ESi Jesus miingon ngadto sa iyang mga tinun-an, 38 "Nakadungog kamo sa giingon kaniadto, 'Mata bayrag mata, ug ngipon bayrag ngipon.' 39 Apan karon sultihan ko kamo: ayaw panimalos sa nagbuhat kaninyog daotan. Kon sagpaon ang tuo mong aping, ipasagpa usab ang wala. 40 Kon may mokiha kanimo aron mailog niya ang imong kamisin, ihatag usab kaniya ang imong kamisadentro. 41 Kon pugson ka sa usa ka sundalo pagdala sa iyang kasangkapan sa gilay-on nga usa ka kilometro, pas-ana kini og duha ka kilometro. 42 Kon may mohangyo kanimo og usa ka butang, ihatag kini kaniya; ug ayaw balibari ang buot mohulam kanimo."

43 "Nakadungog kamo nga giingon kaniadto, 'Higugmaa ang imong mga higala, ug dumti ang imong mga kaaway. 44 Apan karon sultihan ko kamo: higugmaa ang inyong mga kaaway, ug pag-ampo kamo alang sa mga tawo nga nagpasipala kaninyo, 45 aron mahimo kamong mga anak sa inyong Amahan nga atua sa langit. Kay siya, sa walay pagpili, nagpadan-ag sa iyang adlaw ug naghatag og ulan ngadto sa mga matarong ug sa mga makasasala. 46 Nganong magpaabot man kamo nga mobalos kaninyo ang Dios, kon kamo nahigugma lamang sa mga tawo nga nahigugma kaninyo? Bisan gani ang mga kobrador sa huhis nagbuhat man niana! 47 Kon kamo makighimamat lamang sa inyong mga higala, unsa may nahimo ninyo nga labaw sa kasagaran? Bisan gani ang mga tawo nga wala magtuo sa Dios nagbuhat man niana! 48 Kinahanglan magmahingpit kamo ingon nga hingpit ang inyong Amahan nga atua sa langit." Ang Ebanghelyo sa Ginoo.

oOo

KAHULOGAN SA EBANGHELYO (Mt. 5:38-48)

38a "Nakadungog kamo sa giingon kaniadto,… 39a Apan karon sultihan ko kamo...”

Kining pulonga: "Nakadungog kamo sa giingon kaniadto,…” nagpasabot nga usa kini nga solemne nga pagproklamar sa Balaod. Bag-o ang pamaagi ni Jesus, kay iyang gipun-an ang kahulogan sa Balaod. Mao nga niadtong panahona wala siya masabti sa kadaghanan. 38 "Nakadungog kamo sa giingon kaniadto, 'Mata bayrag mata, ug ngipon bayrag ngipon.' 39aApan karon sultihan ko kamo: ayaw panimalos sa nagbuhat kaninyog daotan. Ang Balaod sa “Panimalos” daw lisod nga sabton sa atong panahon. Nakasukad kini sa kabangis sa tawhanong kinaiya. Apan gipaningkamutan kini sa pagpanton niadtong panahona. Pananglitan, adunay gitawag og “Code of Hammurabai” nga misulay sa pagpugong niining tawhanong kinaiya sa pagpanimalos. Apan ang kasugoan nagpabilin nga unsay nahimong dautan nga gibuhat sa kaaway mao usab ang sukdanan sa panimalos sa nabiktima. (tan-awa sa Exodus 21:24, Leviticus 24:20, Deuteronomy 19:21).

Apan wala kini makawagtang sa atong kasinatian. Bisan sa atong panahon karon, nag-indigay pa kita kon kinsay mas labaw. Mao nga aduna pay atong nadungog nga managbangig baroganan kay wala may buot magpalupig. Nagpabilin gayod ang pagka-bangis sa tawo. Si Jesus, sa laing bahin, midapit kanato sa hingpit nga paghigugma. Gihagit kita sa dili gayod sa pagpanimalos. Nga walay dautan nga masanta pinaagi sa laing dautan Ang dautan masanta lamang sa kaayo.

Gihatagan kita niya og pipila ka mga sanglitanan (tan-awa sa Mateo 5: 39b-42).

39b Kon sagpaon ang tuo mong aping, ipasagpa usab ang wala. 40 Kon may mokiha kanimo aron mailog niya ang imong kamisin, ihatag usab kaniya ang imong kamisadentro. 41 Kon pugson ka sa usa ka sundalo pagdala sa iyang kasangkapan sa gilay-on nga usa ka kilometro, pas-ana kini og duha ka kilometro. 42 Kon may mohangyo kanimo og usa ka butang, ihatag kini kaniya; ug ayaw balibari ang buot mohulam kanimo."

Ang ebanghelyo wala maghatag kanatog “letra sa balaod” kondili “espiritu sa Balaod”. Mao kini ang gipakita ni Jesus sa dihang gilaparo siya sa panuang pari (John 18:23).

Wala kini magpasabot nga magpadaogdaog lamang kita. Dili, ang usa ka tinuod nga Kristohanon, mobarog gayod batok sa mga panglupig. Mao kana ang kasugoan sa “Pagka-manggiangayon”. Kinahanglan pangitaon gayod ang kaangayan! Apan dili kita molapas sa gisugo sa balaod.

43 "Nakadungog kamo nga giingon kaniadto, 'Higugmaa ang imong mga higala, ug dumti ang imong mga kaaway. Kon susihon nato ang nahigulat sa “Qmran manuscripts” gitug-anan kita sa “pagdumot niadtong mga anak sa kangitngit'.

44 Apan karon sultihan ko kamo: higugmaa ang inyong mga kaaway, ug pag-ampo kamo alang sa mga tawo nga nagpasipala kaninyo, 45 aron mahimo kamong mga anak sa inyong Amahan nga atua sa langit. Kay siya, sa walay pagpili, nagpadan-ag sa iyang adlaw ug naghatag og ulan ngadto sa mga matarong ug sa mga makasasala.

Usa kini ka bag-ong kasugoan. Kay sa Daang Tugon, ang katawhan nag-ampo batok sa ilang mga kaaway (Tan-awa sa Salmo 17:13, 28:4, 69:23,29, ubp ...). Apan karon mag-ampo kita lang sa ilang pagka-usab kon kabag-ohan. Magbantay kita: Dili kita makapuyo sa Ebanghelyo diha sa gitawag og “purely human level” lamang. Kinahanglan nga mosalig kita sa Dios nga maoy unang nahigugma kanato bisan pa sa atong kabadlongon. Basahon nato ang gisulat ni San Pablo ngadto sa mga taga Roma (Romans 5:7-8) aron ato kining masabtan. Matud pa sa usa ka panultihon "One will hardly die for a righteous man — though perhaps for a good man one will dare even to die. But God shows his love for us in that while we were yet sinners Christ died for us" ...

Tingali makapangutana kita. Unsaon man sa paghigugma sa usa ka tawo nga wala gayod mahigugma kanato? Ang tubag: Giunsa man ikaw paghigugma sa Dios? Gihigugma ka pinaagi sa pagpasaylo sa Ginoo sa imong mga sala (tan-awa sa Lukas 23:24). 46 Nganong magpaabot man kamo nga mobalos kaninyo ang Dios, kon kamo nahigugma lamang sa mga tawo nga nahigugma kaninyo? Bisan gani ang mga kobrador sa huhis nagbuhat man niana! 47 Kon kamo makighimamat lamang sa inyong mga higala, unsa may nahimo ninyo nga labaw sa kasagaran? Bisan gani ang mga tawo nga wala magtuo sa Dios nagbuhat man niana!

Si Jesus mitug-an nato nga ang matag usa kanato “asin ug kahayag sa kalibutan”. Nagdapit siya nato sa pagpadayag og bag-ong kinaiya, nga tingali sa tawhanong sukdanan, lisod buhaton. Sa pagsunod sa panag-ingnan sa Dios: Sa Iyang kanunayng paghigugma kanato bisan pa sa atong pagka-walay angay! Oo, gihagit kita sa paghigugma bisan pa sa atong mga kaaway. 48 Kinahanglan magmahingpit kamo ingon nga hingpit ang inyong Amahan nga atua sa langit." Mga anak kita sa Amahan. Siya maluluy-on. Isip mga anak, moliwat unta kita Kaniya. Magmaluluy-on usab!