1Unya gidala si Jesus sa Espiritu ngadto sa kamingawan aron tintalon sa Yawa. 2Nagpuasa siya sulod sa kap-atan ka adlaw ug kap-atan ka gabii ug unya gigutom siya. 3Ang Yawa miduol kaniya ug miingon, “Kon Anak ka sa Dios, himoang pan kining mga bato.” 4Si Jesus mitubag, “Ang Kasulatan nag-ingon, ‘Dili mabuhi ang tawo sa pan lamang, kondili sa matag pulong usab nga isulti sa Dios.”' 5Unya si Jesus gidala sa Yawa ngadto sa Balaang Siyudad, ug gipahiluna siya sa kinatas-ang bahin sa Templo, 6ug giingnan, “Kon ikaw Anak sa Dios, ambak ngadto sa ubos, kay nag-ingon man ang Kasulatan: ‘Ang Dios magsugo sa iyang mga anghel pagbantay kanimo: Sapnayon ka nila sa ilang mga kamut, Aron dili madugmok sa bato bisan gani ang imong tiil.'”

7Si Jesus mitubag, “Apan nag-ingon usab ang Kasulatan, ‘Ayaw tintala ang Ginoo nga imong Dios.”' 8Unya gidala si Jesus sa Yawa ngadto sa usa ka taas kaayong bukid ug gipakita kaniya ang tanang gingharian sa kalibutan ug ang ilang kaanindot. 9Ang Yawa miingon, “Ihatag ko kanimo kining tanan kon moluhod ka ug mosimba kanako.” 10Si Jesus mitubag, “Pahawa, Satanas! Ang Kasulatan nag-ingon, ‘Simbaha ang Ginoo nga imong Dios ug siya lamang ang alagari!”' 11Busa ang Yawa mibiya kaniya, ug unya nangabot ang mga anghel ug miatiman kaniya. Ang Ebanghelyo sa Ginoo.

oOo

KAHULOGAN SA EBANGHELYO (Mateo 4:1-11)

1Jesus sa Espiritu ngadto sa kamingawan aron tintalon sa Yawa. Usa ka matuod gayod nga hitabo nga si Jesus mihimog usa ka “retreat” sa wala pa niya sugdi ang iyang ministeryo. Ang kamingawan o deserto usa ka saktong dapit alang niini. Usa kini ka dapit nga anaa ang kahilom. Kinahanglan ang kahilom alang sa pamalandong. Gipatataw nga si Jesus gidala sa Espiritu. Ang tentasyon kabahin sa laraw sa Amahan alang sa Iyang Anak. Kini may kadugtungan sa kamatuoran nga bisan pa kon kita binunyagan, wala kini pagbasabot nga walay na kitay ikahibalag nga tentasyon o pagsulay. Ang tentasyon o pagsulay usa ka positibo nga pangitabo diha sa bibliya. Dinhi mapamatud-an kon unsa gayod ka tinuod ang nahimutangan sa usa ka tawo. Sama da nga ang mga katawhan sa Dios, ang mga Israelitas, gisulay (basaha sa Deuteronomio 8:2), si Jesus gisulay usab aron mapamatud-an ang iyang pagsunod sa kabubut-on sa Iyang Amahan. Agad pa unta nga kita malampuson nga magmatinud-anon sa Amahan panahon sa mga pagsulay. 2Nagpuasa siya sulod sa kap-atan ka adlaw ug kap-atan ka gabii ug unya gigutom siya. Ang “kap-atan ka adlaw ug kap-atan ka gabii” maoy usa ka simbolo sa bibliya nga alang sa tawo gikinahanglan kaniya ang igong panahon aron sa pagpahamtong sa kinabuhi. Ang “kap-atan”mao ang gidugayon sa pagpuyo sa mga Israelitas sa deserto. Mao usab kini ang gidugayon sa pagbaktas ni Elias ngadto sa bukid sa Ginoo. Mao usab ang gidugayon sa pagpakita ni Jesus human sa iyang pagpakabanhaw ngadto sa iyang pagkayab ngadto sa langit.

3Ang Yawa miduol kaniya ug miingon, “Kon Anak ka sa Dios, himoang pan kining mga bato.” Usa ka pagsulay sa paglaum (test of hope). Usa ka tentasyon sa panagbangi sa “lawas” ug sa “espiritu”. Kon adunay lawasnong kagutom buhaton dayon sa tawo ang pag-alim niini pinaagi sa mga yutan-ong pagkaon. Maayo man kini. Gani kini mao man ang kabubut-on sa Dios. Apan kon kita magpabilin ra kutob niini, nakalimtan nato sa pag-isip nga adunay mga panginahanglan sa tawo nga labaw pa sa materyal. Kini ato usab nga hatagan og mas mahinungdanon pang pagtagad. 4Si Jesus mitubag, “Ang Kasulatan nag-ingon, ‘Dili mabuhi ang tawo sa pan lamang, kondili sa matag pulong usab nga isulti sa Dios.”' (Dt. 8:3) Ang tulo ka tubag ni Jesus sa yawa nagasukad sa basahon sa Deutoronomio. Mao kini ang saysay sa kap-atan (40) ka tuig nga ang mga Israelitas nagpuyo sa deserto. Ang mga Israelitas nagpadaog sa ilang kagutom ug kauhaw pinaagi sa ilang pagbagutbot batok sa Ginoo. Apan si Jesus nakigharong sa iyang kagutom pinaagi sa pagpakigbisog batok sa tintasyon sa yawa. Unsa may atong gikagutman? Mga butang pa lamang nga yutan-on? May kagutom ba usab kita sa Pulong sa Ginoo nga maoy magluwas kanato sa mga pagsulay? Nagbaton ba kitag paglaum diha sa gahum sa Dios?

5Unya si Jesus gidala sa Yawa ngadto sa Balaang Siyudad, ug gipahiluna siya sa kinatas-ang bahin sa Templo, 6ug giingnan, “Kon ikaw Anak sa Dios, ambak ngadto sa ubos... 7Si Jesus mitubag, “Apan nag-ingon usab ang Kasulatan, ‘Ayaw tintala ang Ginoo nga imong Dios.”' Usa ka pagsulay sa pagtuo (test of faith). Sulod sa kap-atan ka tuig ang mga Israelitas nangayo sa Ginoo og mga milagro (tan-awa sa Exodus 17:1-7). Ang mga tinun-an ni Jesus nagpaabot usab nga siya mopadayag ngadto kanila sa iyang harianong gahum. (basaha sa Mt. 16:1, 12:39; 24:3). Kita usab buot nga ang Dios mopadayag gayod kanato sa iyang gahum pinaagi sa mga tataw nga paagi o sa mga dagkong milagro. Dili kita buot nga magpakahilom o magtago lamang ang Ginoo. Usahay magduda kita kon anaa ba gayod ang Dios tungod kay wala man nato mabati ang iyang gahum sumala sa atong tawhanong panabot. 8Unya gidala si Jesus sa Yawa ngadto sa usa ka taas kaayong bukid ug gipakita kaniya ang tanang gingharian sa kalibutan ug ang ilang kaanindot. 9Ang Yawa miingon, “Ihatag ko kanimo kining tanan kon moluhod ka ug mosimba kanako.” 10Si Jesus mitubag, “Pahawa, Satanas! Ang Kasulatan nag-ingon, ‘Simbaha ang Ginoo nga imong Dios ug siya lamang ang alagari!”' 11Busa ang Yawa mibiya kaniya, ug unya nangabot ang mga anghel ug miatiman kaniya.

Mao kini ang pagsulay sa gugma (test of love). Sa panahon sa Exodus, ang mga Israelitas misulay sa pagbiya sa Kasabutan (Covenant), nga mao ang larawan sa panaghigugmaay tali sa Dios ug sa mga Tawo. Buot sa mga Israelitas nga ila nang pagasimbahon ang mga dios-dios (basaha sa Exodus 23:20-33). Tan-awa kon kinsa gayod ang yawa. Siya mao ang miangkon nga tag-iya sa tanang gingharian sa kalibutan: prinsipe sa kalibutan. Si Jesus mipamatuod kon kinsa ug unsa gayod ang yawa. Siya si Satanas, ang kaaway sa Dios, nga buot usab magpasimba sa tanang tawo. May gipaka-Ginoo ba ako sa akong kinabuhi—kabtangan, gahum, kalingawan, kasayon, ideolohiya, ug uban pa?