13Sa unang adlaw nga igpapahulay, duha sa mga tinun-an ni Jesus naglakaw paingon sa usa ka balangay nga ginganlag Emmaus, mga napulog-usa ka kilometro gikan sa Jerusalem, 14ug nagsultihanay sila mahitungod sa tanang mga butang nga nahitabo. 15Samtang nagsultihanay sila, miduol si Jesus ug mikuyog kanila; 16nakita nila siya, apan wala sila makaila kaniya. 17Unya miingon si Jesus kanila, “Unsa bay inyong gipanagsultihan samtang naglakaw kamo?”

Mihunong sila nga subo og panagway. 18Ug ang usa kanila nga ginganlag Cleopas, nangutana kaniya, “Ikaw ra bay nagpuyo sa Jerusalem nga wala mahibalo sa mga nahitabo didto niining pipila ka adlaw nga milabay?

19“Unsang mga hitaboa?” nangutana siya.

20“Ang nahitabo kang Jesus nga Nazaretnon,” mitubag sila. “Usa siya ka propeta, ug giila sa Dios ug sa tanang mga tawo nga gamhanan sa pulong ug sa buhat. Ang mga kadagkoan sa mga pari ug ang mga punoan mitugyan kaniya aron silotan siya sa kamatayon, ug gilansang nila siya sa krus. 21Naglaum unta kadto kami nga siya mao ang moluwas sa Israel! Labot pa niini, ikatulong adlaw na karon sukad kini nahitabo. 22Ug pipila sa mga babaye nga among mga kauban nakapakurat kanamo; nangadlawon sila pag-adto sa lubnganan, 23apan wala nila hikaplagi didto ang iyang lawas. Ug namalik sila ug nanugilon nga nakakita kuno silag panan-awon diin may mga anghel nga misulti kanila nga buhi siya. 24Ug pipila sa among mga kauban nangadto sa lubnganan, ug nakaplagan nila kini sumala gayod sa gisugilon sa mga babaye, apan wala sila makakita kaniya.”

25Unya miingon si Jesus kanila, “Pagkabuang gayod ninyo! Pagkadugay ninyong motuo sa tanang gisulti sa mga propeta! 26Dili ba kinahanglan man nga mag-antus ang Mesiyas niining mga butanga ug unya mosulod sa iyang himaya?" 27Ug gipasabut ni Jesus kanila ang gisulti mahitungod kaniya sa tibuok Kasulatan, sugod sa mga basahon nga gisulat ni Moises hangtod sa mga sinulat sa tanang propeta.

28Niadtong tungora duol na sila sa balangay nga ilang adtoan, ug nagpasabut si Jesus nga daw mopadayon lang siya sa unahan; 29apan gihawiran nila siya ug giingnan, “Anhi lang ta mamahulay kay hapit na magabii.” Busa midayon siya ug nagpabilin uban kanila. 30Sa ila nang pagpanihapon, mikuha siya sa pan ug gipanalanginan niya kini; unya gipikaspikas niya ug gihatag kanila. 31Dihadiha nabuka ang ilang mga mata ug nakaila sila kaniya, apan nahanaw siya. 32Nag-ingnanay sila, “Dili ba ingon og may kalayo nga nagdilaab sa atong kasingkasing sa dihang nagsulti siya ug nagpatin-aw kanato sa Kasulatan didto sa dalan?"

33Ug nanindog sila dayon ug namalik sa Jerusalem, diin hikaplagan nila ang napulog-usa ka tinun-an ug ang uban pa nga nagkatigom, 34ug nag-ingon, “Tinuod gayod nga nabanhaw ang Ginoo! Si Simon nakakita kaniya!"

35Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan. Ang Ebanghelyo sa Ginoo.

oOo

KAHULOGAN SA EBANGHELYO (Lk. 24 13-35)

13…Duha sa mga tinun-an ni Jesus naglakaw paingon sa usa ka balangay nga ginganlag Emmaus...

Sa atong panahon karon, dili na nato mapamatud-an ang dapit nga nahimutangan sa Emmaus. Matud pa: “Linginan lamang ang palibot sa Jerusalem nga malakaw sulod sa duha ka takna, anaa diha ang Emmaus sulod sa maong serkulo.”

Usa kini ka maayong simbolo nga nagtug-an kanato nga ang Emmaus mahimo nga bisan asang dapita sa atong kalibutan karon. Ang matag lalaki o babaye anaa sa Emmaus sa matag higayon nga anaa ang personal nga pakigtagbo o pagsinati sa buhing Jesus.

14ug nagsultihanay sila mahitungod sa tanang mga butang nga nahitabo. 15Samtang nagsultihanay sila, miduol si Jesus ug mikuyog kanila; 16nakita nila siya, apan wala sila makaila kaniya.

Sa miaging Biyernes, ang ilang higala nga si Jesus namatay. Alang sa iyang mga tinun-an, kadtong hitaboa maoy nakabungkag sa ilang paglaum, usa ka masakit nga panghitabo, usa ka dili matukib nga pagkahanaw. Mibati sila og tumang kapakyasan. Nahitagboan nila ang hilabihang kalisod nga suliran, usa ka mabug-at nga palas-anon, usa ka piot nga situwasyon nga daw walay kasulbaran. Mao nga mibalik na lamang gayod sila sa ilang pinuy-anan nga atua sa gamayng balangay nga gitawag og Emmaus. Ang ilang walay pagkaila kang Jesus maoy usa ka dakong timaan sa lawom nga samad sa ilang mga balatian.

Sa ato usab nga situwasyon. si Jesus anaa gayod labi na kon anaa kita sa kabug-at sa atong mga palas-anon.

17aUnya miingon si Jesus kanila, “Unsa bay inyong gipanagsultihan samtang naglakaw kamo?”

Si Jesus nagtan-aw usab kon unsay ilang mga kahingawa.

Oo, Jesus, nasayod ka sa among mga kasakitan ug kalisdanan. Pagkanindot nga paminawon nga ikaw buot gayod nga masayod sa mga samarang pagbati nga gihambin sa among kasingkasing.

Ginoo, mitugot ako nga ikaw mosusi ug mangutana kon unsay akong kahimtang karon.

17bMihunong sila nga subo og panagway. 18Ug ang usa kanila nga ginganlag Cleopas, nangutana kaniya, “Ikaw ra bay nagpuyo sa Jerusalem nga wala mahibalo sa mga nahitabo didto niining pipila ka adlaw nga milabay? 19“Unsang mga hitaboa?” nangutana siya. “Ang nahitabo kang Jesus nga Nazaretnon,” mitubag sila. “Usa siya ka propeta, ug giila sa Dios ug sa tanang mga tawo nga gamhanan… 20Ang mga kadagkoan sa mga pari ug ang mga punoan mitugyan kaniya aron silotan siya… ug gilansang nila siya sa krus.

Si Jesus mipasayon sa ilang pagpahungaw sa ilang mga gibati. Una pa siya mosulti, siya naminaw kanila. Nasayod na gayod si Jesus sa tanang nahitabo. Apan, wala niya sila paundanga sa ilang saysay sa among panghitabo. Si Jesus kinasingkasing nga namati.

21Naglaum unta kadto kami nga siya mao ang moluwas sa Israel! ...ikatulong adlaw na karon sukad kini nahitabo.

Sama sa daghang mga tawo, sila misunod ni Jesus. Mituo sila Kaniya nga usa ka propeta. Giila nila Siya diha sa gahum sa Iyang pulong ug buhat. Gilauman nila Siya nga moluwas sa Israel. Apan kining tanan nawagtang ug wala nay katumanan. Mao lamay ilang natan-awan ang kanhing kalampusan ug karon ang mipuling kaparutan.

22Ug pipila sa mga babaye… nakapakurat kanamo; nangadlawon sila pag-adto sa lubnganan, 23 apan wala nila hikaplagi didto ang iyang lawas. Ug namalik sila ug nanugilon nga nakakita kuno silag panan-awon diin may mga anghel nga misulti kanila nga buhi siya. 24Ug pipila sa among mga kauban nangadto sa lubnganan, ug nakaplagan nila kini sumala gayod sa gisugilon sa mga babaye, apan wala sila makakita kaniya.”

Ang mga tinun-an wala makadawat sa panghitabo. Naghari kanila ang pagduhaduha. Bisan pa kon aduna nay mga timailhan sa pagkabanhaw sama sa wala nay sulod nga lubnganan, mga taho sa mga kababayenhan, alang kanila dili pa kini igo. Nagpasulabi ang ilang pagka-walay pagtuo.

25Unya miingon si Jesus kanila, “Pagkabuang gayod ninyo! Pagkadugay ninyong motuo sa tanang gisulti sa mga propeta!

Si Jesus naghagit sa ilang Pagtuo. Wala ilimod ni Jesus ang maong panghitabo: Ang pagsilot sa mga punuan, ang mga kasakitan, ang kamatayon sa krus. Apan si Jesus buot nga ila kining tan-awon sa laing anggulo. Alang kang Jesus, sabton kini nga iwag sa Pagtuo.

26Dili ba kinahanglan man nga mag-antus ang Mesiyas niining mga butanga ug unya mosulod sa iyang himaya?"

Kinahanglan gayod nga ang Mesiyas mag-antus. Kinahanglan! Wala kini magpasabot nga mao kini ang palad nga pagaabutan sa Mesiyas, kondili nga kini mao ang katumanan sa kahibulongang Kabubut-on sa Amahan. Ang kamatayon ni Jesus dili isipon nga usa ka aksidenting panghitabo, kondili kabahin sa usa ka balaanong laraw sa Amahan alang sa kaluwasan.

27Ug gipasabut ni Jesus kanila ang gisulti mahitungod kaniya sa tibuok Kasulatan, sugod sa mga basahon… ni Moises hangtod sa… tanang propeta.

Si Jesus mipasabot kanila ginamit ang Balaang Kasulatan. Ang Daang Tugon maoy makahatag og dugang katin-awan sa Bag-ong Tugon. Ang laraw sa Dios nagapadayon gikan sa Daan ngadto sa Bag-ong Tugon. Unsa ang nahitabo ni Jesus maoy katumanan sa panagna sa kanhiayng panahon. Ang eternidad gisugdan pa sa kasaysayan sa mga katawhan sa Israel.

Mao diay nga sa GSK-BECs cluster meeting anaa ang paghatag og gibug-aton sa Pulong sa Dios (the centrality of the Word of God). Pinaagi niini masabtan ta ang kahulogan sa labi na ang mga kasakitan ug kaparutan.

28Niadtong tungora duol na sila sa balangay nga ilang adtoan, ug nagpasabut si Jesus nga daw mopadayon lang siya sa unahan; 30apan gihawiran nila siya ug giingnan, “Anhi lang ta mamahulay kay hapit na magabii.”

Dili pa igo nga ang mga pulong o pagtudlo ni Jesus maoy makapasabot kanila sa kamatuoran. Unsa pa man diay ang idugang? Kinahanglan usab nga sila adunay bukas nga kasingkasing nga andam nga modapit kaniya. Ang lihok sa pag-abi-abi kanila kang Jesus maoy naglarawan niini!

30Sa ila nang pagpanihapon, mikuha siya sa pan ug gipanalanginan niya kini; unya gipikaspikas niya ug gihatag kanila. 31Dihadiha nabuka ang ilang mga mata ug nakaila sila kaniya, apan nahanaw siya.

Sa paghulagway sa mga gibuhat ni Jesus nga maoy nakapabuka kanila sa ilang mga mata, si Jesus migamit sa bokabularyo sa milagro sa pagpadaghan sa pan (Lukas 9:16) ug sa Katapusang Panihapon (Lukas 22:19).

32Nag-ingnanay sila, “Dili ba ingon og may kalayo nga nagdilaab sa atong kasingkasing sa dihang nagsulti siya ug nagpatin-aw kanato sa Kasulatan didto sa dalan?"

Bisan kon nahanaw si Jesus sa ilang mga mata, apan nagpabilin siya sulod sa ilang mga kasingkasing!

33Ug nanindog sila dayon ug namalik sa Jerusalem, diin hikaplagan nila ang napulog-usa ka tinun-an ug ang uban pa nga nagkatigom, 34ug nag-ingon, “Tinuod gayod nga nabanhaw ang Ginoo! Si Simon nakakita kaniya!" 35Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan.

Kon tinuoray nga atong nasinati si Jesus, dili gayod mapugngan nga kita mosaksi niini ngadto sa uban.