PSi Jesus miingon ngadto kang Nicodemus, “Wala pay nakasaka sa langit gawas niadtong nanaog gikan sa langit¯ang Anak sa Tawo.” “Ingon nga giisa ni Moises didto sa kamingawan ang bitin nga tumbaga nga gibutang og tukon, ang Anak sa Tawo kinahanglan nga iisa usab, aron ang tanan nga motuo kaniya makabaton og kinabuhing walay katapusan. Kay gihigugma pag-ayo sa Dios ang kalibutan ug tungod niini gihatag niya ang iyang Bugtong Anak, aron ang tanan nga motuo kaniya dili mamatay, kondili makabaton hinoon sa kinabuhing dayon. Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini.”

ANG EBANGHELYO SA GINOO. KAHULOGAN SA EBANGHELYO

(Juan 3:13-17)

Pasiuna: Sa atong mga hunahuna, ang Krus may kalabutan sa Biyernes Santo. Ang Biyernes Santo nagpabilin nga usa ka pamalandong sa “mga kasakitan” ni Jesus, bisan pa kon ang saysay ni San Juan nga giproklamar nianang adlawa mitataw sa “pagka-Hari” ni Jesus.

Ang karaan nga tradisyong liturhikanhon nagsaulog sa Kadaugan sa Balaang Krus-”Ang Himayaong Krus”- sa adlaw sa Septiyembre 14, sukad pa sa tuig 335. Niadtong higayona bag-o pang nakabig sa Emperador Constantino. Siya ug ang iyang asawa nga si Sta. Elena mitukod didto sa Jerusalem sa simbahan sa “Anastasis”, pinulongang Griego sa Pagkabanhaw, didto gayod sa Golgotha ug sa Balaang Lubong. Kining maong pyesta nahimong labing popular didto sa Subangan kon Este sukad pa sa ika-5 nga siglo.

13Si Jesus miingon ngadto kang Nicodemus, “Wala pay nakasaka sa langit gawas niadtong nanaog gikan sa langit—ang Anak sa Tawo.

Kinsa si Nicodemus? Siya usa ka inilang Pariseo ug batid sa balaod nga miduaw ug nakigkita kang Jesus panahon sa kagabihon. Kining maong panagtagbo daw nalimin sa usa ka misteryo nga kinaiyahan. Ang kamatuoran mao gayod kini: nga sa wala pa moabot ang Dios, kitang tanan anaa pa sa kangitngit. Sama kang Nicodemus, kita mao ang mga katawhan nga “nangita pa sa kahayag”.

Dinhi gitudlo ni Jesus nga unsay langitnong ikatudlo lamang niadtong gikan sa langit. Ang balaan Krus maoy usa ka langitnong butang nga matugkad lamang Kaniya nga “nanaog gikan sa langit.”

Mao diay ngano nga kita mobukas ug andam gayod sa pagpamati kang Jesus sa iyang itudlo kanato taliwala sa atong “pagka-anaa pa sa kangitngit sa atong Pagtuo.”

14a”Ingon nga giisa ni Moises didto sa kamingawan ang bitin nga tumbaga…

Ang Ebanghelyo sa matag karon ug unya magpahinumdum nato sa pipila ka mga panghitabo nga gisaysay sa Daang Tugon. Kining hitaboa mahitungod sa bitin nga tumbaga nga giisa didto sa kamingawan nahibaloan sa kadaghanan. Sa panahon sa Exodo, didto sa Sinai, Ang mga Hebreo giataki sa mga malaang bitin (tan-awa sa Numero 21:6-9). Si Moises mihimo og tumbagang bitin ug iyang giisa sa tukon taliwala sa ilang kampo. Kining maong bitin may gahum sa pag-ayo sa ilang mga pinaakan sa bitin sa kamingawan (tan-awa sa Kaalam 16:17). Sulod sa dugay nang panahon, kini simbolo sa “caduceus” maoy usa ka timaan sa mga nagtrabaho isip manambal sa sakit sama sa doktor ug nurse ug uban pa. Sa mga magsusulat ug magtutudlo sa karaang panahon mao kini ang konkretong timailhan sa Pagtuo: ang kaayohan anaa diha pagpangayog tabang gikan sa Dios

14bang Anak sa Tawo kinahanglan nga iisa usab…

Gidapit kita sa pagtutok sa Balaang Krus - aron maayo. Mangahas kita sa pagtutok kang Jesus nga gilansang, nga giisa sa puntod sa Kalbaryo,

Nag-ampo ba ako atubangan sa Krusipiho?

Mao kini ang naghatod kanato ngadto sa misteryo nga maoy ilhanan niining maong kapyestahan, “Ang Kadaugan sa Krus”. Ang lawas ni Jesus giisa sa Krus ug si Jesus giisa usab ngadto sa tuong dapit tupad sa Amahan pinaagi sa Pagkabanhaw ug Pagsaka sa Langit.

15aron ang tanan nga motuo kaniya makabaton og kinabuhing walay katapusan.

Ang Krus nagtug-an kanato kon kinsa ang Dios. Matuod nga Buhat sa Gugma; Matuod nga Gasa sa Kaugalingon. Kining labing taas nga buhat sa gugma - nga alang kanatong mga tawo daw usa ka dakong binuang - mao hinoon ang kinaiya nga Labing natural nga gihuptan sa Anak sa Amahan. Sa Santisima Trinidad, ang Anak mao ang “kinatibuk-ang gugma” sa Amahan. Ug ang Krus mao lamang ang konkretong expresyon sa unsay gihimo sa Anak aron matuman ang kabubut-on sa Amahan: ang paghatag sa iyang kinatibuk-an ngadto sa uban sa walay kondisyon.

16aKay gihigugma pag-ayo sa Dios ang kalibutan ug tungod niini gihatag niya ang iyang Bugtong Anak,

Ang kamatayon sa Krus ni Jesus mao ang dakong timaan sa kinatibuk-ang gugma sa Amahan. Dinhi hingpit nga nabuksan ang kahulogan sa Krus. Una, usa ka timaan sa “kamaot” ug “tumina”, ug ikaduha, usa usab ka timaan sa “kadaugan” ug “kalampusan”.

16baron ang tanan nga motuo kaniya dili mamatay, kondili makabaton hinoon sa kinabuhing dayon.

Sa atong pagsagop sa kabubut-on sa Dios mahimo lamang pinaagi sa atong pagtuo. Ang pagtuo naghatag kanatog bag-ong panglantaw sa tanang tawo ug butang, labi na sa sala, dautan ug kamatayon. Ang atong kalibutan nga puno pa sa kahuyang, kadautan ug kalaog, gihigugma gayod sa Dios nga buot niya nga dad-on kini ngadto sa kahingpitan. Usa niana ka panahon motungha ang higayon “diin wala nay luha, walay paghilak, ug walay kasubo” (tan-awa sa Pagpadayag 21:4).

Oo, mahinungdanon nga atong mahinumduman nga ang dalan padulong sa kahingpitan - kinabuhing walay katapusan - nagsugod na. Apan, wala pa gayod kini hingpit nga natuman kondili gipadayonan pa!

17Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini.”

Ang Dios mao ANG BUHING GINOO! Labaw pa kay sa kamatuoran sa kamatayon, Siya mitanyag sa Iyang Kinabuhi aron kita mabuhi. Mao kini ang sentro sa tibuok Ebanghelyo.

Ang Dios buot moluwas kanatong tanan. Gihimo niya na ang tanan. Ang Krus mao ang madaugon ug mahimayaon nga timaan sa maong Misyon.