Mibiya si Jesus miadtong dapita ug miadto sa kayutaan duol sa mga siyudad sa Tiro ug sa Sidon. 22Usa ka babaye nga taga-Canaan, nga nagpuyo niadtong dapita, miduol kaniya ug mituwaw, “Sir, Anak ni David, kaloy-i intawon ako! Ang anak kong babaye giyawaan ug nag-antus pag-ayo.” 23Apan wala motubag si Jesus. Miduol ang iyang mga tinun-an kaniya ug miingon, “Papahawaa siya kay nagsunodsunod siya kanato ug saba kaayo!” 24Unya mitubag si Jesus, “Gipadala ako ngadto lamang sa nawalang mga karnero sa nasod sa Israel.” 25Apan miduol ang babaye ug miluhod sa atubangan ni Jesus, “Sir, tabangi intawon ako!” miingon siya. 26Si Jesus mitubag, “Dili maayo nga kuhaon ang kalan-on sa mga anak ug ipakaon sa mga iro.” 27Ang babaye mitubag, “Tinuod kana, Sir, apan bisan gani ang mga iro makakaon man sa mga mumho nga mahulog gikan sa lamesa sa agalon. 28Ug si Jesus mitubag kaniya, “Inday, pagkadako sa imong pagsalig! Matuman ang imong gihangyo.” Ug niadto dayong gutloa naayo ang iyang anak. Ang Ebanghelyo sa Ginoo.

oOo

KAHULOGAN SA EBANGHELYO (Mateo 15:21-28)

21Mibiya si Jesus miadtong dapita…

Sa makadaghan atong nabasa nga si Jesus mobiya sa usa ka dapit. Niining higayona miadto siya sa laing dapit. Usa sa mga hinungdan niini mao nga sugod niadtong iyang pagpilopilo sa pan, ang mga katawhan naglaraw man gud nga ilang himoong hari si Jesus—hari nga kalibutanon. Sukwahi kini sa tinuod nga tuyo sa pag-anhi ni Jesus. Mao nga gilikayan niya ang pagkig-uban sa daghang mga tawo. Ang iyang panahon ug paningkamot iya hinoong gigugol sa pagporma sa iyang napulog duha ka mga apostoles. Gawas pa tungod sa kadaghan sa mga buhatonon adunay gayoy higayon nga siya nahago ug anaa sa tumang kakapoy. Ang iyang tubag niini mao ang paghimudlay ug ang pag-ampo.

21bug miadto sa kayutaan duol sa mga siyudad sa Tiro ug sa Sidon. 22Usa ka babaye nga taga-Canaan… miduol kaniya ug mituwaw, “Sir, Anak ni David, kaloy-i intawon ako! Ang anak kong babaye giyawaan ug nag-antus pag-ayo.”

Ang Tiro ug Sidon maoy mga teritoryo nga gawas sa Israel. Sentro kini sa patigayon ug nagkalainlain ang gigikanan sa mga lumulopyo niini. Ang babaye nga miduol kang Jesus taga Canaan. Ang taga Canaan mga kaaway sa Israel.

Ania ang dakong kahibulongang panghitabo. Samtang didto sa Israel nahimong kontrobersiya si Jesus, dinhi sa yutang langyaw, siya nakadungog sa usa ka pag-ampo sa pagtuo ug kini gikan pa gayod sa usa ka babaye. Ang gisinggit sa babaye usa man god ka liturhikanhong pag-ampo nga mao ang “Kyrie eleison” nga sa ato pa, kaloy-i ako. Ug ang “Anak ni David” maoy usa ka titulo sa Mangluluwas.

23Apan wala motubag si Jesus.

Ngano nga wala man motubag si Jesus sa pangaliyupo sa usa ka nagpakimaluoy nga inahan?

Niadtong higayona adunay mga hinungdan sa iyang paghilom: Si Jesus naghinay sa iyang mga gipakitang milagro kay tingali na usab og masaypan siya sama sa nahitabo didto sa Israel: Ang mga Pariseo nagtuo nga may gahum siya gikan sa yawa (Mt 12:24); ug ang daghang mga tawo nagtuo kaniya nga usa ka magikero (Mt 14:22). Mao nga daghang mga higayon nga si Jesus misugo sa iyang mga tinun-an sa pagpakihilom kabahin sa iyang mga milagro (Mk 1:34, 44; Mk. 7:36; Mk 8:26; Mk 9:9).

24Miduol ang iyang mga tinun-an kaniya ug miingon, “Papahawaa siya kay nagsunodsunod siya kanato ug saba kaayo!”

Mao unta kini ang labing sayon nga himoon. Kasagaran mao kini ang sukdanan kanatong mga tawo—shortcut, magdalidali o dili na ipaagi og saktong proseso.

Dili ba mao man usab kini ang atong buhaton—ang pagpangita og sayong solusyon, dili na buot nga maghago o maghulat og dugay pa?

24Unya mitubag si Jesus, “Gipadala ako ngadto lamang sa nawalang mga karnero sa nasod sa Israel.”

Sa una wala gayod si Jesus manumbaling. Karon mipatataw na siya sa iyang tubag—dili itugot ang among hangyo sa babayeng taga Canaan!

Ngano ba usab Jesus nga ang imong tubag DILI man? Sa makadaghan amo kining nasinati!

Apan ato rang masabtan si Jesus. Nagsunod lamang siya sa kabubut-on sa Amahan: nga ang iyang misyon nianang higayona alang lamang sa mga nawala nga banay sa Israel. Unya ra niya ihatag ngadto sa iyang mga tinun-an ang kaakohan sa pag-adto sa tibuok kalibutan aron pagsangyaw (Mt 28:19); ug kini mahitabo pa unya tapos siya mabanhaw (Mt 28:18). Samtang niining higayona, gidawat ang kamatuoran ni Jesus nga adunay limitasyon ang akab-oton sa iyang misyon. Usa kini ka larawan mahitungod sa Maayong Magbalantay (tan-awa sa Ezekiel 34:1-31).

25Apan miduol ang babaye ug miluhod sa atubangan ni Jesus, “Sir, tabangi intawon ako!” miingon siya.

Ang babaye mihimog mas lawom nga pag-ampo.

Mao ba usab kini ang atong gihimo panahon nga gisulay kita sa atong pagtuo? Mas nagmaampoon ba kita?

26Si Jesus mitubag, “Dili maayo nga kuhaon ang kalan-on sa mga anak ug ipakaon sa mga iro.”

Daw dili gayod ikahatag ang gipangayo!

27Ang babaye mitubag, “Tinuod kana, Sir, apan bisan gani ang mga iro makakaon man sa mga mumho nga mahulog gikan sa lamesa sa agalon.

Iro tuod apan dili ba kabahin man siya sa panimalay? Usa ka makinaadmanon nga tubag!

28Ug si Jesus mitubag kaniya, “Inday, pagkadako sa imong pagsalig! Matuman ang imong gihangyo.” Ug niadto dayong gutloa naayo ang iyang anak. Kinahanglan nga mahagit usab kita sa atong pagtuo—nga adunay daghan nga naghulat, bisan na lang sa mumho, gikan kanato.