P(Si Jesus mingon,) 28 “Karon, unsa may inyong hunahuna? 29Dihay tawo nga may duha ka anak nga lalaki. Miadto siya sa magulang ug iyang giingnan, ‘Dong, pagtrabaho karong adlawa didto sa parasan.' Siya mitubag, ‘Dili ko motrabaho,' apan nausab ang iyang hunahuna ug miadto siya sa parasan. 30Unya ang amahan miadto sa manghod ug mao gihapon ang iyang giingon kaniya. ‘Oo, moadto ako,' mitubag siya, apan wala siya moadto. 31Kinsa man sa duha ang mituman sa buot ipabuhat sa amahan?” Sila mitubag, “Ang magulang.” Unya si Jesus miingon, “Sultihan ko kamo nga ang mga kobrador sa buhis ug ang mga dautang babaye mag-una pa kaninyo pagsulod sa gingharian sa Dios. 32Kay mianhi kaninyo si Juan nga Magbubunyag pagtudlo sa matarong nga pagkinabuhi, ug wala kamo motuo kaniya; apan ang mga kobrador sa buhis ug ang mga dautang babaye mituo kaniya. Bisan gani kamo, sa human ninyo makita kini, wala gihapon maghinulsol ni motuo kaniya.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 21:28-32)

28“Karon, unsa may inyong hunahuna?...

Kining maong pangutana gisulti ni Jesus ngadto sa mga lider niadtong panahona: ang mga punuang pari ug mga magtutudlo sa balaod. Bag-o pa lang nga gipapahawa ni Jesus ang mga mamaligyaay gikan sa templo (Mt 21:12-17), ug unya Iyang gitunglo ang kahoy nga wala mamunga (Mt 21:18-22). Ang mga kadagkoan sa Jerusalem naglagot kang Jesus ug nangutana kon diin siya og katungod sa paghimo niini. Sa ebanghelyo sumala ni San Mateo, si Jesus mitubag niini pinaagi sa tulo ka mga sambingay (Mt 21:28—22:14). Apan wala kini magpasabot nga wala kini kahulogan sa atong panahon karon. Ang pangutana ni Jesus: “Unsa may inyong…” kini nagpasabot nga kita usab angay nga motubag niini. 29Dihay tawo nga may duha ka anak nga lalaki. Miadto siya sa magulang ug iyang giingnan, ‘Dong, pagtrabaho karong adlawa didto sa parasan.' Siya mitubag, ‘Dili ko motrabaho,' apan nausab ang iyang hunahuna ug miadto siya sa parasan.

Ang una natong reaksyon mao nga daw way batasan kining anaka! Apan maayo gani kay nausab ang iyang baroganan. Si Jesus nagpakita lamang nato sa kausbanan sa tawo ngadto sa pagka-maayo! Bisag unsa pa ang kagahapon sa usa ka tawo, anaa pa gihapon ang paglaum nga siya mausab! Si Jesus dili gayod mopriso kanato sa atong kagahapon, hinoon siya moluwas! Nakit-an kanunay ni Jesus ang posibleng kabag-ohan sa matag usa kanato. 30Unya ang amahan miadto sa manghod ug mao gihapon ang iyang giingon kaniya. ‘Oo, moadto ako,' mitubag siya, apan wala siya moadto. Si Jesus mipakita sa dakong kalainan niining maong anak kon itandi sa iyang magulang. 31aKinsa man sa duha ang mituman sa buot ipabuhat sa amahan?”

Kon ikaw maoy motubag, unsa man usab ang imong hunahuna o gibati? Kinsa kanilang duha ang nagtuman sa kabubut-on sa Amahan?

31bSila mitubag, “Ang magulang.”

Mao usab tingali kini ang atong tubag. Dili igo ang pulong lamang; kinahanglan ang buhat!

Sa walay paghukom sa uban, kondili sa pagtan-aw sa atong kaugalingon, mangutana kita: aduna bay mga higayon nga susama kita sa ikaduhang igsoon? Dili ba usahay moingon man kita: Mituo man ko! Apan ang maong pagtuo ato bang giubanan sa saktong buhat? Dili ba kaha kutob ra kita sa pag-ampo sa “Mituo Ako” panahon sa Domingo, apan sukwahi sa maong pagtuo ang atong mga gibuhat sa ubang mga adlaw nianang semanaha? 31cUnya si Jesus miingon, “Sultihan ko kamo nga ang mga kobrador sa buhis ug ang mga dautang babaye mag-una pa kaninyo pagsulod sa gingharian sa Dios. Daw makapalibog! Sa unsang paagiha nga si Jesus midayeg na man hinoon sa mga kobrador sa buhis (giisip nga public sinners) ug dautang babaye (prostitutes)? Si Jesus wala magpasabot nga siya uyon sa mga dautang buhat; kondili nga kon kini sila magbag-o, mas maluwas pa kay sa mga nagtuo nga segurado silang maluwas tungod sa paghunahuna nga sila hingpit na! Usa sa mga makalilisang nga sala mao ang sayop nga panghunahuna nga dili na kinahanglanon ang Dios tungod kay sakto na man kita, wala na kitay gikinahanglang tabang kay hingpit na ta! Sa tinuoray walay tawo nga hingpit. Kita pulos mga makasasala!

Usa ka magsusulat nagkanayon, “ang sala, bisan pa kon kini dautan, mahimo nga maoy agianan sa grasya nga makatuhop sa kalag sa tawo. Mahimo nga ang grasya mosulod sa nahisalaag nga kalag. Ug dinhi ang kanhi nga nawala karon nakaplagan.” Sama sa mga makasasala nga midangop kang Jesus, ako bang gitunol ni Jesus ang akong pagkamakasasala aron pinaagi sa dili matungkad nga paagi sa Ginoo ako iyang hatagan sa Iyang nagbuhagay nga grasya? 32aKay mianhi kaninyo si Juan nga Magbubunyag pagtudlo sa matarong nga pagkinabuhi, ug wala kamo motuo kaniya; apan ang mga kobrador sa buhis ug ang mga dautang babaye mituo kaniya. Samtang kining sambingaya nagtug-an kanato sa dakong kalainan tali sa “sulti” ug sa “buhat”; tali sa “pagsugot sa ngabil” ug sa “pagdumili sa buluhaton” , kining bahina sa ebanghelyo nagtug-an kanato sa dakong kalainan tali sa “pagbaton og pagtuo” ug sa “pagdumili sa pagtuo”. Ug kining paghupot sa pagtuo nagkahulogan og kabag-ohan o kausaban ngadto sa pagka-maayo! 32bBisan gani kamo, sa human ninyo makita kini, wala gihapon maghinulsol ni motuo kaniya.” Ang pagtuo diay mao ang pagtuman sa kabubut-on sa Dios! Duha ra ang kapilian: ang kinabuhi nga mitubag sa tawag sa Dios og “Oo” o “Dili”!