35Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan. 36Samtang nagsugilon pa sila niini, sa kalit mibarog ang Ginoo sa taliwala nila ug miingon, “Ang kalinaw mag-uban kaninyo.” 37Nakurat sila ug nalisang, ug naghunahuna nga nakakita silag espiritu. 38Apan miingon siya kanila, “Nganong nabalaka man kamo? Nganong nagduhaduha kamo? 39Tan-awa ninyo ang akong mga kamot ug mga tiil; ako gayod kini! Hikapa ako ug makita ninyo kay ang espiritu walay unod ug mga bukog ingon sa nakita ninyo nga ania kanako.” 40Gisulti niya kini ug iyang gipakita kanila ang iyang mga kamot ug mga tiil. 41Apan wala gihapon sila makatuo; hilabihan ang ilang kalipay ug kahibulong; busa gipangutana sila ni Jesus, “Duna ba kamoy makaon dinhi?” 42Ug gihatagan nila siyag usa ka buok sinugbang isda, 43ug gidawat kini ni Jesus ug gikaon sa ilang atubangan. 44Unya miingon siya kanila, “Kining mga butanga mao gayod ang akong gisulti kaninyo samtang ako uban pa kaninyo; kinahanglan matuman ang tanan nga nahisulat mahitungod kanako sa Balaod ni Moises ug sa mga sinulat sa mga propeta ingon man sa mga Salmo.” 45Unya gipasabot niya sila sa Kasulatan, 46ug miingon siya kanila, “Kini mao ang nahisulat: nga ang Mesiyas kina­hanglan mag-antos ug unya mabanhaw sa ikatulong adlaw, 47ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isangyaw ngadto sa tanang mga nasod, sugod sa Jerusalem. 48Kamo mga saksi niining mga butanga. Ang Ebanghelyo sa Ginoo.

oOo

KAHULOGAN SA EBANGHELYO (Lukas 24: 35-48)

35Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan. 36aSamtang nagsugilon pa sila niini, sa kalit mibarog ang Ginoo sa taliwala nila…

Adunay mga pipila ka mga panghitabo nga nasinati niining mga tawhana sulod sa nangaging upat ka adlaw: Ang katapusang panihapon, sa miaging Huwebes… ang pagdakop ni Jesus didto sa tanaman sa Gethsemani… ang ilang pagtago… ang pagdumili sa pag-angkon ni Pedro… ang pagtugyan kang Jesus ngadto sa mga kadagkoan aron hukman… ang paghiagom ni Jesus sa mga pag-antos sa kasakitan… ang iyang paglansang, pagbitay ug kamatayon didto sa krus… ang paghikog kang Judas, usa sa ilang mga higala. Ang pundok sa napulog duha nahimog napulog usa tungod sa pagbudhi ug pagkamatay ni Judas. Kini mao ang nagpaluyo sa ilang mga hunahuna ug pagbati sa panahon nga si Jesus nabanhaw.

36bug miingon, “Ang kalinaw mag-uban kaninyo.”

“Shalom!” mao kini ang naandang pulong sa paghimamatay sa mga Judio. Sa miaging Huwebes, si Jesus misaad kanila nga sila makabaton og kalinaw human sa tulo ka adlaw nga pagsulay (tan-awa sa Juan 14:27 ug Juan 16:32-33). Niining gabii sa adlaw sa pagkabanhaw, ang maong saad natuman. 37Nakurat sila ug nalisang, ug naghunahuna nga nakakita silag espiritu. Ang una nilang reaksyon sa ilang pagkakita kang Jesus mao ang pagkakurat ug pagduhaduha. Bisan pa kon gipatin-aw ni Cristo ngadto kanila ang tinuod nga nahitabo, apan ang mga tinun-an nagpabilin nga wala pa gihapon makasabot! Dili lamang igo ang “pagkakita”, kinahanglan gayod ang pagbukas sa kaugalingon sa misteryo sa pagkabanhaw!

38Apan miingon siya kanila, “Nganong nabalaka man kamo? Nganong nagduhaduha kamo? 39Tan-awa ninyo ang akong mga kamot ug mga tiil; ako gayod kini! Hikapa ako ug makita ninyo kay ang espiritu walay unod ug mga bukog ingon sa nakita ninyo nga ania kanako.” Dinhi gipamatuod ni Jesus kon kinsa siya: ang Jesus nga namatay sa krus mao gihapon ang Jesus nga nabanhaw. Ang mga samad sa iyang mga kamot ug tiil maoy magpamatuod ngadto sa mga tinun-an sa iyang pagkasiya.

41… busa gipangutana sila ni Jesus, “Duna ba kamoy makaon dinhi?” 42Ug gihatagan nila siyag usa ka buok sinugbang isda, 43ug gidawat kini ni Jesus ug gikaon sa ilang atubangan. Kining akto sa pagkaon nakatabang sa mga tinun-an sa paghinumdum sa gibuhat ni Jesus sa katapusang panihapon ug didto sa Emmaus sa dihang nabukas ang mga mata sa duha ka mga tinun-an sa panahon sa pagpikaspikas sa pan. 44aUnya miingon siya kanila, “Kining mga butanga mao gayod ang akong gisulti kaninyo samtang ako uban pa kaninyo...

Ang Pagkabanhaw dili lamang sabton isip usa ka panghitabo nga walay kadugtongan sa ubang panghitabo. Mao nga si Jesus mipahinumdum kanila pinaagi sa unsay iyang gipasidaan ngadto kanila. Dinhi gidugtong ni Jesus ang panghitabo sa “wala pa ang Pagkabanhaw” ug sa “human na ang Pagkabanhaw”. Gisilsil ngadto sa mga tinun-an ang pag-atubang sa misteryo sa pagtuo!

44bkinahanglan matuman ang tanan nga nahisulat mahitungod kanako sa Balaod ni Moises ug sa mga sinulat sa mga propeta ingon man sa mga Salmo.” 45Unya gipasabot niya sila sa Kasulatan, Si Jesus batid gayod sa Balaang Kasulatan. Siya mibasa niadtong mga pasahe labi na niadtong nagpasabot kabahin kaniya. Niining panahona si Jesus midugang pagpasabot ngadto kanila sa kahulogan sa maong Kasulatan. 46ug miingon siya kanila, “Kini mao ang nahisulat: nga ang Mesiyas kinahanglan mag-antos ug unya mabanhaw sa ikatulong adlaw...

Ang Daang Tugon sa Kasulatan nagahulagway sa plano sa Ginoo, kadtong pagpangandam, ug nga karon natuman. 47ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isa-ngyaw ngadto sa tanang mga nasod, sugod sa Jerusalem. 48Kamo mga saksi niining mga butanga. Tinuod gayod! Ang Kasingkasing ni Jesus puno gayod sa lawom nga pagpakabana sa misyon nga gitugyan ngadto kaniya gikan sa iyang Amahan. Dinhi si Jesus nakakita na sa daghang mga katawhan nga mutuo ug mosunod kaniya. Nakita usa niya ang daghang mga makasasala nga mapasaylo ug maluwas. Ang Pagkabanhaw mao ang nagpaluyo sa kinabuhi nga nakapalihok sa mga magtutuo.