1Duha ka adlaw na lamang sa dili pa saulogon ang Pangilin sa Pagsaylo ug ang Pangilin sa Pan nga Walay Patubo. Ang kadagkoan sa mga pan ug ang mga magtutudlo sa Balaod nangita ug paagi sa pagdakop kang Jesus sa tago aron patyon nila. 2Sila miingon, “Dili ta kini buhaton sa panahon sa pangilin kay tingali unyag magubot ang katawhan.” 3Didto si Jesus sa Betania, sa balay ni Simon nga sanlahon. Samtang nagkaon siya, miabot ang usa ka babaye nga may dalang tibod nga alabastro nga puno sa agwa nga mahal kaayo, hinimo gikan sa lunsayng nardo. Gibuak niya ang tibod ug gibubo ang agwa sa ulo ni Jesus. 4Apan nangasuko ang pipila sa mga tawo nga didto niadtong higayona ug nag-ingnanay, “Pagkausik gayod sa agwa! Ikabaligya man unta kanag kapin sa tulo ka gatos ka denario ug ang halin ikahatag sa mga kabos!” Ug ilang gisaway pag-ayo ang babaye. 6Apan miingon si Jesus kanila, “Pasagdi ninyo siya! Nganong samokon man ninyo siya? Usa ka maayong butang ang iyang gibuhat alang kanako. 7Kanunayng ikauban ninyo ang mga kabos, ug bisan unsang panahona nga buot kamo motabang kanila, inyo kanang mahimo. 8Apan ako dili kanunay ikauban ninyo. Gihimo niya ang kutob sa iyang maabot, ug giagwahan niya ang akong lawas aron pag-andam niini alang sa umaabot nga paglubong. 9Ug timan-i kini: bisag asang dapita sa kalibotan iwali kining Maayong Balita, hisgotan gayod ang nahimo niya aron paghandom kaniya.” 10Unya si Judas Iscariote nga usa sa napulog-duha ka tinun-an miadto sa kadagkoan sa mga pari aron pagtugyan kang Jesus ngadto kanila. 11Ug sa pagkadungog nila niini, nalipay sila ug misaad paghatag kaniyag salapi. Busa si Judas nangitag maayong higayon sa pagbudhi kang Jesus. 12 Sa unang adlaw sa Pangilin sa Pan nga Walay Patubo, ang adlaw nga maoy iihaw sa mga karnero nga kan-on inigsaulog sa Pangilin sa Pagsaylo, ang mga tinun-an nangutana kang Jesus, “Asa mo man kami paadtoa aron andamon namo ang panihapon?” 13Ug gisugo ni Jesus ang duha kanila ug giingnan, “Pangadto kamo sa siyudad, ug usa ka tawo nga naglukdog usa ka tadyaw nga tubig motagbo kaninyo. 14 Kuyog kamo kaniya ngadto sa balay nga iyang adtoan, ug ingna ang tag-iya sa balay, ‘Ang Magtutudlo nag-ingon, “Hain ang kuwarto alang kanako diin ako makigsalo sa akong mga tinun-an sa paniha­pon sa Pasko?”' 15 Unya tultolan kamo niya sa usa ka dakong kuwarto sa itaas nga sangkap sa galamiton ug inandam na. Andama ninyo didto ang atong pagkaon.” Ang Ebanghelyo sa Ginoo.

oOo

KAHULOGAN SA EBANGHELYO (Mk 14:1-15 — Unang Bahin sa Pasyon)

Tungod sa kataas sa Ebanghelyo nga nagsaysay sa mga Kasakitan nga nahiaguman ni Jesus, magpalain kita pinaagi sa pagkomentaryo una sa liturhiya nga saulogon panahon sa Semana Santa. Ang mga kasaulogan sa liturhiya niining semanaha mao ang labing mabulokon ug makahuloganon sa tibuok tuig. Angayan nga masayran nga ang liturhiya niining semanaha kinahanglan gayod nga pamalandongan sa matag usa kon kini sination sa matag tumutuo. Ang mga panghitabo nga gisaysay ug gisaulog sulod sa Semana Santa maoy nakapausab sa dagan sa kasaysayan sa tawo ug nakapausab sa hulagway sa nawong sa kalibutan. Dili mahimo nga basahon lamang ang Ebanghelyo sa makausa lamang. Kinahanglan nga adunay pagbalikbalik sa pagbasa niini aron makasulod kita sa mga nagkalainlaing panghitabo nga gisaysay niini. Ang kaagi ni Jesus nga nahitabo sa Semana Santa maoy giisip nga “Maayong Balita mahitungod ni Cristo” sa iyang kinatibuk-an. Sa Ebanghelyo sumala ni San Markos, ang saysay sa kasakitan ug kamatayon ni Jesus mokabat og ika-limang bahin (1/5) sa kinatibuk-an sa maong Ebanghelyo.

Kinahanglan nga madiskobrehan nato ang kahulogan sa kamatayon ni Jesus sa atong kinabuhi! 8 Apan ako dili kanunay ikauban ninyo… ug giagwahan niya ang akong lawas aron pag-andam niini alang sa umaabot nga paglubong. Ang unang bahin sa Pasyon nagsaysay mahitungod sa laraw batok kang Jesus, sa pagdihog og agwa kang Jesus, sa pagbudhi ni Judas, sa pagpa-ngandam sa Panihapon sa Pasko, sa pagpadayag sa pagbudhi nga himoon ni Judas ngadto kang Jesus, sa katukoran sa Eyukaristiya, ug sa kasakitan sa tanaman sa Getsemani. Kining maong mga detalye nagtug-an nato nga si Jesus nakasinati og kasakitan nga iyang gibati sa iyang kaugalingong galamhan laman (interior suffering), una pa niya sa tinuod masinati ang lawasnong pagpasakit (exterior suffering). Sa wala pa siya dakpa, si Jesus daan nang nakasinati sa mga kasakitan ug sa umaabot nga kamatayon sulod sa iyang kaugalingong galamhan. Si Jesus nakakita nang daan sa tanan nga iyang mahiaguman bisan kon kini wala pa mahitabo. 12 Sa unang adlaw sa Pangilin sa Pan nga Walay Patubo…

Upat ka higayon nga atong mabasa kining pulonga Pangilin sa Pan nga walay Patubo sa upat ka higayon (Mk 14:12 , 13, 14, 16). Alang sa mga Judio kining maong pangilin nagkahulogan og Kagawasan. Ang mga katawhan nga kanhi mga ulipon karong giluwas uban sa tabang sa Ginoo! Si Jesus wala magdumili sa pagdawat sa Iyang mga kasakitan ug kamatayon alang sa atong kaluwasan. Tungod sa kamatayon ni Jesus sa krus, ang krus aduna nay bag-ong kahulogan! Ang pasiuna nga saysay (Mk 14:15 ) natapos sa pagpangandam sa Panihapon sa Pasko. Niining tungora, angayan nga atong lantawon nga sa umaabot nga Huwebes Santo, atong saulogon ang pagmugna sa Sakramento sa Eyukaristiya. Dinhi gihatag ang Lawas ug Dugo ni Jesus kanato! Ang dakong hinungdan sa iyang pagtugyan sa iyang Lawas ug Dugo mao ang iyang dakong Gugma!

Inay nga maglibog kita kon igo na pa nga ang Lawas ni Cristo (Hostiya) maoy atong makalawat o kinahanglan ba gayod nga ang Lawas ug Dugo (Bino) atong makalawat; o inay nga magsumpaki kita kon ihungit ba o dawaton ba sa atong mga kamot ang atong gikalawat, mas labaw pa niini mao ang lawom nga pagpamalandong sa misteryo sa Gugma sa Dios. Dili unta kini magpalayo sa tinuod nga kahulogan niining maong balaang misteryo. Kon mopadayon kita sa sumpay sa Ebanghelyo (Markos 14:16 -72; 15: 1--47), adunay usa ka mahinungdanong butang nga angay hatagan sa dakong pagtuki:

Si Jesus mipasabot sa iyang pagkabiniyaan. Ang iyang mga Apostoles mobiya kaniya ug si Pedro mismo modumili sa pag-angkon kaniya (Mk 14:27 ,30). Didto sa Getsemani, mag-inusara siya sa iyang pag-ampo (Mk 14: 33 -41). Niining Semana Santa 2006, mobiya ba ako usab kang Jesus, pinaagi sa akong walay pagpakabana o pagdumili sa pag-apil sa mga kalihokan sa paghandum sa iyang balaang Kasakitan ug Kamatayon ? Unsa may akong panan-aw sa mga nagkadaiyang kasakitan ug sa dili kalikayang kamatayon nga mahiaguman sa matag usa kanato?