Discover Bohol - Bohol Tours - Chocolate Hills - Panglao Beaches - Alona - Python - Sandugo - Baclayon Church - Balicasag
Bohol Sunday Post - Bohol Newspaper - Bohol news online - Bohol online news - Bohol latest news - Bohol news update - Bohol breaking news - What's happening in Bohol
Tagbilaran - Bohol - Telephone Directory
VOLUME XXVIII No. 32
Tagbilaran City, Bohol, Philippines
February 16, 2014 issue
advertisement
-
-
ARCHIVED ISSUES
 
Bohol Realty - Panglao beach property - affordable house and Lot - overlooking view - commercial property - investment property - Bohol beach property

EBANGHELYO (Mt 5: 20-22, 27-28, 33-34, 37)

 

KINUTLO GIKAN SA EBANGHELYO SUMALA NI SA MATEO

(MINUBO)

Si Jesus miingon sa iyang mga tinun-an: 20 "Busa mag-ingon ako kaninyo nga dili kamo makasulod sa Gingharian sa langit kon ang inyong pagtuman sa kabubut-on sa Dios sama lamang sa gihimo sa mga magtutudlo sa Balaod ug sa mga Pariseo."

21 "Nasayod kamo nga ang mga tawo giingnan kaniadto, 'Ayaw pagpatay; ang makapatay taralon sa hukmanan.' 22 Apan sultihan ko kamo nga ang masuko sa iyang isigkatawo dad-on ngadto sa maghuhukom, ug ang maghingalag kuwanggol sa iyang isigkatawo taralon ngadto sa Labawng Hukmanan, ug bisan kinsa nga moingon nga buang ang iyang isigkatawo malagmit nga mahiagom sa kalayo sa impiyerno."

27 "Nakadungog kamo nga giingon kaniadto, 'Ayaw panapaw.' 28 Apan karon sultihan ko kamo nga bisan kinsay motan-aw sa usa ka babaye uban sa law-ay nga hunahuna nakapanapaw na kaniya sulod sa iyang kasingkasing."

33 "Nakadungog usab kamo nga gi­ingnan ang atong katigulangan kaniadto, 'Ayaw pakyasa ang imong panaad, kon dili tumana ang imong gipanumpa sa Ginoo nga imong buhaton. 34 Apan karon sultihan ko kamo: ayaw gayod panumpa kon ikaw manaad: ayaw panumpa sa langit, kay ang langit mao ang trono sa Dios; 35 ni sa yuta, kay ang yuta mao ang iyang tumbanan; ni sa Jerusalem, kay kini mao ang siyudad sa halangdong Hari. 36 Ayaw kamo panumpa bisan gani sa inyong ulo, kay dili man kamo makapaputi o makapaitom sa usa ka lugas nga buhok. 37 Ingna lamang 'Oo' o 'Dili' kay kon may mokapin pa niini, kana gikan na sa Yawa." Ang Ebanghelyo sa Ginoo.

oOo

KAHULOGAN SA EBANGHELYO (Mt 5: 20-22, 27-28, 33-34, 37)

20 "Busa mag-ingon ako kaninyo nga dili kamo makasulod sa Gingharian sa langit kon ang inyong pagtuman sa kabubut-on sa Dios sama lamang sa gihimo sa mga magtutudlo sa Balaod ug sa mga Pariseo."

Gilatid ni Jesus niini ang mga prinsipyo sa iyang mga pagtulun-an.

1. “Kaayo” o "Righteousness". Usa ka pulong sa Bibliya nga haduol sa kasingkasing ni Mateo (Matthew 1:19, 3:15, 5:6, 10, 20, 6:1, 33, 9:13, 10:41, 11:19, 12:37, 13:17, 43, 49, 20:4, 21:32, 23:28, 29, 35, 25:37 ,46, 27: 19, 24) Ang ubang hubad migamit sa pulong “Kaangayan” o “hustisya” o “kaayo” Sa Bibliya, ang “kaayo” nagpasabot nga “pagkinabuhi sumala sa plano o kabubut-on sa Dios.” Kining tawhana, tungod sa iyang pagpahisibo sa iyang kinabuhi sa kabubut-on sa Dios, miapil sa kinabuhi nga Iya sa Dios. Gumikan niini moabot gayod siya sa hingpit nga kalipay nga maoy hinungdan nga siya gibuhat sa Dios.

Maa kini ang gisugyot ni Jesus - nga ang iyang mga tinun-an mas molabaw pa sa ilang kaayo kay sa mga escriba ug Pariseo. Ang mga escriba mao ang mga batid sa Balaang Kasulatan, mga nagtudlo niini. Gitawag silag mga “rabbi”. Ang mga Pariseo mao ang mga mitahan sa ilang kaugalingon sa pagpuyo sumala sa Balaod niadtong panahona. Gituman nila ang balaod nga walay kompromiso. Unsaon man sa mga tinun-an ni Cristo, kabos, yano, walay kabangkaagan, nga sila mopalabaw pa kay sa mga Escriba ug Pariseo, kinsa mga batid sa Balaod?

Kining unang tulo ka mga pagtulun-an kabahin sa “labawng kaayo” nga gisugyot ni Jesus, kinahanglan pag-ayo sa atong kinabuhi:

1) Kabahin sa “Pagka-Biyulente” - may kalabutan sa paghan-ay sa atong kinaiyahan nga biyulente;

2) Kabahin sa “Sexualidad” - may kalabutan sa linawas ug sentimental nga relasyon tali sa mga lalaki ug babaye.

3) Kabahin sa “Kamatuoran” - may kalabutan sa pagpaminaw ug pakigdialogo kon pakisultihanay sa uban.

21 "Nasayod kamo nga ang mga tawo giingnan kaniadto, 'Ayaw pagpatay; ang makapatay taralon sa hukmanan.' 22 Apan sultihan ko kamo nga ang masuko sa iyang isigkatawo dad-on ngadto sa maghuhukom, ug ang maghingalag kuwanggol sa iyang isigkatawo taralon ngadto sa Labawng Hukmanan, ug bisan kinsa nga moingon nga buang ang iyang isigkatawo malagmit nga mahiagom sa kalayo sa impiyerno."

Mao kini ang unang bahin sa atong kinabuhi nga atong pugngan. Sa atong mga relasyon sa uban, dili kalikayan nga anaa ang panagbangi tali sa uban, anaa ang panag-sumpaki o panagbingkil. Si Jesus nasayod pag-ayo kon unsa ang sulod sa kasingkasing sa tawo, mao nga iya kitang gipanghimangnuan kabahin niini. Ang dinumtanay makapaguba sa tawo!

27 "Nakadungog kamo nga giingon kaniadto, 'Ayaw panapaw.' 28 Apan karon sultihan ko kamo nga bisan kinsay motan-aw sa usa ka babaye uban sa law-ay nga hunahuna nakapanapaw na kaniya sulod sa iyang kasingkasing."

Ang pakig-relasyon tali sa mga lalaki ug babaye maoy ikaduhang luna nga si Jesus midapit nato nga atong han-ayon labaw pa kay sa gisulat sa Balaod. Una sa tanan, si Jesus mipasidaan sa mga bana, kay niadtong panahona, ang mga lalaki mao may gihatagan og pagtagad. Sa atong panan-aw sa atong panahon karon, nagpasabot kini nga ang pagtulun-an nga gitudlo ni Jesus alang gayod sa mga bana ug asawa.

Daghan ang miingon nga hilabihan sa kalisod sa pagsunod niining sugoa. Mao nga nasayod man gayod kita sa lawasnong panginahanglanon, dili na kinahanglan nga dugay nga pag-utingkay niini. Ang atong buhaton mao ang kinasingkasing nga pagdawat sa atong mga kaluya ug motahan sa atong pagsalig nga atabangan kita sa Dios niining bahina. Kay kon magpatuyang lamang kita sa kailibgong lawasnon, mora laman kitag mga manananap inay kay tawo.

Diha lamang kang Cristo - pinaagi sa iyang grasya ug gugma - nga matuman nato ang Balaod.

33 "Nakadungog usab kamo nga gi­ingnan ang atong katigulangan kaniadto, 'Ayaw pakyasa ang imong panaad, kon dili tumana ang imong gipanumpa sa Ginoo nga imong buhaton. 34 Apan karon sultihan ko kamo: ayaw gayod panumpa kon ikaw manaad: ayaw panumpa sa langit, kay ang langit mao ang trono sa Dios; 35 ni sa yuta, kay ang yuta mao ang iyang tumbanan; ni sa Jerusalem, kay kini mao ang siyudad sa halangdong Hari. 36 Ayaw kamo panumpa bisan gani sa inyong ulo, kay dili man kamo makapaputi o makapaitom sa usa ka lugas nga buhok. 37 Ingna lamang 'Oo' o 'Dili' kay kon may mokapin pa niini, kana gikan na sa Yawa."

Ang ika-tulo nga sugyot daw daling masabtan sa atong panahon karon. Kini moderno. Kabahin kini sa paghan-ay sa mga suliran nga nakagikan sa dili saktong komunikasyon. Ang mga relasyon tali kanatong mga tawo nabulingan gumikan sa mga daghang mga paagi, pagtuis sa kamatuoran, pagsulti sa bakak, paghaylo, pagtaho sa unsay mga tinumotumo, paghulagway sa unsay dili-mao.

Si Jesus nagdapit nato sa pagsunod sa kamatuoran. Sa matarong nga paghan-ay sa atong panag-istorya. Dili kita manaad. Himoon ta ang atong mga pulong nga maoy mobarog sa atong pagka-maayo. Kon Oo, nagkahulogan og Oo gayod! Kon Dili, Dili gayod! Ang katumanan sa atong mga pulong maoy naghulagway sa atong matuod nga pagkatawo!

-
-
The Bohol Sunday Post, copyright 2006 - 2014, All Rights Reserved
For comments & sugestions please email: webmaster@discoverbohol.com