Giunsa man pagluwas ni Cristo kanato pinaagi sa iyang Kasakit?

Si Cristo nagluwas kanato dili lamang tungod kay nag-antos siya sa lawas kondili tungod sa iyang hingpit nga gugma sa iyang Amahan ug kanato, nga iyang gipakita diha sa iyang mga kasakit ug kamatayon alang kanato.

Ngano mang nagpasakit ug nagpakamatay si Cristo?

Si Jesus nagpasakit ug nagpakamatay nga gawasnon ug sa iyang kabubut-on aron pagtuman sa misyon nga gihatag kaniya sa Amahan. Siya mismo nakakita sa katumanan sa mga panagna sa Daang Tugon mahitungod sa iyang “pagtugyan sa iyang kinabuhi nga lukat sa kadaghanan” (Mk 10:45)

Giunsa pagpadayag sa Credo ang makaluwas nga sakripisyo ni Cristo?

Ang Credo nagpadayag og lima sa buhat sa makaluwas nga sakripisyo ni Cristo; Siya gisakit, gilansang, namatay, gilubong, ug nanaog sa mga minatay.

Giunsa pagtubos kanato ang makaluwas nga gugma ni Cristo?

Si Cristo nagtubos kanato sa duha ka panukarang buhat:

1. Iyang gikuha ang atong kaugalingong sala pinaagi sa kaluoy ug pasaylo sa Dios, ug

2. Iyang giuli ang katarung sa tawhanong buhat nga nagun-ob sa atong mga sala pinaagi sa iyang mahigugmaong buhat sa pag-uli.

Unsaon pagluwas kanato ang Kasakit ug Kamatayon ni Jesus?

Tungod sa iyang hinugpong panag-alayon uban kanatong mga makasasala, Si Jesus magawagtang sa “sala sa kalibutan” (Jn 1:29) isip “alagad nga nag-antos” nga gitagna ni Propeta Isaias.

Unsa ang mga talagsaong hiyas nga mag-ila sa Buhat sa Kaluwasan ni Cristo?

Ang makaluwas nga Kamatayon ni Cristo lahi kaayo sa uban tungod sa iyang

1. Pagkamalukopon, nga nagtandog sa tanan;

2. Nagtan-aw sa Kaulahian, hangtud sa kinabuhing dayon;

3. Naggahum kanato sa pag-ambit sa iyang buhat sa pagluwas.

Unsay kahulogan sa pagka “malukopon” sa buhat sa kaluwasan ni Cristo?

Cristo wala magpakamatay sa “ato lamang mga sala, kondili alang sa tibuok kalibutan (I Jn 2;2). Busa Walay kaluwasan gawas gikan ni Cristo, kinsa sa bug-os (objective) nagluwas sa tanang mga makasasala, pinaagi sa iyang mahigugmaong pagtuman sa kabubut-on sa Amahan ug sa iyang gugma sa tanang katawhan, nga gitawag sa tinuod nga kinaugalingong paghinulsol sa sala ug mahigugmaong pag-alagad sa isigkatawo.

Nganong gipanghimug-at man sa Kasulatan ang Kaluwasan pinaagi sa “dugo ni Cristo”

Diha sa Daang Tugon ang dugo nagkahulogan og kinabuhi, paglinis sa sala ug selyo sa Kasabutan sa Dios.

Diha sa Bag-ong Tugon, ang dugo ni Cristo naghatag og bag-ong kinabuhi, nagwagtang sa sala sa kalibutan, ug nagtukod sa Bag-ong Kasabutan? (cf. Mk 14:24)

Si Jesus ba lang ang nagluwas kanato?

Dili, kay ang Amahan mao ang nagpadala sa iyang bugtong nga Anak aron pagtubos kanato gikan sa sala, ug paghatag kahulogan ug tumong sa atong kinabuhi pinaagi sa linamdagang kahiusa sa Espiritu Santo.

Busa, ang atong kaluwasan, sama sa mugna ug sa atong pagbalaan, bug-os nga buhat sa Santisima Trinidad, Amahan, Anak, ug Espiritu Santo.

Unsa may gipangayo kanato ang Buhat sa Kaluwasan ni Cristo?

Kita gitawag sa usa ka lawom nga pag-usab sa kasingkasing:

Diha sa pagsalig sa Dios, atong mahigugmaong Amahan, kinsa ang nagtisok sa atong kinaiyang dignidad ug bili, ingon man usab sa tanang mga tawo, ug nagtawag kanato sa pagsunod kang Cristo, Iyang Anak, diha sa mahigugmaong pag-alagad ug pagpuyog yanong kinabuhi.