1Ang mga Pariseo ug pipila sa mga magtutudlo sa Balaod nga gikan sa Jerusalem mialirong kang Jesus. 2 Ug na­matikdan nila nga may mga tinun-an ni Jesus nga nangaon nga “hugaw” og kamot, sa ato pa, wala sila makapanghunaw sumala sa paagi nga gitudlo sa mga Pariseo nga buhaton sa mga tawo. (3 Kay ang mga Judio gud, labi na ang mga Pariseo, nagtuman man sa mga gitudlo sa ilang mga katigulangan. Dili mokaon ang mga Pariseo kon dili una sila makapanghunaw sa hustong paagi, 4 ni mokaon sila ug bisan unsa nga gikan sa merkado kon dili pa nila kini kahugasan. May daghan pang mga sugo nga ilang nadawat ug gituman, ingon pananglit sa hustong paagi sa paghugas sa mga tasa, mga kulon, mga panaksan nga tumbaga, ug mga higdaanan.) 5 Busa nangutana kang Jesus ang mga Pariseo ug ang mga magtutudlo sa Balaod. “Ngano ba nga ang imong mga tinun-an wala man magtuman sa mga sugo nga gibilin sa atong mga katigulangan, kondili nangaon hinuon nga hugaw og kamot?” 6 Si Jesus mitubag kanila, “Wala gayod masayop si Isaias sa iyang gipanagna mahitungod kaninyo. Mga tigpakaaron-ingnon kamo, sumala sa giingon sa Dios nga gisulat ni Isaias: ‘Kining mga tawhana nagpasidungog kanako sa pulong lamang, Apan ang ilang kasingkasing halayo kanako. 7 Kawang lamang ang ilang pagsimba kanako, Kay ilang gitudlo nga balaod sa Dios ang mga sugo nga hinimo lamang sa tawo!' 8 Ug midugang si Jesus sa pag-ingon, “Gipasagdan ninyo aug mga sugo sa Dios ug mao hinuoy inyong gituman ang mga pagtulon-an nga iya sa tawo.” 14 Unya gipaduol pag-usab ni Jesus kaniya ang panon sa katawhan, ug miingon siya kanila, “Pamati kamong tanan ug sabta ninyo kini: 15 bisan unsa nga mosulod sa baba sa tawo dili makahugaw kaniya. 21 Kay gikan sa sulod, gikan sa kasingkasing sa tawo, manggula ang mga daotang hunahuna, pagpakighilawas, pagpangawat, pagpatay, 22 pagpanapaw, pagkaibog, pagpanlimbong, kalaw-ay, kasina, pagbutangbutang, pag­pagarbo, ug pagbinuang — 23 kining tanan naggikan sa sulod sa tawo ug maoy makahugaw kaniya.” Ang Ebanghelyo sa Ginoo.

KAHULOGAN SA EBANGHELYO (Markos 7:1-8,14-15, 21-23)

1 Ang mga Pariseo ug pipila sa mga magtutudlo sa Balaod nga gikan sa Jerusalem mialirong kang Jesus. Sa Ebanghelyo sumala ni San Markos, ang usa ka dapit nagabaton og bililhong kahulogan. Jerusalem mao ang sentro sa mga kaatbang ni Jesus. Sa unang napulog usa (11) ka mga kapitulo kon ulohan sa Ebanghelyo, nga nagsaysay sa unang bahin sa ministro ni Jesus, sa matag higayon nga adunay pagsulti kabahin sa Jerusalem ang kahulogan mao kanunay ang pakigbatok kang Jesus. Gikan sa Jerusalem nga mao ang sentro sa mga kalihokang politika ug relihiyon anaa ang mga madinumtanon nga pag-atake batok kang Jesus. Ug sa dili madugay ang mga punu-an sa nasud magtagbo sa Jerusalem aron sa pagpahamtang og silot sa kamatayon ngadto kang Jesus.

2 Ug namatikdan nila nga may mga tinun-an ni Jesus nga nangaon nga “hugaw” og kamot, sa ato pa, wala sila makapanghunaw sumala sa paagi nga gitudlo sa mga Pariseo nga buhaton sa mga tawo. (3 Kay ang mga Judio gud, labi na ang mga Pariseo, nagtuman man sa mga gitudlo sa ilang mga katigulangan... Ang tinuod nga suliran mao kini: ang gipanagsultihan dili mao ang balaod mahitungod sa kalinis kondili ang mga gibuhat nga rituwal nga may kadugtungan sa relihiyon, mahitungod sa unsay “balaan o dili balaan”. Kining tanang mga ginagmayng mga balaod gisulat sa Balaod ni Moises nga mabasa sa Levitiko 11.

Dili tinuod nga sila wala magtagad sa balaod. Gipaningkamutan hinoon nila ang pagsunod gayod niini bisan pa gani sa kinagamyang letra niini. Adunay kapin sa 600 ka mga balaod nga ilang gisunod. Ang tuyo sa maong mga balaod mao unta nga sa bisan unsa nga ilang buhaton sulod sa matag takna sa ilang kinabuhi sila mahinumdum sa gugma sa Dios. Apan ang nakaparat tungod kay samtang gipakadak-an nila ang pagsunod sa mga ginagmayng bahin niini, nahikalimtan hinoon nila ang pagsunod sa mas labi pang mahinungdanon. 5 ... “Ngano ba nga ang imong mga tinun-an wala man magtuman sa mga sugo nga gibilin sa atong mga katigulangan ...

Adunay tulo ka mga gisugyot nga hinungdan ngano nga ang mga tinun-an ni Jesus wala magtuman sa mga sugo nga gibilin sa ilang mga katigulangan: Ang mga tinun-an ug si Jesus mismo, mga taga Galilea. Ang mga katawhan sa maong dapit manggisulundon sa sugo sa balaod, apan tingali nagdugang usab sila og mga balaod sumala sa ilang kustombre nga alang sa mga taga Jerusalem wala mahisibo sa ilang paagi sa pagsunod sa balaod. Kay ang mga taga Jerusalem hilabihan sa ka estrikto sa ilang pagsunod sa balaod. Mao nga si Jesus nagpakitag kaluoy ngadto sa mga kabos, mga makasasala, mga daotang mga babaye, mga kobrador sa buhis, mga langyaw, ug uban pa. Tungod kana kay lagi aron magaanan ang ilang gipas-an gumikan sa kabug-at sa balaod.

Si Jesus naghatag og bili sa pagka-unibersal sa iyang misyon, sa ato pa, alang sa tanang tawo sa tanang dapit. Iyang gihulma ang iyang mga tinun-an sumala sa mga nagkalainlaing kinaiya o kustombre sa ubang mga pundok sa katawhan nga dili mga Judio. Buot ni Jesus nga madawat usab ang ilang gitudlo—ang mensahe sa Pagtuo—sa mga dili Judio. Si Jesus mismo mihatag sa ikatulong hinungdan. Ang tradisyon iya kana sa Tawo. Busa ang balaod diay adunay kausaban o evolution.

6 Si Jesus mitubag kanila, “Wala gayod masayop si Isaias sa iyang gipanagna mahitungod kaninyo. Mga tigpakaaron-ingnon kamo, sumala sa giingon sa Dios nga gisulat ni Isaias: ‘Kining mga tawhana nagpasidungog kanako sa pulong lamang, Apan ang ilang kasingkasing halayo kanako. 7 Kawang lamang ang ilang pagsimba kanako, Kay ilang gitudlo nga balaod sa Dios ang mga sugo nga hinimo lamang sa tawo!'

Aron sa pagmatuod nga ang gisulti ni Jesus batok sa mga Pariseo ug mga magtutudlo sa balaod may kamatuoran, siya mikutlo sa balaang kasulatan. 14 Unya gipaduol pag-usab ni Jesus kaniya ang panon sa katawhan, ug miingon siya kanila, “Pamati kamong tanan ug sabta ninyo kini: …

Si Jesus mihagit kanila sa pagsabot!

21 Kay gikan sa sulod, gikan sa kasingkasing sa tawo, manggula ang mga daotang hunahuna, pagpakighilawas, pagpangawat, pagpatay, 22 pagpanapaw, pagkaibog, pagpanlimbong, kalaw-ay, kasina, pagbutangbutang, pag­pagarbo, ug pagbinuang — 23 kining tanan naggikan sa sulod sa tawo ug maoy makahugaw kaniya.” Dinhi si Jesus mitudlo sa usa ka mahinungdanong prinsipyo sa ethics (unsay maayo ug dautan). Alang kang Jesus ang labing dakong sayop mao ang unsay anaa sa sulod sa atong kasingkasing—ang pagka kulang sa gugma! Ang tanang sala anaa nagagikan sa atong kasingkasing!