PSi Jesus misugilon sa iyang mga tinun-an niining sambingaya: 1“Ang Gingharian sa langit sama sa tag-iya sa usa ka parasan nga sayo sa buntag milakaw aron pagpangitag mga tawo nga iyang patrabahoon. 2Miuyon siya paghatag kanila sa naandang suhol nga usa ka denario ang adlaw, ug gipadala sila ngadto sa iyang parasan. 3Sa pagka­alas nuybe, miadto na usab siya sa merkado ug didto nakita niya ang pipila ka tawo nga nagtindog nga walay buhat, 4busa miingon siya kanila, ‘trabaho usab kamo sa akong parasan, ug hatagan ko kamog hustong suhol' 5Ug nangadto sila. Unya sa pagka-alas dose ug sa pagka­alas tres mao gihapon ang iyang gihimo. 6Hapit na kadto mo-alas singko nga miadto siya sa merkado ug didto nakakita siyag laing pipila ka tawo nga walay buhat. Siya nangutana kanila, ‘Nganong giusikan man ninyo ang tibuok adlaw?' 7Sila nanubag, ‘Kay wala may mipatrabaho kanamo.' Ug miingon siya kanila, ‘Kon mao kana, trabaho usab kamo didto sa akong parasan.' 8Sa pagkasawomsom na, ang tag-iya miingon sa iyang kapatas, ‘Tawga ang mga mamumoo ug hatagi sila sa ilang suhol; unaha pagsuhol kadtong ulahing gipatrabaho ug ipaulahi kadtong unang gipatrabaho.' 9Ang mga tawo nga misugod pagtrabaho sa alas singko sa hapon, gisuholan og usa ka denario ang matag usa kanila. 10Busa sa pagduol na sa mga tawo nga unang gipatrabaho, nagtuo sila nga labaw pa ang ilang madawat; apan ang usag-usa kanila gihatagan usab og tagsa ka denario. 11Gidawat nila ang ilang suhol ug nagbagutbot sila batok sa agalon. 12Miingon sila, ‘Kining mga tawhana nga ulahi mong gipatrabaho nagtrabaho lamang sulod sa usa ka oras, samtang kami nagtrabaho sa tibuok adlaw ug napagba sa kainit. Apan bisan pa niini imo silang gihatagag samang suhol nga imong gihatag kanamo.' 13Ang agalon mitubag sa usa kanila, ‘Migo, pamati. Wala ako maglimbong kanimo, kay miuyon ka man sa suhol nga usa ka denario ang adlaw. 14Karon, dawata ang imong suhol ug pauli sa inyo. Maoy akong gusto nga kining tawhana nga ulahing gipatrabaho hatagan sa samang suhol nga akong gihatag kanimo. 15Wala ba diay akoy katungod sa paggamit sa akong kuwarta sumala sa akong gusto? O nasina ka ba hinoon kay ako manggihatagon man?”' 16Ug gitapos ui Jesus ang sambingay sa pag-ingon, “Busa kadtong naulahi mahiuna, ug kadtong nahiuna maulahi.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 20:1-16)

1“Ang Gingharian sa langit sama sa tag-iya sa usa ka parasan nga sayo sa buntag milakaw aron pagpangitag mga tawo nga iyang patrabahoon. Sayo pa sa buntag, aduna nay mga tawo nga naghulat og trabaho. Usa ka panghitabo nga hangtod sa atong panahon karon anaa pa. 2Miuyon siya paghatag kanila sa naandang suhol nga usa ka denario ang adlaw… 3Sa pagka­alas nuybe… didto nakita niya ang pipila ka tawo nga nagtindog.. 4busa miingon siya kanila, ‘trabaho usab kamo sa akong parasan… 5Ug nangadto sila. Unya sa pagka-alas dose ug sa pagka­alas tres mao gihapon ang iyang gihimo. 6… mo-alas singko nga miadto siya sa merkado ug didto nakakita siyag laing pipila ka tawo… Siya nangutana kanila, ‘Nganong giusikan man ninyo ang tibuok adlaw?' 7Sila nanubag, ‘Kay wala may mipatrabaho kanamo.' Ug miingon siya kanila, ‘… trabaho usab kamo didto sa akong parasan.'

Dili kini ordinaryo nga tag-iyag parasan kay gani bisan sa katapusang takna aduna siyay talagsaong kabalaka niadtong wala pay trabaho. Sulod sa tibuok adlaw, gikan sa buntag ngadto sa hapon, makalima nga siya midapit og mga motrabaho. Nagpakita siya sa iyang panghunahuna kabahin sa kamahinungdanon sa trabaho og suhol aron kahatagan og dignidad ang tawo. Ang “Gingharian sa Langit” maoy dapit sa kaluoy sa Dios. 8Sa pagkasawomsom na, ang tag-iya miingon sa iyang kapatas, ‘Tawga ang mga mamumoo ug hatagi sila sa ilang suhol; unaha pagsuhol kadtong ulahing gipatrabaho ug ipaulahi kadtong unang gipatrabaho.'

Dinhi nakita nato ang katuyoan sa tag-iya sa parasan: nga ang tanan makakita kon unsay iyang buhaton—diha sa pagsuhol una sa naulahi. Ngano kaha? Mahimo man unta nga iyang suholan og una ang mga nag-unag trabaho ug unya iyang palakton. 9Ang mga tawo nga misugod pagtrabaho sa alas singko sa hapon, gisuholan og usa ka denario ang matag usa kanila. 10Busa sa pagduol na sa mga tawo nga unang gipatrabaho, nagtuo sila nga labaw pa ang ilang madawat; apan ang usag-usa kanila gihatagan usab og tagsa ka denario. 12Gidawat nila ang ilang suhol ug nagbagutbot sila batok sa agalon… “Nagbagutbot”. Susama kini sa gihimo sa mga Israelitas nga nagbagutbot didto sa deserto (Exodus 16:9 ug Salmo 106:25). Hulagway usab kini kanato sa mga panahon nga adunay mga pagsulay. Ang Ginoo wala gayoy paborito. Alang sa mga naulahi susama ra ang iyang pagtagad ngadto sa mga nahiuna.

13Ang agalon mitubag sa usa kanila, ‘Migo, pamati. Wala ako maglimbong kanimo, kay miuyon ka man sa suhol nga usa ka denario ang adlaw. 14Karon, dawata ang imong suhol ug pauli sa inyo. Maoy akong gusto nga kining tawhana nga ulahing gipatrabaho hatagan sa samang suhol nga akong gihatag kanimo. 15Wala ba diay akoy katungod sa paggamit sa akong kuwarta sumala sa akong gusto? O nasina ka ba hinoon kay ako manggihatagon man?”' Dili kini mao ang higayon nga kita makakat-on og pagtulun-an mahitungod sa kaangayan o social justice. Dinhi hinoon matugkad nato ang usa ka pagtulun-an sa teolohiya kabahin sa misteryosong buhat sa Dios. Ania ang larawan nga iyang gipadayag kanato mahitungod sa iyang Amahan: Usa ka Ginoo nga nahigugma sa tanan, labi na sa mga sinalikway. Bisan sila—kadtong walay mipatrabaho—iyang gidapit gihapon ngadto sa iyang parasan. Usa ka Ginoo nga walay tihiktihik sa iyang pag-apod-apod sa iyang panalangin. Bisan gani kadto naulahi sa pagtrabaho iya mang gihatagan sa saktong suhol sumala sa iyang gisaad. Siya nagdapit sa tanang tawo, sa bisan unsang orasa, sa bisan unsang situwasyon.

Usa ka Ginoo nga wala magtan-aw sa unsay angay kanato lamang. Siya mohatag kanato labaw pa kay sa unsay angayan kanato. Usa ka Ginoo nga dili motugot nga adunay mga tawo nga maningil sa mga personal nga pribihiliyo o katungod ug tungod sa maong pribihiliyo nga ilang gituohan nga ila ra, sila usab mohikaw niini sa uban. Kay dili ba wala na man untay kalainan ang matag usa kanato kon misagop na kita ni Cristo (basaha sa Roma 3:22-31)? 16Ug gitapos ni Jesus ang sambingay sa pag-ingon, “Busa kadtong naulahi mahiuna, ug kadtong nahiuna maulahi.” Si Papa Juan Paulo II miingon, “Ang kaluoy maoy usa ka espesyal nga gahum sa gugma nga mas gamhanan pa kay sa sala ug mga buhat sa pagbudhi. Ang kaluoy mas molabaw pa kay sa balaanong kaangayan.”