60Daghan sa iyang mga tinun-an nakadungog niini ug miingon, “Lisod kaayong dawaton kining pagtulon-ana. Kinsa bay makasabot niini?” 61Bisag walay nagsulti kaniya, nahibalo si Jesus nga nagbagulbol ang iyang mga tinun-an bahin niini; busa giingnan niya sila, “Nakapabugnaw ba kini sa inyong pagtuo kanako? 62Pananglit makita ninyo ang Anak sa Tawo nga mokayab balik sa iyang gigikanan, mabugnaw ba lang gihapon kamo? 63Ang naghatag ug kinabuhi mao ang Espiritu; dili kini mahimo sa tawo. Ang mga pulong nga akong gisulti kaninyo—Espiritu ug kinabuhi; 64apan pipila kaninyo wala manuo.” (Nahibalo si Jesus sukad pa sa sinugdan kinsay dili motuo, ug kinsay magbudhi kaniya.) 65Ug midugang siya sa pag-ingon, “Mao man gani nga gisultihan ko kamo nga walay makaari kanako gawas kon itugot kini sa Amahan.” 66Tungod niini daghan sa iyang mga tinun-an mibiya ug wala na gayod mokuyog kaniya. 67Busa miingon si Jesus sa napulog duha ka tinun-an, “Ug kamo, mobiya ba usab kamo kanako?” 68Si Simon Pedro mitubag kaniya, “Ginoo, kinsa may among kapaingnan? Anaa kanimo ang mga pulong nga naghatag ug kinabuhing walay kataposan. 69Nagtuo kami ug nasayod nga ikaw mao ang Balaan sa Dios.” Ang Ebanghelyo sa Ginoo.

KAHULOGAN SA EBANGHELYO (Juan 6:60-69)

60Daghan sa iyang mga tinun-an nakadungog niini ug miingon, “Lisod kaayong dawaton kining pagtulon-ana. Kinsa bay makasabot niini?” Miabot na kita sa katapusang bahin sa pagtulun-an mahitungod sa Pan sa Kinabuhi. Ang reaksyon sa mga katawhan nga naminaw kang Jesus nabahin sa duha: Una, ang kadaghanan wala motuo niini ug mibiya kang Jesus; Ikaduha, ang “napulog duha” mipadayag sa ilang mapaubasanon apan tinuoray nga pagdawat sa mensahe.

Ang pagtulun-an mahitungod sa misteryo sa Eyukaristiya nakapalayo sa daghang mga tawo nga misunod na unta kang Cristo. Kapin na sa duha ka tuig ka libo ang milabay (2000) human kini ikawali ni Jesus, daghan pa sa atong mga kaigsoonan ang nagdumili sa pagdawat sa kamatuoran mahitungod sa Eyukaristiya: nga ang pan mga gikonsagrahan nahimo nang Lawas ni Cristo, ug ang bino nahimong Iyang Dugo. Daghan usab unta ang nasayod sa maong pagtulun-an apan nagpabilin nga wala mokalawat niini tungod kay wala man mosimba. O kaha misimba apan wala mangandam alang sa pagdawat sa maong sakramento. Daghan pa gayod diay ang walay o kulang sa pagtuo!

61aBisag walay nagsulti kaniya, nahibalo si Jesus nga nagbagulbol ang iyang mga tinun-an bahin niini... Nagbagulbol! Nasayran na ni Jesus nga mahitabo kini. Ang Pagtuo lisod gayod diay! Kay ang pagtuo mao man diay ang pagbiya sa unsay naandang nahibaloan, Ang pagtuo mao ang pagdason sa unsay angay nga tuohan bisan pa kon kini wala o dili makita. 61b...busa giingnan niya sila, “Nakapabugnaw ba kini sa inyong pagtuo kanako?

Ang pulong “nakapabugnaw” sa Griego mao ang “scandalizein”. Sa ato pa kon adtong badbaron kini: “Nakaeskandalo ba kini kaninyo?” o “Ako mao bay babag sa inyong pagtuo?” Ang Pagtuo mao ang atong pagbuhat sa unsay gisulti ni Jesus. Ug ang sentro sa misteryo sa atong Kristohanong pagtuo, walay duhaduha, mao ang Eyukaristiya. Dili sayop ang pag-ingon nga “ang Kristiyano mao ang tawo nga mosimba o moapil sa Santos nga Misa.”

Ang Pagtuo mao ang paghukom: Una, “Ang pagkaon sa Pan sa Kinabuhi” nga mao ang pagdawat ni Jesus sa atong kinabuhi. Ikaduha, “Ang pagpuyo sa kinabuhi ni Cristo diin sentro niini mao ang paghigugma.” 62Pananglit makita ninyo ang Anak sa Tawo nga mokayab balik sa iyang gigikanan, mabugnaw ba lang gihapon kamo? Unsaon man niining tawhana sa pag-hatag sa iyang Lawas aron atong kan-on? Tubag: Tungod lagi kay Siya dili man lang usa ka tawo! Inay nga si Jesus mobaliwala sa ilang kahikurat, siya hinoon mipadayon sa pag-agak kanila ngadto sa unsa gayoy angayan nilang masabtan—ang kabahin sa pagtulun-an mahitungod sa Dios nga nahimong tawo(Incarnation).

Lisod gayod kini sabton, susama da nga dili sa hingpit masabot nato ang mga butang niining kalibutana. Unsa na kaha ang pagsabot nato sa Dios? Mao nga kini usa ka misteryo! 63aAng naghatag ug kinabuhi mao ang Espiritu; dili kini mahimo sa tawo. Agad pa unta nga kining mga pulonga maoy makahatag nato og kasayon sa pagbaton sa lig-ong pagtuo. 63bAng mga pulong nga akong gisulti kaninyo—Espiritu ug kinabuhi; 64apan pipila kaninyo wala manuo.” (Nahibalo si Jesus sukad pa sa sinugdan kinsay dili motuo, ug kinsay magbudhi kaniya.) Ang mensahe ni Cristo sa Eyukaristiya nagsukad diay sa buhat sa Espiritu. Ang pagdawat kang Jesus isip balaang Pan sa kinabuhi wala magasalig sa unsay atong makita sa linawas, kondili unsay atong matugkad pinaagi sa “panglantaw sa pagtuo” (vision of faith). 65Ug midugang siya sa pag-ingon, “Mao man gani nga gisultihan ko kamo nga walay makaari kanako gawas kon itugot kini sa Amahan.”

Ania mipatighulog na kita ngadto sa laing misteryo sa Kinabuhi sa Dios—ang kinabuhi sa Tulo ka mga Personas. Ang kahiusahan sa Dios diha sa tulo ka mga Personas mao ang gilarawan niining misteryo sa Eyukaristiya. Diha sa Talad sa Dios, anaa gitunol ngari kanato ang Kinabuhi sa Trinidad —Amahan, Anak ug Espiritu Santo. 66Tungod niini daghan sa iyang mga tinun-an mibiya ug wala na gayod mokuyog kaniya. 67Busa miingon si Jesus sa 12 ka tinun-an, “Ug kamo, mobiya ba usab kamo kanako?” Si Jesus mihagit usab kanato: Mobiya ba usab kamo? 68Si Simon Pedro mitubag kaniya, “Ginoo, kinsa may among kapaingnan? Anaa kanimo ang mga pulong nga naghatag ug kinabuhing walay kataposan. 69Nagtuo kami ug nasayod nga ikaw mao ang Balaan sa Dios.”