15 Kon ang imong igsoon makasala kanimo, adtoa siya ug pakit-a siya sa iyang sayop. Apan himoa kini nga kamo rang duha. Kon mamati siya kanimo, magkauli ang inyong maayong kabu­but-on. 16 Apan kon siya dili mamati kanimo, pagdalag usa o duha ka tawo, “aron ang matag sumbong kapamatud-an sa duha o tulo ka saksi,” sumala sa giingon sa Kasulatan. 17Ug kon dili gayod siya mamati kanila, isulti ang tanan ngadto sa iglesya. Ug kon dili siya mamati sa igles­ya, isipa siya nga usa ka langyaw o kobra­dor sa buhis. 18“Ug busa sultihan ko kamo: ang inyong idili dinhi sa yuta, idili usab didto sa langit, ug ang inyong itugot dinhi sa yuta, itugot usab didto sa langit. 19Ug sultihan ko pa gayod kamo: kon duha kaninyo dinhi sa yuta magka­uyon pagpangayo bisag unsang butanga, kini ihatag kaninyo sa akong Amahan nga atua sa langit. 20Kay kon may duha kon tulo nga magkatigom sa akong ngalan, atua ako uban kanila.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 18:15-20)

15aKon ang imong igsoon makasala kanimo…

Ang maong ebanghelyo kabahin sa ika-upat nga gitudlo ni Jesus sumala sa edisyon ni Mateo. Kini mao ang pagtulun-an mahitungod sa kinabuhing katilingbanon (community life).

Ang “katilingban” niadtong panahona mao ang gagmayng pundok sa mga Kristiyanos nga nagkatapok sa matag Domingo alang sa Eyukaristiya, ug kini mao ang “Simbahang lokal (local Church). Gikan pa sa sinugdanan sa Simbahan nalantaw ni Cristo nga ang Simbahan dili kay giapilan lamang sa mga tawong “santos” kondili sa mga tawong “makasasala”. Ang Kristiyanos diay dili kay mas maayo pa kay sa uban—nga maoy kasagarang madungog nato sa uban. Tataw kaayo nga ang Simbahan gilangkoban sa mga tawo nga huyang. Si Jesus wala magalantaw og usa ka Simbahan nga hingpit niining kalibutana. Hinoon si Jesus mao ang mopadayag sa mga pamaagi nga mahimo rang hingpit kini.

15badtoa siya ug pakit-a siya sa iyang sayop. Apan himoa kini nga kamo rang duha. Kon mamati siya kanimo, magkauli ang inyong maayong kabu­but-on. Makita nato dayon nga ang paagi ni Cristo mao kini: nga dili siya mopahimutang kanato nga daw “kita gihukman na”, kondili nga “kita gihigugma”. Kay dili ikalimod nga adunay mga tawo nga matawag nato og “righters of wrongs” nga walay laing gihimo gawas sa lamang sa pagpanaway. Apan ang pagkondinar ug pagpakaulaw sa mga makasasala sukwahi gayod sa hunahuna ni Jesus. Diha sa ebanghelyo mabasa nato nga alang sa mga makasasala ang nindot nga ipakita mao ang paghunahuna lamang sa ilang kaayohan ug ang pagpakita sa kaluoy. Kay adunay pagpangilabot, ang hinungdan mao lamang gayod ang gugma. Si Jesus nagbaton og maayong kabubut-on ngadto sa mga makasasala. Si Jesus nagsugyot nga mao gayod unta kini ang paagi nga gamiton sa panahon nga adunay panagbangi.

16Apan kon siya dili mamati kanimo, pagdalag usa o duha ka tawo, “aron ang matag sumbong kapamatud-an sa duha o tulo ka saksi,” sumala sa giingon sa Kasulatan. Human sa unang panagtagbo nga kamo rang duha—diin himoon ang kinasingkasing nga pagpadayag sa usag-usa pinaagi sa dialogue aron nga ang sala dili mahibaloan sa uban ug aron usab mapanalipdan ang dungog sa nihitungdan—kon dili siya maminaw, nan anha pa ipahibalo sa usa o duha ka tawo nga himoong tigpatiwala o mediators aron mahitabo ang panag-uliay. Kon dili pa gayod paminawon, anha pa pahitabo ang ikatulong pamaagi. 17Ug kon dili gayod siya mamati kanila, isulti ang tanan ngadto sa iglesya. Ug kon dili siya mamati sa igles­ya, isipa siya nga usa ka langyaw o kobra­dor sa buhis. Tungod kay gihimo naman ang tanan apan wala gayoy sangputanan, mao nga ania ang katapusang buhaton: ang pagdala sa maong suliran ngadto sa Iglesia o katilingban.

Ug kon walay nahimo human niini, wala na gayoy mahimo kay niining tungora ang nahitungdan mao na gayod ang wala maminaw ug wala modawat sa kahigayonan sa panaghiuliay. Sa ato pa, siya mismo mao na ang mipahibulag sa iyang kaugalingon sa katilingban. Human sa tulo ka higayon siya nagmagahion sa iyang baroganan. Ang katilingban nahimo nang walay gahum atubangan sa maong sakop. Apan wala kini magpasabot nga dili na siya higugmaon kay gani si Jesus nagsugo man sa paghigugma sa kaaway (Mt 5:43-48). 18“Ug busa sultihan ko kamo: ang inyong idili dinhi sa yuta, idili usab didto sa langit, ug ang inyong itugot dinhi sa yuta, itugot usab didto sa langit.

Nagpasabot lamang kini nga ang Dios nakiglabot gayod kanato bisan pa kon ania pa kita dinhi sa yuta. Kon unsay nahitabo tali kanato ug sa uban dinhi sa yuta kini may dakong kalambigitan didto usab sa langit. Tungod kay katuyoan man sa Dios nga wala untay bisan usa nga mawala mao ang paagi sa pagbadlong sa nakasalang igsoon maoy usa ka gabayan nga ang kaluoy sa Dios moabot ug mabati kanatong mga tawo. 19Ug sultihan ko pa gayod kamo: kon duha kaninyo dinhi sa yuta magka­uyon pagpangayo bisag unsang butanga, kini ihatag kaninyo sa akong Amahan nga atua sa langit. 20Kay kon may duha kon tulo nga magkatigom sa akong ngalan, atua ako uban kanila.” Si Jesus migamit na usab niining pulong “sultihan ko kamo” nga maoy ilhanan nga kini maoy usa ka pagpadayag sa usa ka misteryo nga natago pa sa kahibalo sa tawo. Unsay gikauyonan sa katilingban sa ngalan ni Jesus kini itugot sa langitnong Amahan!