advertisement
EDITORIAL

Not the last time

CARTOON
Opinion
Archived Issues
O P I N I O N

email: joesum@mozcom.com

Ika-19 nga Domingo sa Tuig (B) Agosto 13, 2006

EBANGHELYO (Juan 6:41-51)

41Ang mga Judio nagbagulbol batok kaniya, kay miingon man siya, “Ako ang pan nga gikan sa langit.” 42Busa miingon sila, “Dili ba siya si Jesus, ang anak ni Jose? Nakaila kita sa iyang amahan ug inahan, busa nganong miingon man siya nga gikan siya sa langit?” 43Si Jesus mitubag, “Ayaw kamo pagbagulbol. 44Walay makaari kanako gawas kon ang Amahan nga nagpadala kanako magdani kaniya, ug banhawon ko siya sa kataposang adlaw. 45Ang mga propeta nagsulat nga ‘Ang tanang tawo tudloan sa Dios.' Ang mamati sa Amahan ug makakat-on gikan kaniya, moari kanako. 46Apan wala kini magpasabot nga may nakakita sa Amahan; siya nga gikan sa Dios mao lamay nakakita sa Amahan. 47Sultihan ko kamo: ang motuo may kinabuhing walay kataposan. 48Ako ang pan nga naghatag sa kinabuhi. 49Ang inyong mga katigulangan mikaon sa mana didto sa kamingawan, apan nangamatay gihapon sila. 50Ang mokaon sa pan nga gikan sa langit dili mamatay. 51Ako ang pan nga gikan sa langit nga naghatag sa kinabuhi. Ang mokaon niining pan dili gayod mamatay. Ug ang pan nga akong ihatag mao ang akong unod aron mabuhi ang kalibotan.” Ang Ebanghelyo sa Ginoo.

KAHULOGAN SA EBANGHELYO (Juan 6:41 -51)

41Ang mga Judio nagbagulbol batok kaniya, kay miingon man siya, “Ako ang pan nga gikan sa langit.” 42Busa miingon sila, “Dili ba siya si Jesus, ang anak ni Jose? Nakaila kita sa iyang amahan ug inahan, busa nganong miingon man siya nga gikan siya sa langit?” Kon susihon nato pag-ayo kining maong panghitabo, aniay usa ka dakong kamatuoran nga a-ngayan sa atong pagpamalandong. Sa dihang si Jesus nagtudlo mahitungod sa pagtulun-an sa Eyukaristiya ngadto sa mga katawhan, atong nasayran nga sila, ang mga labing unang naminaw, nagbagulbol. Dili diay bag-o ang panghitabo sa atong panahon karon nga adunay wala ug dili gayod makadawat sa pagtulun-an nga nahimong sentro sa misteryo sa atong pagtuo, ang Eyukaristiya.

Dili nato hukman ang mga tawo nga wala mutuo niini. Hinoon atong maaninaw unsa diay gayod kabililhon ang gasa sa pagtuo nga gitugyan nato gikan ni Jesus sa Eyukaristiya. Ang maong pagtuo dili masabot sa pangisip lamang sa tawo, kondili nahimo kining dakong kabahin sa gasa sa pagtuo nga gihatag mismo sa Dios Amahan ngadto sa mga matuohon. 43Si Jesus mitubag, “Ayaw kamo pag­bagulbol. 44Walay makaari kanako gawas kon ang Amahan nga nagpadala kanako magdani kaniya… 45aAng mga propeta nagsulat nga ‘Ang tanang tawo tudloan sa Dios.' Gibarogan ni Jesus ang iyang gipamulong nga dili masabtan sa tawhanong pagtugkad lamang. Mao kini ang gitawag og “grasya sa pagtuo”, nga sa ato pa usa ka lakang nga iya gayod sa Ginoo (God's iniative) ug dili gumikan sa tawo.

Mahitabo kini tungod kay ang Ginoo labaw man kanato. Anaay mga kamatuoran mahitungod kaniya nga dili masabtan sa hunahuna sa tawo. Dili ang Dios mabutang sa usa ka makina o laboratoryo. Lahi Siya! Wala Siyay Sama (Totally Different). Ang atong mahimo mao lamang ang pagpaminaw ug pagtuo sa iyang gipamulong! Usahay dili kita makasabot sa Dios tungod kay kulang man ang atong pagpaminaw Kaniya. 45bAng mamati sa Amahan ug makakat-on gikan kaniya, moari kanako.

Duha ka mga pagtulun-an ang gipadayag ni Jesus alang kanato: Una, ang labing mahinungdanong papel sa grasya, nga nagsukad sa kaayo sa Dios, ug angay nga atong dawaton uban sa kahinangop. Ikaduha, ang dili ikalimod nga papel sa kagawasan (freedom), nga mao ang atong tawhanong tubag sa Dios nga kinahanglan giubanan sa atong kaugalingong paningkamot.

Ang Amahan nagtudlo, naghatag, ug nagdapit. Apan ang tawo usab kinahanglan nga maminaw ug motubag o magdumili sa pagpaminaw ug pagtubag. Kadto lamang naminaw ang makasulod sa misteryo nga gitudlo sa Dios kanato mahitungod sa Pan sa Kinabuhi. Dili diay gayod mahimo kon dili ang tawo maminaw sa Amahan! 46Apan wala kini magpasabot nga may nakakita sa Amahan; siya nga gikan sa Dios mao lamay nakakita sa Amahan. Si Jesus maisugong mipadayag nga wala siya moanhi sa kalibutan aron sa pagdala og usa ka ideyolohiya o laray sa unsay maayo o dautan (ethics), o panglantaw nga maayo o politikanhong baroganan (political agenda). Mipasabot siya nga siya gikan sa Dios ug nga siya lamang ang tinuoray nga nakaila sa Dios! Sa tinuoray, siya mao ang Matuod nga Presensya (Real Presence) sa Ginoo dinhi sa atong kalibutan.

Ang Dios nga dili Makita nagpakita diha kang Jesus. Siya ang Dios nga nahimong tawo ug mipuyo uban kanato! Ang dili makitang Dios nahimong Makita diha kang Jesus! Unsa may atong giganahan sa pagsimba? Ang pari ba? Ang awit ba? Ang kaanindot ba sa palibot? Ang ato bang mga gikauban? Usahay baya mao ni sila ang mga babag sa atong tinuoray nga pagkakaplag sa Dios panahon sa mga kasaulogan sa Santos nga Misa!

47Sultihan ko kamo: ang motuo may kinabuhing walay kataposan. Makalingaw! O Makapalibog! Apan kon bukas kita sa gasa sa pagtuo, kini dili gayod kaduhaduhaan. 48Ako ang pan nga naghatag sa kinabuhi. Si Jesus nangahas sa paglitok sa usa ka pulong nga dili unta pagalitokon: YHWH, nga sa ato pa Ako mao Ako “ang Pan nga naghatag sa kinabuhi.” 51Ako ang pan nga gikan sa langit nga naghatag sa kinabuhi. Ang mokaon niining pan dili gayod mamatay. Ug ang pan nga akong ihatag mao ang akong unod aron mabuhi ang kalibotan.” Dili makit-an sa mga tawhanong mata sa tawo, apan tataw nga makita uban sa Pagtuo!

1
The Bohol Sunday Post, copyright 2006, All Rights Reserved
For comments & sugestions please email: webmaster@discoverbohol.com
--About Us
--Contact Information
--HOMEpage
VOLUME XXI No. 5
Tagbilaran City, Bohol, Philippines
August 13, 2006 issue