13 Unya miadto si Jesus sa Jordan gikan sa Galilea, aron magpabunyag ni Juan. 14Apan dili unta mobunyag kaniya si Juan. Siya miingon, “Ako ang angay mong bunyagan, apan nganong ako na man hinoon ang magbunyag kanimo?” 15Apan gitubag siya ni Jesus, "Pasagdi lang nga mahitabo kini, kay niining paagiha makatuman kita sa tanan nga gisugo sa Dios." Busa miuyon si Juan. 16Sa pagkahuman gayod og bunyag kang Jesus, mihaw-as siya sa tubig. Unya naabli ang langit ug nakita niya ang Espiritu sa Dios nga mikunsad daw salampati ug mitugdon kaniya. 17Ug unya may tingog gikan sa langit nga nag-ingon, "Kini mao ang pinangga kong Anak nga nakalipay kanako pag-ayo.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 3:13-17)

13aUnya si Jesus miadto sa Jordan gikan sa Galilea…

Dili nato hikalimtan ang mga sugilanon nga naglibot niining maong mga panghitabo nga gibanabana nga nahitabo niadtong tuig 27 A.D. “Jesus” - Usa ka tawo nga wala pa mailhi sa kadaghanan. “...gikan sa Galilea” - usa ka dapit kansang mga lumulupyo gibiaybiay sa mga katawhan sa Juda ug Jerusalem, mga dapit nga giila nga mga balaang pinuy-anan sa Dios. “...miadto” - Ang usa ka wala pa maiilhi nga tawo nga gikan sa wala maila nga dapit karon mitungha na. Kita sa atong panahon karon nasayod nga kini siya mao si Jesus nga maoy nakapa-usab sa panagway sa yuta. Niadtong panahona nag-edad siya og 30 ka tuig. “… sa Jordan” - Usa ka talagsaong suba sa tibuok kalibutan. Sa Hebreo ang “Jordan” nagkahulogan og “mipadaos-os”. Ang tinubdan niini anaa sa Bukid sa Hebron, 520 ka metro ang gitas-on, ug sa 220 ka kilometro sa pagtadlas sa maong suba mopatighulog kini sa Dead Sea. 394 ka metro ang giladmon. 13bug miduol siya kang Juan aron magpabunyag.

Ang bunyag nga gipangayo ni Jesus kang Juan mao ang bunyag sa pagbag-o (baptism of conversion). Kini mao ang timaan sa pagbasol sa mga sala ug ang pagsaad sa pagbag-o. Si Jesus diay bisan kon siya walay sala, apan mitipon sa mga makasasala. Sa akong kaugalingon giangkon ko ba ang akong pagkamakasasala? Unsa may akong panan-aw o pagtagad sa mga makasasala. Ang gibuhat nga panag-ingnan ni Cristo nakahatag ba nako og usa ka hagit, labi na sa pagsuporta sa mga nakasala ug sa pagtabang kanila aron sila makakaplag usab og kaluwasan? 14Apan si Juan misulay sa pagsanta sa pag-ingon: “Ako ang angay mong bunyagan, apan ngano nga ikaw na man hinoon ang magpabunyag kanako?” Wala gayod magtuo si Juan nga siya nga iyang giila nga labaw kaniya (Mt. 3:11) moduol aron pagpabunyag kaniya. Wala si Juan makatuo nga siya nga walay sala moapil sa pagdawat sa bunyag alang sa mga makasasala!

15aApan si Jesus mitubag kaniya: “Pasagdi lang una karon kay niining paagiha makatuman kita sa tanan nga gisugo sa Dios.” Mao kini ang labing una nga gilitok nga pulong ni Cristo sumala sa Ebanghelyo ni San Mateo. Nagtug-an kanato kon unsa gayod si Jesus. Siya nasayod gayod sa iyang balaang misyon. Ang iyang mga nagpakahilom nga mga katuigan sa Nazaret wala diay masayang. Isip usa ka matuod nga Judio, si Jesus nagtuon usab sa Torah, ang daang testamento. Ug kini mapamatud-an sa iyang unang gilitok nga mga pulong: “aron makatuman kita sa tanan nga gisugo sa Dios.” Ang pagtuman sa gisugo sa Dios mao ba usab kini ang akong tahas diha sa pagpakabuhi? 14bBusa miuyon si Juan.

Pagkamapahiubsanon usab ni Juan. Wala diha isulat nga siya “nakasabot” kondili ang giingon mao nga siya “miuyon”. Si Juan mihikling sa iyang karaang gituohan mahitungod sa Mesiyas nga magmadaugon dinhi sa kalibutan (triumphantist Messiah). Tingali dinhi usab sa hinayhinay nakaplagan ni Juan kon kinsa gayod kini si Jesus. Sa akong kinabuhi ako bang gipaningkamutan nga sa hinayhinay akong makaplagan ang kamatuoran mahitungod kang Jesus? 16aSa pagkahuman gayod og bunyag kang Jesus, siya mihawhas sa tubig. Ang pagbunyag wala ihulagway ni San Mateo. Daw dili kini malarawan. Gisuginlan lamang kita sa duha ka panghitabo: una, si Jesus mipaubos o milunang sa tubig; unya, ika-duha, siya mihawhas. Mga paghulagway sa lihok sa Ginoo sa pagluwas sa mga katawhan: ang Dios nagpahiubos—nakig-uban kanato. Si Jesus “gipanamkon… gianak... Gisakit… gilansang… namatay ug gilubong… mikunsad sa mga minatay… nabanhaw… misaka sa langit… nagalingkod sa tuo sa Amahan… mobalik Siya aron paghukom sa mga buhi ug sa mga minatay…” 16bUnya naabli ang langit…

Pagbukas sa langit, ang pagpadayag sa Dios. Bukas ang langit alang kanato. 16cug nakita ni Jesus ang Espiritu sa Dios nga mikunsad daw salampati ug mitugdon kaniya. Dili kini larawan sa usa ka talan-awon, kondili usa ka paglarawan sa misteryo. Usa ka paglarawan sa lihok nga balaanon. Wala moingon nga adunay “salampati” kon dili “daw salampati”. Kabahin sa misteryo sa Dios! 17Ug unya may usa ka tingog gikan sa langit nga nag-ingon, “Kini mao ang hinigugma kong Anak nga nakalipay kanako pag-ayo.” Ania ang kamatuoran kon kinsa gayod si Jesus. Siya mao ang “Anak sa Amahan”. Siya ang ikaduhang Persona sa Dios! Si Jesus nakalipay sa Iyang Amahan pag-ayo!