PTapos sa unom ka adlaw gidala ni Jesus si Pedro ug ang magsuon nga si Santiago ug si Juan ngadto sa usa ka taas nga bukid. 2Samtang nagtan-aw sila kaniya, nausab ang iyang panagway; ang iyang nawong misanag sama sa adlaw, ug naputi ang iyang bisti sama sa kahayag. 3Unya nakita sa tulo ka tinun-an si Moises ug si Elias nga nakigsulti kang Jesus. 4Si Pedro miingon kang Jesus, “Ginoo, maayo nga ania kita dinhi; kon gusto ka, magbuhat ako dinhi og tulo ka payag, usa alang kanimo, usa alang kang Moises, ug usa alang kang Elias. 5Samtang nagsulti siya niini, usa ka masanag nga panganod mitabon kanila, ug unya usa ka tingog gikan sa panganod miingon, “Kini ang pinangga kong Anak nga akong gikahimut-an. Pamati kamo kaniya!” 6Sa pagkadungog sa mga tinun-an sa tingog, nangahadlok sila pag-ayo ug tungod niini, nanghapa sila. 7Miduol si Jesus ug gihikap sila. “Tindog kamo ug ayaw kahadlok,” miingon siya. 8Sa paghangad nila, wala na silay laing nakita gawas kang Jesus. 9Samtang nanglugsong sila sa bukid, gipinahan sila ni Jesus, “Ayaw ninyo isugilon kang bisan kinsa kining panan-awon nga inyong nakita hangtod nga mabanhaw na ang Anak sa Tawo. Ang Ebanghelyo sa Ginoo.

oOo

KAHULOGAN SA EBANGHELYO (Mateo 17: 1-9)

1 Tapos sa unom ka adlaw gidala ni Jesus si Pedro ug ang magsuon nga si Santiago ug si Juan ngadto sa usa ka taas nga bukid. Usa ka paglakaw subay sa gamayng dalan. Upat ka mga tawo ang hinayhinay mihimo'g mga lakang. Nagkaanam og katataw ang panan-awon sa palibot. Nahanggap nila ang bugnawng huyohoy sa hangin. Ang kapatagan atua sa ubos, layo na kanila. Pagkaanindot sa hataas nga bahin sa bukid. Mabati ang tumang kamingaw. Diha lamang sa kahilom nga sa tinuoray mabati ta ang presensya sa Dios. Nangita ba ako og kagihayonan aron pagbaton og hilom sulod niining panahon sa kwaresma? 2 Samtang nagtan-aw sila kaniya, nausab ang iyang panagway; ang iyang nawong misanag sama sa adlaw, ug naputi ang iyang bisti sama sa kahayag.

Si San Mateo naghisgot mahitungod sa kahayag. Ang gigamit nga pulong sa pinulongang Griego mao ang “metamorphoun” nga may lawom nga kahulogan: nga dili lamang ang iyang nawong mao ang misanag kondili ang kinatibuk-an nga persona o larawan ni Jesus may makitang kausaban. Masabtan kini pinaagi sa pagbalik sa maong talan-awon: “Diha niya kanunay ang kinaiya gayod sa Dios, Apan wala siya maghunahuna pagpakigtupong sa Dios pinaagi sa kusog. Kondili sa iyang kaugalingong kabubut-on iya kining gibiyaan...” (Filipos 2:6-7). 3 Unya nakita sa tulo ka tinun-an si Moises ug si Elias nga nakigsulti kang Jesus.

Atong masayran nga ang tulo ka mga apostoles nga gihatagan og kahigayonan sa pagsinati sa pagkausab sa panagway (transfiguration), mao usab ang mga apostoles nga nakasud-ong sa pagkaguba sa panagway ni Jesus (disfiguration) didto sa tanaman sa Gethsemane (Mt 26:37). Si Jesus mihatag kanila og pasiuna sa himaya sa iyang pagkabanhaw aron dili sila makurat sa unsa unyay ilang masud-ong didto sa Gethsemane. 4 Si Pedro miingon kang Jesus, “Ginoo, maayo nga ania kita dinhi; kon gusto ka, magbuhat ako dinhi og tulo ka payag, usa alang kanimo, usa alang kang Moises, ug usa alang kang Elias. Ang pagka-una ni Pedro sa laray sa mga apostoles napamatud-an na niadtong milabayng unom ka adlaw (Mt 16:13-20). Mao nga aron mapamatud-an kini gipakita kang Pedro sila si Moises ug Elias nga nakigsulti kang Jesus. Si Moises mao ang nagtimaan sa Balaod; samtang si Elias mao ang nagtimaan sa mga Propeta (basaha sa Mt 17:10-13). Napuno sa kahinam tungod sa iyang nakita, si Pedro nakapamahayag nga “maayo nga ania kita dinhi…”.

Aduna bay mga higayon nga sa atong kasinatian sa Ginoo nabati nato nga “Maayo…”? Nindot gayod unta nga sa higayon nga masinati nato ang Ginoo diha sa kalipay, kita usab makaingon, “Maayo!” 5a Samtang nagsulti siya niini, usa ka masanag nga panganod mitabon kanila, Kining “panganod”, simbolo sa Presensya sa Ginoo (Salmo 18:12; Exodus 40:34-35, I Hari 8:10-12), nipakgang kang Pedro, nga daw nag-ingon: Si Pedro dili magtukod og balay sa Ginoo; hinoon ang Ginoo mianhi aron sa pagtukod sa Iyang “Balay”. Ang simbolo sa maong balay mao kadtong panganod. 5b ug unya usa ka tingog gikan sa panganod miingon, “Kini ang pinangga kong Anak nga akong gikahimut-an. Pamati kamo kaniya!”

Ang “tingog gikan sa panganod” nagbag-o sa pamahayag niadtong panahon sa pagbunyag ni Jesus: Si Jesus dili lamang ordinaryo nga tawo, Siya mao ang Anak sa Langitnong Amahan nga gikahimut-an sa Dios pag-ayo. Dinhi sa pagsugod sa Iyang ministeryo gipahinumduman ang mga tinun-an sa “pagpaminaw” kaniya. Ginoo, sulod niining balaanong panahon sa kwaresma, tabangi kami sa tinuoray nga pagpaminaw kanimo labi na sa mga mensahe nga mahinungdanon sa among pakigsuod Kanimo. 6 Sa pagkadungog sa mga tinun-an sa tingog, nangahadlok sila pag-ayo ug tungod niini, nanghapa sila. 7 Miduol si Jesus ug gihikap sila. “Tindog kamo ug ayaw kahadlok,” miingon siya. 8 Sa pag-hangad nila, wala na silay laing nakita gawas kang Jesus. Sa ilang paghapa ang mga tinun-an nagmatuod nga ilang giila ang pagpadayag sa Ginoo. Ang paghapa, simbolo sa “adorasyon” (adoration) o pagsimba maoy usa ka daling buhaton sa tawo atubangan sa presensya sa balaan.

Pagkinabuhi. Paghigugma. Pagsimba (To live, to love, to adore). Ang tawo wala himoa aron sa pagtago sa iyang kaugalingon. Gipakabuhi ang tawo aron sa pagbukas sa iyang kaugalingon ngadto “sa uban” pinaagi sa paghigugma. Ug ang iyang labing tim-os nga kalipay mao ang iyang pagbukas sa kaugalingon ngadto sa “Hingpit nga Uban” (Totally Other) pinaagi sa pagsimba. Mao kini ang gipasabot sa “pagdumili sa kaugalingon” o “magpakamatay sa kaugalingon aron mabuhi alang sa uban.” 9 Samtang nanglugsong sila sa bukid, gipinahan sila ni Jesus, “Ayaw ninyo isugilon kang bisan kinsa kining panan-awon nga inyong nakita hangtod nga mabanhaw na ang Anak sa Tawo. Kinahanglan ang pagbalik ngadto sa naandan nga buluhaton.