20Pipila ka mga Griego nahiuban niadtong nanungas ngadto sa Jerusalem aron pagsimba sa panahon sa pangilin. 21Miduol sila kang Felipe nga taga Betsaida sa Galilea, ug miingon, “Sir, buot kaming makigkita kang Jesus.” 22Busa miadto si Felipe ug misugilon kang Andres, ug silang duha nangadto kang Jesus ug ilang gipahibalo siya. 23 Si Jesus mitubag kanila, “Ang takna miabot na nga ang Anak sa Tawo pasidunggan pag-ayo. 24Sultihan ko kamo: ang usa ka lugas trigo magpabilin nga usa ra gayod ka lugas gawas kon kini ipugas sa yuta ug mamatay. Kon kini mamatay, mamunga kinig daghan. 25Ang magmahal sa iyang kaugalingong kinabuhi mawad-an hinuon niini, apan ang dili mahinugon sa iyang kinabuhi niining kalibotana, magpatunhay niini alang sa kinabuhing dayon. 26Ang buot mag­alagad kanako kinahanglan mosunod kanako aron kon hain ako, atua usab ang akong sulugoon. Ang akong Amahan magpasidungog kaniya nga mag-alagad kanako. 27 “Nabalaka ako —ug unsa may akong isulti? Moingon ba ako, ‘Amahan, ayaw ipadangat kanako kining taknaa'? Dili, kay ang hinungdan sa akong pag-anhi mao ang pagdawat niining takna sa pag-antos. 28Amahan, pasidunggi ang imong ngalan!” Unya may tingog gikan sa langit nga nagkanayon: “Gipasidunggan ko na kini, apan pasidunggan ko kini pag-usab.” 29Ang mga tawo nga nagbarog didto nakadungog sa tingog ug miingon sila, “Midalugdog man!” Ang uban miingon, “May anghel nga misulti kaniya!” 30Apan si Jesus miingon kanila, “Dili tungod kanako misulti kining tingoga, kondili tungod kaninyo. 31Karon mao ang panahon nga hukman ang kalibotan; karon palagputon ang nagmando niining kalibotana. 32Ug kon usa na ako gikan sa yuta, kabigon ko ang tanang tawo ngari kanako.” 33 (Sa pagsulti niya niini, iyang gipasabot ang matang sa kamatayon nga modangat kaniya.) Ang Ebanghelyo sa Ginoo.

oOo

KAHULOGAN SA EBANGHELYO (Juan 12: 20 -33)

20Pipila ka mga Griego nahiuban niadtong nanungas ngadto sa Jerusalem aron pagsimba sa panahon sa pangilin. 21Miduol sila kang Felipe nga taga Betsaida sa Galilea, ug miingon, “Sir, buot kaming makigkita kang Jesus.” 22Busa miadto si Felipe ug misugilon kang Andres, ug silang duha nangadto kang Jesus ug ilang gipahibalo siya. Mao kini ang katapusang pag-apil sa pangilin sa Pasko ni Jesus dinhi sa kalibutan.

Ania kini sa bahin sa Ebanghelyo sumala ni San Juan nga nagsaysay sa panghitabo human gayod sa madaugong pagsulod ni Jesus sa dakbayan sa Jerusalem , sa Adlaw sa mga Lukay. Taliwala niining kalampusan nga nakab-ot ni Jesus, ang mga Pariseo nag-ingananay: “Tan-awa, wala kitay mahimo; ang tanan misunod na kaniya.” Ug ang ilang napanid-an gisundan dayon pa gayod sa saysay diin adunay mga Griego — mga langyaw — nga nangita na kang Jesus.

Niini usab nga higayona nasinati ni Jesus ang kalapad sa iyang tahas isip Mangluluwas sa kalibutan. Ang mga Griego nagtug-an nga dili lamang diay kay ang mga Judio kondili usab ang mga dili-Judio labot ug lakip diay sa Simbahan nga gitukod ni Cristo. Dinhi nakit-an ni Jesus ang epekto sa iyang unyang kamatayon nga “mamunga gayod” ug “makapadani sa tanang mga tawo”. 23 Si Jesus mitubag kanila, “Ang takna miabot na nga ang Anak sa Tawo pasidunggan pag-ayo.

Gipadayag na ni Jesus ang pag-abot sa iyang takna. Ang “takna ni Jesus” mao ang takna sa iyang Krus, ang takna nga siya mapasidunggan taliwala sa mga dili ikag-asoy nga paka-ulaw, kamatayon ug kasakitan. Sukwahi gayod ang panan-aw sa Dios kay sa tawo: kay ang kahimayaan sa Dios anaa man sa pagpasakit sa iyang Anak nga si Jesus. Ang takna sa kahimayaan mao ang takna sa Krus nga maoy maghukom ug magluwas sa kalibutan.

24Sultihan ko kamo: ang usa ka lugas trigo magpabilin nga usa ra gayod ka lugas gawas kon kini ipugas sa yuta ug mamatay. Kon kini mamatay, mamunga kinig daghan. Ang takna ni Jesus mao ang takna sa iyang kamatayon, apan usab mao kini ang takna nga ang iyang kinabuhi mapilopilo (multiplied). Samtang nag-inusara siya sa krus, apan si Jesus gilibotan diay sa hilabihang kadaghang tawo sa tibuok kalibutan nga iyang naluwas.

25Ang magmahal sa iyang kaugalingong kinabuhi mawad-an hinuon niini, apan ang dili mahinugon sa iyang kinabuhi niining kalibotana, magpatunhay niini alang sa kinabuhing dayon. Alang kang Jesus, ang tinuod nga pagpakabuhi mao ang pagpakamatay!

Kining kamatuorana lisod sabton natong mga tawo. Apan anaa usab gayod kini sulod sa matag kasingkasing: nga ang tinuod nga kamatayon dili mao ang kamatayon sa lawas, kondili kamatayon tungod sa pagdumili sa paghatag sa kaugalingon ngadto sa Dios. Aron makasulod sa tinuod nga kinabuhi, kinahanglan ang kamatayon. 26Ang buot mag­alagad kanako kinahanglan mosunod kanako aron kon hain ako, atua usab ang akong sulugoon. Ang akong Amahan magpasidungog kaniya nga mag-alagad kanako.

Ang kinatibuk-an nga misteryo sa Gingharian sa Dios anaa nagatutok ug magsukad kang Jesus. Apan niining maong Gingharian si Jesus wala mag-inusara kay kitang tanan gidapit man nga makig-uban kaniya. 27a“Nabalaka ako—ug unsa may akong isulti? Moingon ba ako, ‘Amahan, ayaw ipadangat kanako kining taknaa'?

Ang kamatuoran nga ang iyang kamatayon alang sa kabuhian sa uban, bisan pa kon unsa ka dalaygon, nakapabalaka og dako uyamot ni Jesus. Sama da nga kita adunay kabalaka kon maabotan og mga dagkong mga problema, si Jesus nabalaka usab! 27bDili, kay ang hinungdan sa akong pag­anhi mao ang pagdawat niining takna sa pag-antos.

Bisan tinuod may kabalaka, apan tu-ngod kay kining kamatayona usa man ka pagsugot sa pagtuo (obedience of faith) o magsunod sa kabubut-on sa Amahan mao nga wala magpanuko si Jesus sa pagsagop niining matanga sa kamatayon. 28Amahan, pasidunggi ang imong ngalan!” Unya may tingog gikan sa langit nga nagkanayon: “Gipasidunggan ko na kini, apan pasidunggan ko kini pag-usab.”

Sa Ebanghelyo sumala ni San Juan , dili nato makita nga adunay panahon nga madaugon nga gipakita ni Jesus, sama sa transfiguration o pagkabalhin sa iyang panagway. Ngano man? Tungod kay alang kang Juan ang “madaugong takna ni Jesus mao man ang iyang takna sa krus”. 31Karon mao ang panahon nga hukman ang kalibotan... 32Ug kon usa na ako gikan sa yuta, kabigon ko ang tanang tawo ngari kanako.” Ang Paghukom ug ang Pagluwas mao ang duha ka panagway sa usa lamang sa realidad o kamatuoran nga mao ang gihulagway sa krus ni Jesus!