo Gugma! Ang Amahan nahigugma sa Anak, ug ilang gikahatag ang Kalipay sa ilang Gugma sa Espiritu Santo . Ug kining dili makitang Gugma usa ka adlaw nahimong tawo pinaagi sa tawhanong kinaiya ni Jesus ang Nazareno. Tungod niini, ang misteryo sa balaanong Gugma nahimo nang makita. 9b … pabilin kamo sa akong gugma. 10aKon tumanon ninyo ang akong mga sugo magpabilin kamo sa akong gugma…

Sa daghang mga panghitabo sa atong panahon karon, ang paglihok sa gugma gituohang mohunong diha sa pakighilambigit sa mga isigkatawo. Anaa ra ang gugma tali sa mga minyo, tali sa mga sakop sa banay, o tali sa usa ka pundok ug sa laing pundok. Kana mao ang “horizontal” kon gikan sa usa pikas ngadto sa laing pikas nga matang sa gugma.

Lahi ang baroganan ni Jesus. Siya mitudlo bahin sa “vertical” kon gikan sa taas padulong sa paubos o gikan sa ubos ngadto sa pahitaas nga matang sa gugma. Samtang ang Dios nahigugma kanato, kita usab nga mga tawo gihagit sa paghigugma usab sa Dios. 10b … ingon nga ako nagtuman sa mga sugo sa akong Amahan ug nagpabilin sa iyang gugma. Dinhi nahingpit ang tuyok o lihok (dynamism) sa gugma: Ang gugma nga gikan sa Amahan karon mibalik ngadto sa Amahan. Ug pinaagi niini natuman ang damgo ni Jesus mahitungod sa gugma: 1) ang katawhan nga gihigugma sa Dios; 2) ang katawhan nga nagkahigumaay sa usag-usa; ug 3) ang pundok sa magtutuo, ang Simbahan, nga nakasinati sa Gugma sa Dios.

11Gisultihan ko kamo niini aron mabatonan ninyo ang akong kalipay ug mahingpit ang inyong kalipay. Kalipay maoy usa ka tatak sa usa ka Kristohanon. Mao usab kini ang kinaiya ni Jesus: ang pagbaton og makanunayong kalipay. “Unsa may anaa sa usa ka tawo nga maoy nakapahimo niyang Kristyano?” Usa sa mga timailhan niini mao ang iyang gihuptang kalipay! 12Kini mao ang akong sugo: paghigugmaay kamo ingon nga ako nahigugma kaninyo. Ang halapad ug balaang sapa sa Gugma walay undang. Ang Gugma sa Dios moabot gayod sa tawo; ug mao nga ang tawo kinahanglan maghigugmaay sa usag-usa. Kon kita nagkahigugmaay anaa masinati nato ang Gugma sa Dios!

Kinsa man sa akong kinabuhi nga angayan pa nakong higugmaon? Kinsa man ang nanginahanglan sa akong gugma? 13Ang labing dakong gugma nga ikahatag sa usa ka tawo ngadto sa iyang mga higala mao ang pagpakamatay alang kanila. Ang “dakong gugma” ni Jesus naporma pinaagi sa iyang Kasakitan. “Kanunay niyang gihigugma kadtong mga iya nga ania sa kalibotan, ug gihigugma niya sila hangtod sa kataposan” (Jn 13:1). Ang kinatumyang bahin niining maong Gugma mao ang mahimayaong Krus. Ang paghigugma nga walay kondisyon o walay pupanagana mao ang Himaya ug Kalipay ni Jesus.

14Kamo akong mga higala kon buhaton ninyo ang gisugo ko kaninyo. Si Jesus nangayo sa atong pagkamakanunayon nganha kaniya. 15Dili na kamo tawgon nga mga sulugoon, kay ang sulugoon dili mahibalo sa gibuhat sa iyang agalon. Hinunoa, tawgon ko kamo nga akong mga higala, kay gisultihan ko man kamo sa tanan nga nadungog ko sa akong Amahan. Si Jesus wala na moila sa dakong kalainan tali sa “agalon” ug sa “sulogoon”, tali sa “Dios” ug sa “tawo”. Siya mipasabot na sa ilang panagsama isip mga “higala”. Nahitabo kini tungod kay pinaagi sa pagbati sa gugma anaa man ang panag-inambitay sa tanan, sa pagpahimutang sa tanan isip gipanagsaloan sa usag-usa.

Ang gugma dili magdominar sa usa batok sa lain, hinoon mao ang paghatag og respeto sa matag usa ug paghimo sa matag usa nga susama, walay labaw o ubos. Ang gugma maoy nakapahatag sa usa nga masabtan sa lain. Diha sa gugma anaa ang komunikasyon. Anaa usab ang komunyon. Mao kini ang gipakita ni Jesus kanato: ang Gugma sa Dios. Siya mipadayag kanato kon unsa gayod ang Gugma sa Dios! 16 … Busa ihatag kaninyo sa Amahan bisag unsay inyong pangayoon kaniya sa akong ngalan. Tungod kay dili sayon ang paghigugma, ang Dios mipasalig kanato sa iyang tabang kon kita mangayo gikan Kaniya, labi na diha sa pag-ampo.