Human sila makakaon, miingon si Jesus kang Simon Pedro, "Simon, anak ni Juan, gihigugma mo ba ako labaw sa imong paghigugma sa uban?" Siya mitubag, "Oo, Ginoo, nasayod ka nga gihigugma ko ikaw." Si Jesus miingon kaniya, "Atimana ang akong mga nating karnero." 16 Unya miingon na usab si Jesus kaniya, "Si­mon, anak ni Juan, gihigugma mo ba ako?" Si Simon mitubag pag-usab, "Oo, Ginoo, nasayod ka nga gihigugma ko ikaw." Si Jesus miingon kaniya, "Atimana ang akong mga karnero." 17Unya, sa ikatulong higayon, si Jesus miingon, "Simon, anak ni Juan, gihigugma mo ba ako?" Si Pedro nasubo tungod kay gipangutana man siya ni Jesus sa makatulo kon siya gihigugma ba niya, ug si Pedro mi­ingon kaniya, "Ginoo, nasayod ka sa tanan; nasayod ka nga gihigugma ko ikaw!"

Si Jesus miingon kaniya, "Atimana ang akong mga karnero. 18Sultihan ko ikaw: sa batan-on ka pa ikaw ra ang nagbakos sa imong kaugalingon ug nakaadto ka sa bisan diin nga gusto mong adtoan; apan inigkatigulang na nimo, idupa mo ang imong mga kamot ug lain na ang magbakos kanimo, ug dad-on ka sa dapit nga dili mo gustong adtoan." 19 (Sa pagsulti niya niini gipasabot ni Jesus kon unsang paagiha si Pedro mamatay aron paghimaya sa Dios.) Unya miingon si Jesus kaniya, "Sunod kanako!" Ang Ebanghelyo sa Ginoo.

oOo

KAHULOGAN SA EBANGHELYO (Juan 21:15-19)

15a Human sila makakaon, miingon si Jesus kang Simon Pedro, "Simon, anak ni Juan, gihigugma mo ba ako labaw sa imong paghigugma sa uban?"

Si Jesus miapil sa pagkaon uban sa iyang mga higala didto sa daplin sa lanaw. Mga pipila ka mga semana na ang milabay, si Simon Pedro midumili sa pag-angkon sa iyang Magtutudlo ug agalon nga si Jesus. Si Jesus nangutana kaniya, “… gihigugma mo ba ako…?” Mao usab kini ang pangutana ni Jesus nga iyang gihagit kanato.

Sa kasaysayan sa kinabuhi, adunay kaugalingong kasinatian diin ang akong personal nga pagtuo kinahanglan nga atubangon. Ang pangutana nga kinahanglan nga paga-tubagon mao ang pangutana ni Jesus, “Gihigugma mo ba ako?” Walay usa kanato nga makapasilong sa tubag sa laing tawo. Kinahanglan gayod nga ako mismo ang motubag niini alang sa akong kaugalingon. Kining maong pangutana nagkinahanglan og akong personal nga tubag.

15b Siya mitubag, "Oo, Ginoo, nasayod ka nga gihigugma ko ikaw."

Ang Ginoo daan nang nasayod sa mga personal nga kahuyang ni Pedro. Apan si Pedro misandig sa lawom nga kasayoran ni Jesus kabahin sa kadako sa iyang gugma ngadto Kaniya. Busa si Pedro mitubag, “Oo, Ginoo, nasayod ka nga gihigugma ko ikaw.”

15c Si Jesus miingon kaniya, "Atimana ang akong mga nating karnero."

Ang kalig-on sa pagtuo ug ang tubag ni Pedro kabahin sa iyang paghigugma kang Jesus kinahanglan nga badbaron ngadto sa usa ka kaakohan o responsibilidad. Kining gugmaha ngadto sa Ginoo maoy makapatukmod kanato sa pagka-responsable ngadto sa uban. Kinahanglan nga magpakabana kita ngadto kanila, magbalantay kita kanila, nga mag-agak kanila ngadto sa maayong sibsibanan.

17Unya, sa ikatulong higayon, si Jesus miingon, "Simon, anak ni Juan, gihigugma mo ba ako?" Si Pedro nasubo tungod kay gipangutana man siya ni Jesus sa makatulo…

Ang tulo ka mga pagdumili sa pag-angkon ni Pedro kang Jesus sa gabii una pa Siya sakita, may dakong kalabutan niining tulo ka mga pangutana kabahin sa gibatunang gugma ni Pedro alang kang Jesus. Kini lawom nga gipamalandungan ni Pedro.

Ang maayong pangulo o alagad sa Simbahan o sa bisan unsang pundok, mao ang usa ka tawo nga dili segurado sa iyang kahibalo ug dili gayod magmando sa mga ginsakopan ginamit ang iyang gahum; kondili siya mao ang tawo nga nasayod ug andam nga moangkon sa iyang kahuyang. Siya nagsalig sa iyang kasuod sa Dios inay kay sa iyang tawhanong kusog.

Mao kini ang mga hiyas nga angayan nga mabatonan sa atong Santo Papa ug mga Obispo. Kinahanglan nga sila maalamon sa ilang kahuyangan ug sa ilang limitasyon sa paghigugma.

Ang pagkalabing una (primacy) ni Pedro, nga mao ang iyang responsibilidad alang sa uban, maoy usa ka misyon nga gipiyal ni Cristo. Kini maoy kaakohan nga nagsukad sa buluhaton sa gugma. Si Jesus buot nga si Pedro magbaton og gugma nga mas labaw pa kay sa gugma sa uban.

18Sultihan ko ikaw: sa batan-on ka pa ikaw ra ang nagbakos sa imong kaugalingon ug nakaadto ka sa bisan diin nga gusto mong adtoan; apan inigkatigulang na nimo, idupa mo ang imong mga kamot ug lain na ang magbakos kanimo, ug dad-on ka sa dapit nga dili mo gustong adtoan."

Aniay sambingay bahin sa “pagkabatan-on” ug sa “pagka-tigulang”; bahin sa “kagawasan” ug sa “pagka-walay-igong kagawasan”.

Moabot gayod ang panahon nga dili na ang usa ka tawo mnakahimo sa unsay iyang naandam nga mahimo sa siya pay batan-on.

Unsay may bili niining pagtulun-ana.

19 (Sa pagsulti niya niini gipasabot ni Jesus kon unsang paagiha si Pedro mamatay aron paghimaya sa Dios.)…

Ang bisan unsa nga pakapakgang kanato sa pagbuhat sa unsa untay naandam (gumikan sa atong katigulangon), maoy usa ka kahimtang sa “pagka-martir”. Kini maoy usa ka pagsaksi sa tahas sa “gugma”. Ang bili sa usa ka lisod nga buhatonon mao ang pagdawat sa pagtulun-an nga kini maoy pag-apil o pakiglabot sa unibersal nga buhat ni Cristo alang sa kaluwasan.